2 Samuel 1 - Chol: I T’an Dios

David tsi' yubi chʌmenix Saúl

¹ Che' bʌ tsi' cha'le guerra David ti' contra amalecob, tsa' mʌjli i cha'an. Tsa' jijli cha'p'ejl q'uin ya' ti Siclag.

² Che' anix uxp'ejl q'uin i chʌmel Saúl, tsa' tili juntiquil winic tsa' bʌ loq'ui ba' tempʌbilob Saúl yic'ot i winicob. Laj tsijlem i bujc, an ts'ubejn ti' jol. Tsa' c'oti ba'an David. Tsi' pʌcchoco i bʌ.

³ David tsi' c'ajtibe: ¿Baqui tilemet? che'en. Tsa' mejliyon ti puts'el ti' tojlel jini soldadojob israelo' bʌ, che'en.

⁴ David tsi' sube: ¿Chuqui tsa' ujti? A wocolic yom ma' subeñon, che'en. Jini winic tsi' jac'ʌ: Pejtelel winicob tsa' laj puts'iyob. Chʌmenobix cabʌl winicob. Tsa'ix chʌmiyob ja'el Saúl yic'ot Jonatán i yalobil, che'en.

⁵ David tsi' sube jini winic tsa' bʌ tili i tsictesʌben chuqui tsa' ujti: ¿Bajche' ma' ña'tan mi tsa'ix chʌmi Saúl yic'ot i yalobil Jonatán? che'en.

⁶ Jini winic tsi' jac'ʌ: Come loq'uemonix ti Gilboa ba' tsac taja Saúl, ñuc ye'el i cha'an i lanza. Woli' tilel carreta tac ti' contra yic'ot winicob c'ʌchʌlo' bʌ ti caballo.

⁷ Saúl tsi' sutq'ui i wut ti' pat, tsi' q'ueleyon. Tsi' pʌyʌyon. “Wʌ' añon”, cho'on tsac jac'ʌ.

⁸ Tsi' c'ajtibeyon: “¿Majquiyet?” che'en. Tsac jac'ʌ: “Joñon amalecon”, cho'on.

⁹ Che' jini tsi' subeyon: “Mic subeñet ti wocol t'an, yom ma' tilel tic tojlel cha'an ma' tsʌnsañon. Cuxulon to, pero ts'ita jax yom cha'an mic chʌmel”, che'en.

¹⁰ Jini cha'an tsac ñochta, tsac tsʌnsa, come tsac ña'ta mach mejlix ti chʌn cuxtʌyel che' lojwemix. Jini cha'an tsac jochbe i corona am bʌ ti' jol yic'ot jini xotol bʌ am bʌ ti' c'ʌb. Wʌ'ix an. Tsac ch'ʌmbeyet tilel, c yum, che'en.

¹¹ Che' bʌ tsi' yubi iliyi, David tsi' jet' tsili i bujc. Che'ʌch tsi' meleyob ja'el pejtelel i winicob.

¹² Tsi' cha'leyob uq'uel. Tsi' wen meleyob i pusic'al. Ma'anic chuqui tsi' c'uxuyob. Ma'anic chuqui tsi' japʌyob c'ʌlʌl tsa' ochi ac'ʌlel cha'an tsʌnsʌbilobix ti guerra Saúl yic'ot Jonatán i yalobil Saúl, yic'ot jini israelob i cha'año' bʌ lac Yum.

¹³ David tsi' sube jini winic tsa' bʌ i tsictesʌbe jini t'an: ¿Baqui ch'oyolet? che'en. Tsi' jac'ʌ: Ch'oyolon ti' lumal jini amalecob, che'en.

¹⁴ David tsi' sube: ¿Mach ba anic ma' bʌc'ñan Dios? ¿Bajche' tsa' mejli a tsʌnsan jini winic yajcʌbil bʌ i cha'an lac Yum? che'en.

¹⁵ Jini cha'an David tsi' pʌyʌ tilel juntiquil soldado. Tsi' sube: Tsʌnsan jini winic, che'en. Jini soldado tsi' jats'ʌ jini winic, tsi' tsʌnsa.

¹⁶ David tsi' sube: La' ajnic ti a wenta a bajñel ch'ich'el. Come tsa'ix a wʌlʌc subu a bʌ cha'an tsa' tsʌnsa jini winic yajcʌbil bʌ i cha'an lac Yum.

David tsi' yuc'ta Saúl yic'ot Jonatán

^17-18 David tsi' wen cha'le uq'uel cha'an tsa' chʌmi Saúl yic'ot Jonatán i yalobil Saúl. Tsi' yʌc'ʌ mandar cha'an mi' cʌntesʌntelob pejtel año' bʌ ti Judá jini c'ay ts'ijbubil bʌ ti' juñilel Jaser:

¹⁹ Tsa'ix jili i ñuclel jini israelob ti' joytʌlel. Tsa'ix jiliyob jini ch'ejl bʌ winicob.

²⁰ Mach yomic mi la' tsictesan ya' ti Gat Yic'ot ya' ti tejclum Ascalón, Ame tijicñayic mi yubiñob jini filisteojob, Ame mi' tse'tañonla jini winicob mach bʌ anic mi' cʌñob Dios.

²¹ P'ump'un jax jini wits tac am bʌ ti Gilboa, Mach chʌn talix ja'al yic'ot tijil ti pejtelel q'uin. Mach i chʌn ac' i wut jini lum ti a witsilel. Come ya'i tsa' bib'esʌnti i mʌctijib jini p'ʌtʌlo' bʌ. Tsa'ix jili i yumʌntel Saúl, wa'chocobil bʌ ti Dios.

²² Jini jalʌjb i cha'an bʌ Jonatán tsi' wen tsʌnsa i contra ti pejtelel ora. Tsi' loc'sʌbe i ch'ich'el winicob. Jini i yespada Saúl ma'anic ba' ora tsa' to'o sujti ti' yotot.

²³ Wen p'untʌbilob Saúl yic'ot Jonatán. Wen c'uxbibilob ja'el. Ma'anic tsi' wis t'oxoyob i bʌ c'ʌlʌl che' bʌ tsa' chʌmiyob. Ñumen sejbob ti xʌmbal bajche' xiye'. Ñumen p'ʌtʌlob bajche' bajlum.

²⁴ X'ixicob ti Israel, uc'tanla Saúl, tsa' bʌ i wen ch'ʌlʌyetla ti la' pislel yic'ot ti oro.

²⁵ Q'uelela bajche' tsa' jiliyob jini ch'ejl bʌ winicob ti guerra. P'ump'un jax tsa' chʌmi Jonatán.

²⁶ Wen ch'ijyem jax c pusic'al, c'uxbibil bʌ quermano Jonatán. Ñumen c'ux tsa cubi a c'uxbiya bajche' i c'uxbiya x'ixicob.

²⁷ Tsa'ix jiliyob jini ch'ejl bʌ winicob. Tsa'ix jisʌntiyob i ye'tijib ti guerra. Che'ʌch ts'ijbubil ti' juñilel Jaser.