2 Reyob 14 - Chol: I T’an Dios

I yumʌntel Amasías

¹ Che' ti' cha'p'ejlel jab i ye'tel jini rey Joás ya' ti Israel, tsa' caji i tech i yumʌntel jini rey Amasías ti Judá.

² An jo'p'ejl i cha'c'al (25) i jabilel che' bʌ tsa' ochi ti rey Amasías. Tsi' cha'le i ye'tel bolomp'ejl i cha'c'al (29) jab ya' ti Jerusalén. I c'aba' i ña' jiñʌch Joadán ch'oyol bʌ ti Jerusalén.

³ Amasías tsi' mele chuqui wen ti' tojlel lac Yum, anquese mach wen lajalic tsi' mele bajche' i ñojte'el David. Pero tsi' mele che' bajche' Joás i tat.

⁴ Pero ma'anic tsi' junyajlel jeme jini pulʌntib tac am bʌ ti bujbujtʌl. Jini cha'an jini israelob tsi' chʌn puluyob majtañʌl tac yic'ot pom ya' ti pulʌntib.

⁵ Che' wen anix ti' ye'tel Amasías, tsi' tsʌnsa jini winicob tsa' bʌ i tsʌnsa Joás i tat.

⁶ Ma'anic tsi' tsʌnsʌbeyob i yalobilob, come ya' ti' juñilel i mandar Moisés tsi' yʌlʌ Lac Yum mach yomic mi' tsʌnsʌntel jini tatʌl cha'an i mul i yalobilob, mi jinic alobob mi' tsʌnsʌntelob cha'an i mul tatʌlob, pero ti jujuntiquil mi' chʌmel cha'an i bajñel mul. Che'ʌch ts'ijbubil.

⁷ Amasías tsi' tsʌnsa lujuntiquil ti mil año' bʌ ti Edom ya' ti joctʌl i c'aba' Ats'am. Tsi' ch'ʌmʌ jini tejclum Sela che' bʌ tsa' mʌjli i cha'an ti guerra. Tsi' cha' otsʌbe i c'aba' Jocteel. Che'ʌch i c'aba' c'ʌlʌl wʌle.

⁸ Amasías tsi' choco majlel suboñel ba'an Joás jini rey ti Israel. Tsi' sube: La' laj contrajin lac bʌ ti guerra, che'en.

⁹ Joás rey bʌ ti Israel tsi' chocbe ili lajiya Amasías rey bʌ ti Judá. Tsi' sube: Jini ch'ix am bʌ ti Líbano tsi' sube jini ch'ujte': “Aq'ueñon xch'oc bʌ a walobil”, che'en jini ch'ix. Pero tsa' ñumi majlel jini jontol bʌ bʌte'el ya' ti Líbano. Tsi' laj jisa jini ch'ix.

¹⁰ Isujm tsa' jisa Edom. Wʌle chan wola' mel a bʌ cha'an tsa' mʌjli a cha'an. Pero ajñen ti a wotot ba' tijicñayet. ¿Chucoch ma' bajñel sajcan a wocol, cha'an ma' jilel yic'ot pejtel a pi'ʌlob ti Judá? che'en Joás rey bʌ ti Israel.

¹¹ Pero Amasías ma'anic tsi' jac'ʌ i tic'ol. Jini cha'an tsa' letsi tilel Joás rey bʌ ti Israel cha'an mi' contrajin. Tsi' tajayob i bʌ ti guerra ti jump'ejl i tejclum ti Judá i c'aba' Betsemes.

¹² Tsa' wen mʌjli i cha'an israelob. Jini año' bʌ ti Judá tsa' puts'iyob ti' tojlel jini israelob. Ti jujuntiquilob tsa' sujtiyob ti' yotot.

¹³ Joás rey bʌ ti Israel tsi' wersa chucu Amasías rey bʌ ti Judá. Tsa' majli yic'ot i soldadojob ti Jerusalén. Tsi' jemeyob jini ts'ajc am bʌ ti' ti' jini puerta i c'aba' Efraín c'ʌlʌl ti puerta i c'aba' i Xujc, lujunc'al metro ti pejtelel.

