2 Reyob 23 - Chol: I T’an Dios

Wen bʌx Josías ti' tojlel Dios

^1-2 Che' bʌ tsi' yubi jini rey, tsi' choco ti pʌyol pejtelel jini xñoxob año' bʌ ti Judá yic'ot ti Jerusalén. Temel tsa' majliyob ya' ti' Templo lac Yum, jini rey yic'ot motomajob yic'ot x'alt'añob, yic'ot pejtelel tejclum tac, jini ch'o'ch'oc bʌ yic'ot jini ñuco' bʌ. Che' tempʌbilob, jini rey tsa' caji i pejcañob pejtel jini xuc'ul bʌ t'an am bʌ ti jun tsa' bʌ tajle ya' ti' yotot lac Yum.

³ Tsa' wa'le jini rey ya' ti' tojel oy ti' tojlel winicob x'ixicob. Ti pejtelelob tsi' yʌc'ʌyob i t'an ti' tojlel lac Yum cha'an mi caj i wen tsajcañob, mi caj i wen jac'beñob pejtel i mandar.

⁴ Jini rey tsi' sube jini ñuc bʌ motomaj Hilcías yic'ot yambʌ motomajob yic'ot xcʌntayajob ti Templo cha'an mi' jisañob pejtelel jini e'tijibʌl tac tsa' bʌ i melbeyob Baal, yic'ot jini dios Asera, yic'ot jini q'uin, yic'ot uw, yic'ot ec' tac. Tsi' laj puluyob ya' ti junwejl Jerusalén ya' ti joctʌl i c'aba' Cedrón. Tsi' ch'ʌmbeyob majlel i tʌñil ya' ti Betel.

⁵ Josías tsi' choco loq'uel jini motomajob tsa' bʌ i ch'ujutesayob dioste' tac. Yambʌ reyob ti Judá tsi' wa'chocoyob cha'an mi' pulob pom ya' ti bujbujtʌl ti pejtelel Judá yic'ot ti Jerusalén. Tsi' pulbeyob pom Baal, yic'ot jini q'uin, yic'ot jini uw, yic'ot pejtel jini ec'.

⁶ Josías tsi' loc'sa ti' Templo lac Yum jini melbil bʌ dios Asera quisintic jax bʌ ti q'uelol. Tsi' ch'ʌmʌ majlel ti ja' i c'aba' Cedrón ba' tsi' pulu ya' ti junwejl Jerusalén. Tsi' cuju jinto tsa' sujti ti ts'ubejn. Tsi' choco i ts'ubeñal ya' ti campo santo ba' muculob jini mach bʌ i pi'ʌlobic.

⁷ Tsi' jisa ja'el pejtel otot an tac bʌ ti' joytʌlel Templo ba' tsi' cha'leyob i ts'i'lel winicob ya' ba' mi' jalbeñob i mosil jini dios Asera x'ixicob.

⁸ Tsi' choco ti pʌyol i motomajob lac Yum pujquemo' bʌ ti' tejclum tac Judá cha'an mi' tilelob ti chumtʌl ti Jerusalén. Tsi' jeme jini bujbujtʌl ba' tsi' puluyob pom jini motomajob ti Geba c'ʌlʌl ti Beerseba. Tsi' jeme ja'el jini pulʌntib tac ya' ti' yochibʌl i yotot Josué jini gobernador ti jini tejclum. An ti lac ts'ej che' mi la cochel ti' ti' jini tejclum.

⁹ Jini motomajob ma'anic tsi' cha'leyob i ye'tel ya' ba' mi' pulbentel i majtan lac Yum ti Jerusalén, pero tsi' pi'leyob ti c'ux waj jini motomajob ti Jerusalén.

¹⁰ Josías tsi' jembe i pulʌntib jini dios Tofet, am bʌ ti joctʌl i cha'an bʌ i yalobilob Hinom. Che' jini ma'anix majch tsa' chʌn mejli i pul i yalobil cha'an i majtan Moloc.

¹¹ Tsi' jisa jini caballo yic'ot carreta tac tsa' bʌ i yʌc'ʌyob jini reyob ti Judá cha'an i ch'ujutesʌntel jini q'uin ya' ba' mi la cochel ti' Templo lac Yum, lʌc'ʌl ba' mi' wʌyel Natán Melec juntiquil x'e'tel i cha'an rey. Tsi' pulu jini carreta tac.

