2 Reyob 7 - Chol: I T’an Dios

¹ Eliseo tsi' jac'ʌ: Ubin i t'an lac Yum: “Ijc'ʌl che' bajche' ili ora mi caj i tojtʌl jini ojlil lata harina yic'ot jump'ejl lata cebada ti lajchʌmp'ejl peso ya' ti' ti' Samaria”, che'en.

² Juntiquil am bʌ i ye'tel mu' bʌ i coltan jini rey tsi' sube i winic Dios: A lot. Muq'uic i yʌc' i t'an lac Yum ti panchan cha'an mi' yujtel che' bajche' jini, mach ts'ʌctiyic, che'en. Eliseo tsi' sube: Mu'to caj a q'uel che' mi' yujtel, pero jatet ma'anic mi caj a c'ux, che'en.

³ Ya' ti' ti' jini tejclum Samaria tsi' pejcayob i bʌ chʌntiquil winicob año' bʌ leco bʌ i tsoy. Tsi' yʌlʌyob: ¿Chucoch mi lac to'ol ñusan q'uin ilayi c'ʌlʌl mi lac chʌmel ti wi'ñal?

⁴ Muq'uic la cochel ti tejclum, mi lac chʌmel ja'el ti wi'ñal. Conla ba' tempʌbilob jini siriajob. La'ix la cʌc' lac bʌ ti' wenta. Mi ma'anic mi' tsʌnsañonla, cuxul mi la cajñel, pero mi tsi' tsʌnsayonla, la'ix chʌmiconla, che'ob.

⁵ Che' wolix i yochel ac'ʌlel, tsa' cajiyob ti majlel ya' ba' tempʌbilob jini siriajob. Che' bʌ tsa' c'otiyob, ma'anic majqui ya'an mi juntiquilic.

⁶ Come lac Yum tsi' yʌq'ueyob jini siriajob i yubiñob i t'an tac carreta yic'ot i yuq'uel caballo, yic'ot i t'an bajc'ʌl winicob. Che' bʌ tsi' yubiyob tsa' caji i subeñob i bʌ jini siriajob: Awilan jini rey ti Israel tsa'ix i pʌyʌ tilel jini heteojob yic'ot jini egiptojob cha'an mi' jisañonla ti guerra, che'ob.

⁷ Tsa' toj sajtiyob i pusic'al. Tsa' puts'iyob. Tsi' laj cʌyʌyob jini pisil bʌ i yototob, yic'ot i caballo, yic'ot i burro, yic'ot pejtelel i chubʌ'an. Ñajt tsa' majliyob ti puts'el.

⁸ Che' bʌ tsa' c'otiyob jini stsoyob ya' ba' tsa' jijliyob jini siriajob, tsa' cajiyob ti ochel ti jujump'ejl pisil bʌ otot. Tsi' cha'leyob we'el uch'el. Tsi' ch'ʌmʌyob loq'uel oro yic'ot plata yic'ot bujcʌl tac. Tsa' majli i mucob jini chubʌ'añʌl. Tsa' cha' sujtiyob cha'an yambʌ i cuch.

⁹ Che' jini tsa' caji i yʌlob: Mach uts'atic chuqui woli lac mel. Wolix lac bajñel taj i tijicñʌyel lac pusic'al. Yom mi lac t'oxben lac pi'ʌlob. Mi tsa' lac mucu c'ʌlʌl mi' sʌc'an, che' jini bʌbʌq'uen mi lac taj wocol. Jini cha'an conla c suben jini rey chuqui tsa' ujti, che'ob.

¹⁰ Jini cha'an tsa' majli i subeñob jini xcʌnta tejclumob. Tsi' yʌlʌyob: Tsajniyonix lojon ya' ba' tsa' jijliyob jini siriajob. Awilan ma'anic tsiquil mi juntiquilic soldado. Cojach ya' cʌchʌl jini caballo yic'ot burro. Tsi' laj cʌyʌyob i chubʌ'an ti' yotot. Ñʌch'ʌcña pañimil, che'ob.

¹¹ Jini xcʌnta tejclumob tsa' majli i tsictesʌbeñob rey ti c'am bʌ t'an.

¹² Wen ic'to tsa' ch'ojyi jini rey. Che' bʌ tsi' yubi chuqui tsa' ujti, tsi' sube jini x'e'telob i cha'an: Mux caj c subeñetla chuqui tsi' melbeyonla jini siriajob. Yujilob woliyonla ti wi'ñal. Jini cha'an tsa'ix poj loq'uiyob ti' yotot. Tsa'ix majliyob ti mate'el ba' woli' chijtañonla. Ba' ora mi lac loq'uel majlel mi caj i tsʌnsañonla. Che' jini mi caj i yochelob ti lac tejclum, che'en.

¹³ Juntiquil x'e'tel i cha'an tsi' sube: Yom mi lac choc majlel xq'uelojelob yic'ot jo'cojt caballo anto bʌ lac cha'an wʌ' ti tejclum. Mi ma'anic mi' tsʌnsʌntelob, che' jini junlajalob che' bajche' joñonla, pero mi tsa' jiliyob junlajalob che' bajche' jini israelob tsa' bʌ chʌmiyob. Jini cha'an la' lac chocob majlel cha'an mi laj q'uel mi isujm, che'en.

¹⁴ Jini cha'an tsi' chocoyob majlel cha'tiquil xñijca carretajob yic'ot chʌncojt caballo cha'an mi' q'uelob mi isujm tsa'ix majliyob jini siriajob.

¹⁵ Tsajni i sajcañob majlel c'ʌlʌl ti Jordán ja'. Pejtelel jini bij pam pujquem ti bujcʌl tac yic'ot ti chubʌ'añʌl tsa' bʌ i chocoyob jini siriajob. Che' bʌ tsi' q'ueleyob, tsa' bʌc' sujtiyob cha'an mi' subeñob jini rey.

¹⁶ Tsa' caji' loq'uelob majlel pejtelel chumulo' bʌ ti Samaria. Tsi' laj cuchbeyob sujtel i chubʌ'an jini siriajob. Tsa' caji i choñob ojlil lata i nich harina ti lajchʌmp'ejl peso yic'ot jump'ejl lata cebada ti lajchʌmp'ejl peso che' bajche' tsi' yʌlʌ lac Yum.

¹⁷ Jini rey tsi' wa'choco cʌytʌl ti' ti' jini tejclum jini winic am bʌ i ye'tel cha'an mi' coltan. Che' jini tsa' caji' cʌntan i trancajlel jini tejclum. Jini xñumelob ñet'ecña bʌ woli' loq'uelob ti tejclum tsi' chocoyob. Tsi' t'uchtayob ya' ti' ti' tejclum. Che' jini tsa' chʌmi. Tsa' tsʌnsʌnti che' bajche' tsi' subu i winic Dios che' bʌ tsa' majli i chuc.

¹⁸ Che' jini tsa' ts'ʌctiyi i t'an jini x'alt'an tsa' bʌ i yʌlʌ: “Juben i tojol mi caj i chojñel jini harina yic'ot cebada che' ti yijc'ʌlal”.

¹⁹ Jini am bʌ i ye'tel cha'an mi' coltan jini rey tsi' jac'ʌ, pero ma'anic tsi' ñopo. Tsi' yʌlʌ: “Muq'uic i yʌc' i t'an lac Yum ti panchan cha'an mi' yujtel che' bajche' jini, mach ts'ʌctiyic”, che'en. Pero Eliseo tsi' sube: “Mu'to caj a q'uel che' mi' yujtel, pero jatet ma'anix mi caj a c'ux”, che'en.

²⁰ Che'ʌch tsa' ujti, come jini winicob tsi' chocoyob che' woliyob ti loq'uel ya' ti' ti' jini tejclum. Che' jini tsa' chʌmi.