¹⁴ Joás tsi' wersa pʌyʌ majlel lamital judíojob ti cʌjchel. Tsi' laj ch'ʌmʌ jini oro yic'ot plata, yic'ot pejtelel mu' bʌ i c'ʌjñel ti' yotot lac Yum, yic'ot i chubʌ'an tac jini rey Amasías. Tsa' cha' sujti majlel ti Samaria.

¹⁵ Ts'ijbubil ti' juñilel i reyob Israel pejtelel i ye'tel tsa' bʌ i mele Joás, yic'ot bajche' tsa' ujti guerra ti' contra Amasías rey bʌ ti Judá.

¹⁶ Tsa' chʌmi Joás che' bajche' i tatob. Tsa' mujqui ya' ba' mucul i reyob Israel ya' ti Samaria. Tsa' caji i cha'len yumʌl Jeroboam ti' q'uexol i tat.

¹⁷ Amasías jini rey bʌ ti Judá cuxul to tsa' ajni yambʌ jo'lujump'ejl jab che' chʌmenix Joás.

¹⁸ Ts'ijbubil ti' juñilel i reyob Judá pejtelel i melbal Amasías.

¹⁹ I winicob Amasías tsa' caji i contrajiñob ya' ti Jerusalén. Jini cha'an tsa' puts'i majlel Amasías ti Laquis. Pero jini winicob tsi' yajñesayob majlel. Tsi' tsʌnsayob ya' ti Laquis.

²⁰ Tsi' ch'ʌmbeyob sujtel i bʌc'tal ti caballo. Tsa' mujqui ya' ba' muculob i tatob ya' ti Jerusalén i tejclum David.

²¹ Pejtelel jini winicob ti Judá tsi' wa'chocoyob ti rey Azarías (i yalobil Amasías) ti' q'uexol i tat. An wʌclujump'ejl (16) i jabilel Azarías che' bʌ tsa' ochi ti rey.

²² Azarías tsi' cha' wen mele jini tejclum i c'aba' Elat. Tsi' cha' otsa ti' wenta Judá.

I yumʌntel jini Jeroboam

²³ Che' ti' jo'lujump'ejlel jab i ye'tel Amasías rey bʌ ti Judá, tsa' caji ti yumʌntel Jeroboam (i yalobil Joás) ti Israel. Jeroboam tsi' cha'le yumʌl jump'ejl i yuxc'al (41) jab ya' ti Samaria.

²⁴ Tsi' mele jontolil ti' wut lac Yum che' bajche' tsi' mele jini ñaxan bʌ rey Jeroboam (i yalobil bʌ Nabat) tsa' bʌ i yʌsa ti mulil israelob.

²⁵ Jeroboam tsi' cha' ch'ʌmʌ ti' wenta i lumal Israel c'ʌlʌl ti' yochib Hamat c'ʌlʌl ti jini colem ñajb i c'aba' Ats'am, che' bajche' tsi' yʌlʌ lac Yum i Dios Israel, che' bajche' tsi' yʌlʌ jini x'e'tel i cha'an Dios i c'aba' Jonás i yalobil Amitai. Jiñʌch jini x'alt'an ch'oyol bʌ ti Gathefer.

²⁶ Lac Yum Dios tsi' q'uele wen cabʌl i wocol jini israelob. Ma'anic mi juntiquilic winic tsa' bʌ mejli i coltañob.

²⁷ Pero lac Yum ma'anic tsi' ña'ta i junyajlel jisan jini israelob. Tsi' p'ʌtesa Jeroboam cha'an mi' coltañob.

²⁸ Ts'ijbubil ti' juñilel i reyob Israel pejtelel i melbal Jeroboam, yic'ot pejtelel i ñuclel yic'ot bajche' tsa' ujti guerra ba' ora Israel tsi' cha' ch'ʌmʌ ti' wenta jini Damasco yic'ot Hamat, jini tejclum tac tsa' bʌ cʌn ochi ti' wenta Judá.

²⁹ Tsa' chʌmi Jeroboam. Tsa' mujqui ya' ba' muculob jini reyob ti Israel. Tsa' caji i cha'len yumʌntel Zacarías ti' q'uexol i tat.