¹² Josías tsi' jeme ja'el jini pulʌntib tac tsa' bʌ i meleyob i reyob Judá ya' ti' jol i yotot rey ti' chañelal i tsalʌl Acaz. Tsi' jeme ja'el jini cha'p'ejl pulʌntib tsa' bʌ i wa'choco Manasés am bʌ ti jini cha'p'ejl patio ti' Templo lac Yum. Tsi' bic'ti top'o. Tsi' choco majlel i xejt'il tac ya' ti joctʌl i c'aba' Cedrón.

¹³ Tsi' jisa ja'el i yotlel dioste' tac am bʌ ti bujbujtʌl ti' tojel Jerusalén ya' ba' mi' pasel q'uin yic'ot ya' ti sur. Salomón tsi' melbe i yotlel Astoret i dios jini sidoñob ts'a'lebil bʌ ti Dios, yic'ot i yotlel Quemos i dios Moab, ts'a'lebil bʌ ti Dios, yic'ot i yotlel Milcom i dios amoñob, ts'a'lebil bʌ ti Dios.

¹⁴ Josías tsi' laj xulu pejtel i yoyel tac yic'ot i yejtal tac dios quisintic jax bʌ ti q'uelol. Ya' ba' tsi' boco loq'uel ti lum tsi' choco ochel i bʌquel ch'ujlelʌl.

¹⁵ Tsi' jeme jini pulʌntib am bʌ ti bujtʌl ya' ti Betel tsa' bʌ i wa'choco Jeroboam, i rey Israel tsa' bʌ i yʌsa ti mulil israelob. Josías tsi' sutq'ui ti ts'ubejn jini xajlel tac. Tsi' pulu i yejtal tac Asera jini quisintic jax bʌ dios.

¹⁶ Che' bʌ tsi' sutq'ui i bʌ Josías, tsi' q'uele mucoñibʌl ya' ti wits. Tsi' choco ti ch'ʌjmel tilel jini bac tac. Tsi' pulu ya' ti pulʌntib am bʌ ti Betel. Che' jini tsa' ts'ʌctiyi i t'an lac Yum che' bajche' tsi' wʌn subu i winic Dios.

¹⁷ Josías tsi' c'ajti: ¿Majqui i cha'an jini mucoñibʌl am bʌ i ts'ajquil? che'en. Jini chumulo' bʌ ti tejclum tsi' jac'ʌyob: Jiñʌch i mucoñibʌl i winic Dios ch'oyol bʌ ti Judá. Tsi' wʌn subu che'ʌch mi caj a mel che' bajche' tsa' ujti a mel ti' tojlel i pulʌntib Jeroboam wʌ' ti Betel, che'en.

¹⁸ Josías tsi' jac'ʌ: La' to ajnic. Mach la' ñijcan i bʌquel, che'en. Jini cha'an ma'anic tsi' tic'layob i bʌquel ya' ba' mucul yic'ot i bʌquel jini x'alt'an ch'oyol bʌ ti Samaria.

¹⁹ Josías tsi' jisa pejtelel i yotlel dioste' tac am bʌ ti bujbujtʌl ti Samaria, i melbal i reyob Israel tsa' bʌ i techbeyob i mich'ajel lac Yum. Lajal tsi' mele Josías ti Samaria che' bajche' ti Betel.

²⁰ Tsi' tsʌnsa pejtel i motomajob dios tac ya' ti' pulʌntib i dios. Ya' tsi' pulbeyob i bʌquel winicob. Che' ujtemix tsa' cha' sujti ti Jerusalén.

Josías tsi' mele i q'uiñilel Pascua

²¹ Josías tsi' yʌc'ʌ mandar cha'an mi' melob i q'uiñilel Pascua che' bajche' ts'ijbubil ti' juñilel jini xuc'ul bʌ t'an.

²² Ma'anic yambʌ Pascua lajal bajche' jini ti' tojlel jini juezob ti Israel mi ti' tojlel yambʌ rey ti Judá c'ʌlʌl wʌle.

²³ Tsi' meleyob jini Pascua ya' ti Jerusalén che' ti' waxʌclujump'ejlel (18) jab i yumʌntel Josías.

