2 Reyob 22 - Chol: I T’an Dios

I yumʌntel Josías

^1-2 An waxʌcp'ejl i jabilel Josías che' bʌ tsi' teche i yumʌntel ti Judá. Junlujump'ejl i cha'c'al (31) jab tsi' cha'le i yumʌntel. I ña' jiñʌch Jedida (i yalobil Adaía ch'oyol bʌ ti Boscat). Uts'at chuqui tsi' mele Josías ti' wut lac Yum. Tsi' tsajcʌbe i melbal jini rey David i ñojte'el. Ts'ʌcʌl tsi' jac'be i t'an lac Yum.

Tsa' tajle i juñilel mandar

^3-4 Che' waxʌcp'ejl jab i ye'tel Josías, tsi' choco majlel Safán jini sts'ijbujel ya' ti Templo. Safán jiñʌch i yalobil Azalía i yalobil bʌ Mesulam. Tsa' chojqui majlel cha'an mi' suben jini ñuc bʌ motomaj Hilcías: “Yom abi ma' tempan jini taq'uin tsa' bʌ i yʌc'ʌyob winicob x'ixicob ya' ti' ti' Templo cha'an i majtan Dios. Ulmesan.

^5-6 Aq'ueñob jini año' bʌ ti' wenta cha'an mi' cha' wen mejlel jini Templo, cha'an mi' tojob jini xjuc'te'ob yic'ot albañilob. La' i mʌñob te' ja'el yic'ot xajlel.

⁷ Mach ma' cha' c'ajtibeñob bajche' tsa' jili jini taq'uin mu' bʌ a wʌq'ueñob, come toj mi' melob, uts'atob i pusic'al”. Che'ʌch yom ma' suben jini ñuc bʌ motomaj, che'en Josías.

⁸ Safán tsi' mele che' bajche' tsa' subenti. Jini ñuc bʌ motomaj Hilcías tsi' sube jini sts'ijbujel Safán: Tsac taja jun ti Templo ba' ts'ijbubil i mandar Dios, che'en. Hilcías tsi' yʌq'ue jini jun. Safán tsi' wen q'uele.

^9-10 Tsa' majli ba'an jini rey cha'an mi' suben bajche' woli' yujtel jini e'tel ti Templo. Tsi' sube: Jini taq'uin tsa' bʌ i yʌc'ʌyob winicob x'ixicob tsa'ix ajq'ui ti' wenta jini x'e'telob. Jini ñuc bʌ motomaj tsi' yʌq'ueyon jun tsa' bʌ i taja ti Templo, che'en. Che' jini Safán tsa' caji i pejcan jini jun ti' tojlel jini rey.

¹¹ Jini rey tsi' wen ubi pejtel jini t'an am bʌ ti' juñilel jini mandar. Tsi' jet' tsili i bujc cha'an bʌq'uen.

¹² Jini rey tsi' yʌq'ue mandar jini motomaj Hilcías, yic'ot jini sts'ijbaya Safán yic'ot Asaía i yaj e'tel rey yic'ot Ahicam (i yalobil Safán) yic'ot Acbor (i yalobil Micaías).

¹³ Tsi' subeyob: Cucula c'ajtiben lac Yum chuqui yom mic mel cha'an mi' coltʌntelob pejtel jini tejclumob ti pejtelel Judá. Ma'anic tsa' lac jac'be i mandar ili jun. Ma'anic tsi' jac'ʌyob lac ñojte'el ja'el. Jini cha'an wen mich' lac Yum. Che' tsi' yʌlʌ Josías.

¹⁴ Jini cha'an tsa' majli jini motomaj: Hilcías, Ahicam, Acbor, Safán yic'ot Asaía cha'an mi' pejcañob jini x'ixic bʌ x'alt'an i c'aba' Hulda. Jiñʌch i yijñam Salum (i yalobil Ticva, i yalobil bʌ Harhas) jini xcʌnta bujcʌl ti' yotot rey. Tsi' tajayob ti Jerusalén ti junwejl Templo ba' mi' bʌjlel q'uin.

^15-16 Hulda tsi' subeyob i t'an lac Yum, i Dios Israel: Subenla la' rey tsa' bʌ i chocoyetla tilel ba' añon: “Lac Yum woli' yʌl: Joñon mi caj c jisan ili tejclum yic'ot ili winicob x'ixicob che' bajche' ts'ijbubil ti jini jun, che' bajche' tsi' q'uele ti jun jini rey ti Judá.

¹⁷ Come tsi' cʌyʌyoñob. Tsi' pulbeyob pom jini mach bʌ Diosic. Tsi' techbeyoñob c mich'ajel. Mach lajmic c mich'ajel.

^18-19 Pero mi caj c p'untañet, come tsa' q'uexta a pusic'al. Tsa' peq'uesa a bʌ tic tojlel che' bʌ tsa' q'uele jini jun, che' bʌ tsa' wubi chuqui mi caj i yujtel ti' contra ili tejclum. Tsa' jet' tsili a bujc. Tsa' cajiyet ti uq'uel tic tojlel. Joñon ja'el tsa cubi a t'an.

²⁰ Jini cha'an ma'anic mi caj i yujtel ili wocol che' cuxulet to. Ma'anic mi caj a q'uel ili wocol mu' bʌ caj c choc tilel ti ili lum. Che' tsi' yʌlʌ lac Yum”. Che'ʌch yom mi la' suben jini rey, che'en Hulda.