2 Samuel 12 - Chol: I T’an Dios

Natán tsi' tsictesʌbe i mul David

¹ Lac Yum tsi' choco majlel Natán ba'an David. Che' bʌ tsa' c'oti ya' ti' yotot, tsa' caji i suben jini t'an: An cha'tiquil winic ti jump'ejl tejclum. Juntiquil an cabʌl i chubʌ'an, yambʌ wen p'ump'un jax.

² Jini wen chumul bʌ an cabʌl i tiñʌme' yic'ot i wacax.

³ Pero jini p'ump'un bʌ an jach juncojt i yalʌ ña'al tiñʌme' tsa' bʌ i mʌñʌ, tsa' bʌ i cosa. Ya'ʌch tsa' coli ti' yotot yic'ot i yalobilob. Ya'ʌch tsi' c'uxu i bʌl i ñʌc' ti' ch'ejew. Tsi' japʌ ti taza. Tsi' meq'ue. Tsi' c'uxbi che' bajche' mi laj c'uxbin la calobil.

⁴ Tsa' tili winic ti jula' ti' yotot jini wen chumul bʌ winic. Pero i yum jini otot mach yomic i tsʌnsan i tiñʌme' yic'ot i wacax cha'an mi' yʌq'uen i c'ux i jula'. Tsa' majli i chucben i yalʌ ña' tiñʌme' jini p'ump'un bʌ cha'an mi' yʌq'uen i c'ux, che'en Natán.

⁵ David tsi' wen mich'le jini winic tsa' bʌ i ch'ʌmʌ jini tiñʌme'. Tsi' sube Natán: Ti isujm mic subeñet come cuxul lac Yum, an i mul jini winic tsa' bʌ i mele che' bajche' jini. Yom mi' tsʌnsʌntel, che'en.

⁶ Yom mi' q'uextʌben ti chʌncojt tiñʌme' jini tsa' bʌ i ch'ʌmʌ, come ma'anic tsi' p'unta, che'en.

⁷ Che' jini Natán tsi' sube David: Jiñʌch a mul come che'ʌch tsa' mele jatet. Lac Yum i Dios israelob tsi' yʌlʌ: “Joñon tsac wa'chocoyet ti' rey israelob. Tsaj coltayet loq'uel ti' c'ʌb Saúl.

⁸ Tsa cʌq'ueyet a wotot. Tsa'ix cotsa ti a wenta i yijñamob Saúl tsa' bʌ a yuma. Tsa'ix cʌq'ueyet a we'tel ti rey ti Israel yic'ot ti Judá. Mi mach jasʌlic iliyi, mic ñumen aq'ueñet pejtelel chuqui tac yom.

⁹ ¿Chucoch ma'anic tsa' p'isi ti wenta i t'an a Yum? ¿Chucoch tsa' mele chuqui leco ti' tojlel? Come tsa' wʌc'ʌ ti chʌmel Urías jini heteo. Tsa' choco majlel ti tsʌnsʌntel ti' tojlel jini amoñob. Tsa' pʌybe i yijñam.

¹⁰ Jini cha'an mi caj i chʌn ujtel guerra ti a tojlel ti pejtelel ora, come tsa' ts'a'leyon. Tsa' pʌybe i yijñam Urías”, che'en lac Yum.

¹¹ Jiñʌch i t'an lac Yum: “Awilan muq'uix cajel i p'ojlel a wocol ti a wotot. Mi caj c chilbeñet a wijñamob cha'an mic cha' aq'ueñob a pi'ʌlob mu' bʌ caj i pʌyob. Mi caj i ñoltʌlob ti q'uiñil ti pañimil.

¹² Jixcu jatet, tsa' mele iliyi ti mucul, pero joñon mi caj c pʌs ti jamʌl ti' wut pejtelel israelob”. Che' tsi' yʌlʌ lac Yum, che'en Natán.

¹³ David tsi' sube: Tsa'ix c cha'le mulil ti' contra lac Yum, che'en. Natán tsi' sube: Lac Yum tsa'ix i ñusʌbeyet a mul. Ma'anic ma' cajel ti chʌmel.

¹⁴ Pero cha'an tsa' wʌc'ʌ ti ts'a'lentel lac Yum ti' tojlel i contrajob, muq'uix i chʌmel a walobil tsa' bʌ i yila pañimil, che'en.

¹⁵ Tsa' sujti majlel Natán ti' yotot. Lac Yum tsi' yʌq'ue i wocol i yalobil David tsa' bʌ i yʌq'ue jini x'ixic i yijñam bʌ Urías.

¹⁶ David tsi' pejca lac Yum ti oración cha'an mi' lajmel jini ch'iton. Ma'anic chuqui tsi' wis c'uxu David. C'ʌlʌl tsa' ñumi ac'ʌlel, ya' jach ñolol ti to'o lum.

¹⁷ Tsa' majliyob jini xñoxob año' bʌ ti' yotot cha'an mi' techob ch'ojyel David ya' ti lum, pero ma'anic tsi' jac'beyob. Ma'anic tsi' tem c'uxu waj yic'otob.

