2 Reyob 13 - Chol: I T’an Dios

I yumʌntel Joacaz

¹ Che' ti' yuxp'ejlel i cha'c'al (23) jab i ye'tel jini Joás (i yalobil Ocozías), rey bʌ ti Judá, tsi' teche i yumʌntel jini rey Joacaz (i yalobil Jehú) ti Israel. Tsi' cha'le yumʌl wuclujump'ejl (17) jab.

² Pero tsi' mele jontolil ti' wut lac Yum Dios che' bajche' tsi' mele Jeroboam (i yalobil Nabat) tsa' bʌ i yʌsa ti mulil israelob.

³ Jini cha'an lac Yum tsi' mich'le jini israelob. Tsi' yʌc'ʌyob ti' c'ʌb Hazael rey bʌ ti Siria yic'ot ti' c'ʌb Benadad (i yalobil Hazael).

⁴ Pero Joacaz tsa' caji i pejcan lac Yum ti oración. Lac Yum tsi' yubibe i yoración, come tsi' q'uele cabʌl i wocol israelob cha'an i tic'lʌntel ti' tojlel jini rey ti Siria.

⁵ Jini cha'an lac Yum tsi' colta jini israelob. Tsi' coloyob ti' p'ʌtʌlel Siria. Jini israelob tsa' cha' cajiyob ti wen chumtʌl ti ñʌch'ʌl che' bajche' ti ñaxan.

⁶ Pero ma'anic tsi' cʌyʌyob i mel chuqui leco che' bajche' tsi' mele Jeroboam tsa' bʌ i yʌsa ti mulil jini israelob. Tsi' chʌn ch'ujutesayob jini dios Asera am bʌ ti Samaria.

⁷ Hazael tsi' wen jisʌbe i p'ʌtʌlel Israel. Tsa' jach cʌleyob ti' wenta Joacaz lujuntiquil i yuxc'al (50) winicob yujilo' bʌ c'ʌchtʌl ti caballo, yic'ot lujuncojt carreta, yic'ot lujump'ejl ti mil soldadojob. Jini rey ti Siria tsi' jisa cabʌl israelob. Tsi' t'uchtayob che' bajche' jini ts'ubejn am bʌ ti lum.

⁸ Ts'ijbubil ti' juñilel i reyob Israel yan tac bʌ i melbal Joacaz.

⁹ Tsa' chʌmi Joacaz che' bajche' i tatob. Tsi' mucuyob ya' ti Samaria.

I yumʌntel Joás ti Israel

¹⁰ Joás tsa' caji ti yumʌntel ti' q'uexol i tat. Joás tsa' caji i cha'len i yumʌntel ti Samaria che' wuclujump'ejl i cha'c'al (37) jab i yumʌntel Joás am bʌ ti Judá. Wʌclujump'ejl (16) jab tsi' cha'le i ye'tel.

¹¹ Joás tsi' mele chuqui jontol ti' wut lac Yum. Ma'anic tsi' cʌyʌ i mel chuqui leco che' bajche' tsi' mele Jeroboam tsa' bʌ i yʌsa ti mulil jini israelob. Tsi' chʌn ch'ujutesa dioste'.

¹² Ts'ijbubil ti' juñilel i reyob Israel pejtel i melbal Joás, yic'ot i ñuclel, yic'ot bajche' tsa' ujti guerra ti' contra Amasías rey bʌ ti Judá.

¹³ Tsa' chʌmi Joás che' bajche' i tatob. Tsa' mujqui ya' ti Samaria. Tsa' caji i yumʌntel Jeroboam ti' q'uexol i tat.

I yujtibal i ye'tel Eliseo

¹⁴ Ti jim bʌ ora tsa' c'am'a jini x'alt'an Eliseo. Lʌc'ʌlix i yorajlel cha'an mi' chʌmel. Tsa' c'oti Joás i rey Israel ba'an Eliseo. Tsa' caji ti uq'uel. Tsi' yʌlʌ: C tat, c tat, i p'ʌtʌlelet Israel, che'en.

¹⁵ Eliseo tsi' sube: Ch'ʌmʌ tilel a jalʌjb yic'ot i te'el, che'en. Joás tsi' ch'ʌmʌ tilel i jalʌjb yic'ot i te'el.

^16-17 Eliseo tsi' sube jini rey: Jamʌ jini q'ueloñib am bʌ ti' pasibal q'uin, che'en. Che' jini tsi' jamʌ. Eliseo tsi' cha' sube: Sʌts'ʌ jini jalʌjb, che'en. Eliseo tsi' yʌc'ʌ i c'ʌb ba'an i c'ʌb jini rey. Eliseo tsi' sube: Choco i te'el jalʌjb, che'en. Jini rey tsi' choco. Eliseo tsi' yʌlʌ: Jiñʌch i jalʌjb lac Yum mu' bʌ caj i coltañetla ti' contra jini siriajob, come mi caj i mʌjlel a cha'an ya' ti Afec.

¹⁸ Wʌle yom ma' ch'ʌm i te'el tac jalʌjb tsa' bʌ cʌle. Jats'ʌ ti lum, che'en. Jini rey tsi' ch'ʌmʌ i te'el tac jalʌjb. Uxyajl jach tsi' jats'ʌ ti lum. Tsi' cʌyʌ i jats'.

¹⁹ Pero i winic Dios tsi' mich'le jini rey. Tsi' sube: Tsa'ic a jats'ʌ jo'yajl wʌcyajl, che' jini tsa' mejli a laj jisan jini siriajob. Pero wʌle cojach uxyajl mi caj i mʌjlel a cha'an. Che' tsi' yʌlʌ Eliseo.

²⁰ Tsa' chʌmi Eliseo. Tsa' mujqui. Ti jujump'ejl jab tsa' ñumiyob ti' lumal Israel xujch'ob ch'oyolo' bʌ ti Moab.

²¹ Junyajl che' bʌ tsa' majli israelob i mucob ch'ujlelʌl, tsi' can q'ueleyob woli' tilelob jini xujch'ob. Che' jini tsi' bʌc' chocoyob cʌytