2 Reyob 24 - Chol: I T’an Dios

¹ Che' woli ti yumʌl Joacim tsa' tili ti guerra Nabucodonosor rey bʌ ti Babilonia. Joacim tsa' ochi ti' wenta. Pero che' ñumenix uxp'ejl jab, tsa' caji i tʌts' i bʌ ti' contra Nabucodonosor.

² Lac Yum tsi' choco tilel cabʌl soldadojob: caldeojob, siriajob, moabob yic'ot amoñob cha'an mi' jisañob Judá, cha'an mi' ts'ʌctiyel i t'an lac Yum che' bajche' tsi' subeyob jini x'alt'añob.

³ Isujm tsa' tili ili wocol ti' tojlel Judá cha'an ti' t'an lac Yum, come tsi' ña'ta i jisan jini año' bʌ ti Judá cha'an ti' caj i mul Manasés.

⁴ Come Manasés tsi' tsʌnsa cabʌl winicob mach bʌ añobic i mul ya' ti Jerusalén. Lac Yum ma'anic tsi' ñusʌbe i mul.

⁵ Ts'ijbubil ti' juñilel i reyob Judá pejtel i melbal Joacim.

⁶ Tsa' chʌmi Joacim. Tsa' caji ti yumʌntel Joaquín ti' q'uexol i tat.

⁷ Jini rey ti Egipto ma'anix tsa' chʌn tili ti guerra ti' contra Judá. Come jini rey ti Babilonia tsi' jisʌbe i p'ʌtʌlel. Tsi' ch'ʌmʌ pejtelel jini lum am bʌ ti' wenta Egipto ya' ti colem ja' ti Egipto c'ʌlʌl ti colem ja' i c'aba' Eufrates.

Tsa' pʌjyiyob majlel ti Babilonia

⁸ An waxʌclujump'ejl (18) i jabilel Joaquín che' bʌ tsa' caji ti yumʌntel ti Judá. Uxp'ejl uw tsi' cha'le yumʌl ti Jerusalén. I ña' jiñʌch Nehusta i yalobil Elnatán, ch'oyol bʌ ti Jerusalén.

⁹ Wen jontol chuqui tsi' cha'le ti' wut lac Yum che' bajche' tsi' mele i tat.

¹⁰ Tsa' tili i contrajiñob Jerusalén i soldadojob jini rey Nabucodonosor rey bʌ ti Babilonia. Tsi' joy mʌctayob Jerusalén.

^11-12 Che' joyol Jerusalén ti soldadojob tsa' c'oti jini rey Nabucodonosor loq'uem bʌ ti Babilonia. Joaquín, jini rey ti Judá, yic'ot i ña', yic'ot x'e'telob i cha'an, yic'ot jini ñuco' bʌ i ye'tel, tsi' yʌc'ʌyob i bʌ ti' wenta i rey Babilonia. Che' waxʌcp'ejl jab i ye'tel jini rey ti Babilonia, tsa' cʌjchi majlel Joaquín.

¹³ Tsi' loc'sa pejtel letsem tac bʌ i tojol am bʌ ti' yotot lac Yum, yic'ot jini taq'uin am bʌ ti' yotot rey. Tsi' laj bic'ti xut'u jini oro am bʌ ti' yotot lac Yum tsa' bʌ i mele Salomón i rey israelob.

¹⁴ Nabucodonosor tsi' pʌyʌ majlel pejtel jini año' bʌ ti Jerusalén, pejtel ñuco' bʌ i ye'tel, yic'ot jini ch'ejl bʌ soldadojob, yic'ot pejtel wen yujilo' bʌ e'tel. Lujump'ejl mil ti pejtelob. Cojach tsa' cʌleyob jini p'ump'uño' bʌ winicob x'ixicob.

¹⁵ Tsi' cʌchʌ majlel Joaquín ti Babilonia yic'ot i ña', yic'ot i yijñam, yic'ot i pi'ʌlob ti e'tel, yic'ot ñuco' bʌ i ye'tel ti jini lum.

¹⁶ Tsi' pʌyʌ majlel ja'el wucp'ejl mil soldadojob wen ch'ejlo' bʌ yic'ot lujunc'al i yuxbajc' (1,000) yujilo' bʌ e'tel ti te' yic'ot ti tsucu taq'uin. Jini rey ti Babilonia tsi' laj pʌyʌyob majlel.

¹⁷ Tsi' wa'choco ti rey yambʌ i yalobil Josías i c'aba' Matanías ti' q'uexol Joaquín. Tsi' q'uextʌbe i c'aba' ti Sedequías. Sedequías i yumijelʌch Joaquín.

Tsa' jisʌnti i yumʌntel Judá

^18-19 An jump'ejl i cha'c'al (21) i jabilel Sedequías che' bʌ tsa' caji ti yumʌntel. Junlujump'ejl jab tsi' cha'le yumʌl ti Jerusalén. I c'aba' i ña' jiñʌch Hamutal i yixic'al Jeremías am bʌ ti Libna. Tsi' mele jontolil ti' tojlel lac Yum che' bajche' tsi' mele jini rey Joacim.

²⁰ Cabʌl tsa' tejchi i mich'ajel lac Yum ti' tojlel jini año' bʌ ti Jerusalén yic'ot ti Judá. Jini cha'an tsi' chocoyob loq'uel ti' tojlel. Jini rey Sedequías tsa' caji i contrajin jini rey am bʌ ti Babilonia.