I mich'ajel lac Yum ti' contra Judá

²⁴ Josías tsi' laj jisa jini xwujtob, yic'ot xch'ʌcojelob yic'ot xtic'layajob, yic'ot dioste' tac, yic'ot pejtelel chuqui bibi' jax ti q'uelol ya' ti Judá yic'ot ti Jerusalén. Come Josías tsi' ñopo i mel pejtel jini mandar ts'ijbubil bʌ ti jini jun tsa' bʌ i taja ti' Templo lac Yum jini ñuc bʌ motomaj Hilcías.

²⁵ Ma'anic yambʌ rey che' bajche' Josías tsa' bʌ i yʌc'ʌ i bʌ ti' wenta lac Yum ti pejtelel i pusic'al, ti pejtelel i ña'tʌbal, ti pejtelel i p'ʌtʌlel, che' bajche' ts'ijbubil ti' mandar Moisés. Ma'anic yambʌ lajal bʌ ti' tojlel i ñojte'elob mi ti' tojlel i yalobilob.

²⁶ Pero ma'anic tsa' lajmi i mich'ajel lac Yum ti' contra Judá, cha'an ti' caj pejtel jini leco tac bʌ i melbal Manasés.

²⁷ Come lac Yum tsi' yʌlʌ: Mi caj c choc loq'uel Judá tic tojlel che' bajche' tsac choco loq'uel Israel. Mi caj c junyajlel cʌy Jerusalén tsa' bʌ c yajca yic'ot jini Templo ba' tsac tsictesa i ñuclel j c'aba'.

Tsa' chʌmi Josías

²⁸ Ts'ijbubil ti' juñilel i reyob Judá pejtel i melbal Josías.

²⁹ Ti jim bʌ ora Necao jini rey ti Egipto tsa' majli i contrajin jini rey ti Asiria ya' ti colem ja' i c'aba' Eufrates. Josías tsa' majli i taj jini rey ti Egipto ti' bijlel Asiria. Jini rey Necao tsi' tsʌnsa ya' ti Meguido che' bʌ tsi' q'uele.

³⁰ I winicob Josías tsi' ñolchocobeyob i bʌc'tal ti' mal carreta ba' tsa' chʌmi. Tsi' pʌyʌyob sujtel ti Jerusalén. Tsi' mucuyob ti mucoñibʌl yajcʌbil bʌ i cha'an. Jini tejclumob tsi' yajcayob Joacaz i yalobil Josías. Tsi' wa'chocoyob ti rey ti' q'uexol i tat.

I yumʌntel Joacaz

^31-32 An uxp'ejl i cha'c'al (23) i jabilel Joacaz che' bʌ tsa' caji ti yumʌntel ti Judá. Uxp'ejl uw tsi' cha'le yumʌl ti Jerusalén. I c'aba' i ña' jiñʌch Hamutal i yalobil Jeremías ch'oyol bʌ ti Libna. Tsi' mele jontolil ti' wut lac Yum che' bajche' tsi' meleyob i ñojte'elob.

³³ Jini Faraón Necao tsi' chilbe i ye'tel Joacaz ya' ti Jerusalén. Cʌchʌl tsi' pʌyʌ majlel ya' ti Ribla ti' lumal Hamat. Necao tsi' c'ajtibeyob multa jini año' bʌ ti Judá, uxp'ejl millón peso.

³⁴ Necao jini rey ti Egipto, tsi' yotsa ti rey ti Jerusalén jini Eliaquim (i yalobil Josías). Tsi' q'uextʌbe i c'aba' ti Joacim. Joacaz jini ascuñʌl bʌ tsa' pʌjyi majlel ti Egipto ba' tsa' chʌmi.

³⁵ Joacim tsi' c'ajtibeyob tojoñel i winicob ti pejtelel Judá cha'an mi' yʌq'uen Faraón Necao.

I yumʌntel Joacim

^36-37 An jo'p'ejl i cha'c'al (25) i jabilel Joacim che' bʌ tsa' caji ti yumʌntel ti Judá. Junlujump'ejl jab tsi' cha'le yumʌl ti Jerusalén. I ña' jiñʌch Zebuda i yalobil Pedaías ch'oyol bʌ ti Ruma. Joacim tsi' mele jontolil ti' wut lac Yum che' bajche' tsi' meleyob i ñojte'elob.