¹⁸ Ti' wucp'ejlel q'uin tsa' chʌmi jini ch'iton. Jini x'e'telob i cha'an David woliyob ti bʌq'uen. Mach yomobic i tsictesʌben jini rey cha'an chʌmenix i yalobil. Tsi' subeyob i bʌ: Che' cuxul to jini alʌl, mach yomic i jac'beñonla lac t'an. Che' mi lac suben chʌmenix i yalobil, ¿mach ba muq'uic i ñumen ac' i bʌ ti wocol jini rey? che'ob.

¹⁹ Pero David tsi' q'uele woliyobix ti t'an jini x'e'telob i cha'an. Che' jini tsi' ña'ta chʌmenix jini alʌl. Jini cha'an David tsi' c'ajtibeyob: ¿Tsa'ix ba chʌmi alʌl? che'en. Tsi' jac'ʌyob: Tsa'ix cu, che'ob.

²⁰ Tsa' tejchi ch'ojyel David. Tsi' cha'le ts'ʌmel. Tsi' boño i bʌ. Tsi' q'uexta i pislel. Ti wi'il tsa' ochi ti' yotot lac Yum cha'an mi' ch'ujutesan. Tsa' cha' tili ti' yotot. Tsi' c'ajti i bʌl i ñʌc' cha'an mi' c'ux.

²¹ Awilan tsi' c'ajtibeyob jini x'e'telob i cha'an: ¿Bajche' isujm woli a mel che' bajche' jini? che'ob, come che' woli ti ajcʌn jini alʌl, tsa' wen cha'le uq'uel. Ma'anic chuqui tsa' c'uxu. Pero wʌle che' chʌmenix, tsa'ix tejchiyet ch'ojyel cha'an ma' c'ux i bʌl a ñʌc', che'ob.

²² David tsi' jac'ʌ: Isujm tsa'ix c wen mele c pusic'al che' woli to ti ajcʌn jini ch'iton, come tsac ña'ta tic'ʌl mu' to i p'untañon lac Yum cha'an mi' cha' aq'uen i c'oc'lel jini alʌl.

²³ Pero wʌle tsa'ix chʌmi. ¿Chuqui to i ye'tel mic chʌn cha'len ch'ajb? ¿Mejl ba c cha' cuxtesan? Joñon mi caj c majlel baqui majlem, pero mach chʌn mejlix ti tilel tic tojlel, che'en David.

²⁴ Che' jini David tsa' caji i ñuq'uesʌben i pusic'al Betsabé i yijñam. Tsi pi'le. Tsa' caji' cʌntan i yalobil. Tsi' yʌc'ʌ ti pañimil i yalobil. Tsi' yotsʌbe i c'aba' Salomón. Awilan lac Yum tsi' wen c'uxbi jini ch'iton.

²⁵ Lac Yum tsi' cha' choco majlel jini x'alt'an Natán cha'an mi' yotsʌben i c'aba' Jedidías, cha'an c'ux tsi' yubi lac Yum.

David tsi' chucu Rabá

²⁶ Ti jim bʌ ora Joab tsi' cha'le guerra ti' contra jini amoñob. Tsi' ch'ʌmʌ jini colem tejclum i c'aba' Rabá ba' chumul i rey.

²⁷ Tsi' choco majlel suboñel ba'an David. Tsi' sube: Tsa'ix c ch'ʌmʌ jini ts'ʌmʌl bʌ ja' am bʌ ti Rabá.

²⁸ Yom ma' tempan pejtelel jini soldadojob ya' to bʌ añob a wic'ot cha'an ma' tilel ti' contra Rabá cha'an ma' ch'ʌm. Mach yomic mic ch'ʌm joñon ame muq'uic i q'ueloñob ti ñuc, che'en.

²⁹ Che' jini David tsi' laj tempa jini winicob. Tsi' pʌyʌyob majlel ti' contra Rabá. Tsi' chʌn cha'leyob guerra jinto tsa' mʌjli i cha'an David. Tsi' ch'ʌmʌ ti' wenta jini tejclum.

³⁰ David tsi' loc'sʌbe i corona jini rey. An i yalel che' bajche' jump'ejl talento oro. An ja'el pʌc'bil bʌ ujʌl ti corona wen i t'ojol bʌ, letsem tac bʌ i tojol. Tsa'ix aq'uenti i c'ʌc David. Ti jini q'uin an cabʌl chuqui tsi' loc'o David ya' ti tejclum.

³¹ Tsi' choco loq'uel jini chumulo' bʌ ti tejclum. Tsa' caji i c'ʌñob ti e'tel ti pic lum yic'ot ti p'el te' yic'ot fierro bʌ e'tijibʌl tac. Tsi' yʌq'ueyob ja'el i ye'tel cha'an mi' pulob ladrillo. Che'ʌch tsi' melbeyob jini amoñob ti pejtelel i tejclum. Che' jini David tsa' cha' sujti ti Jerusalén yic'ot pejtelel i winicob.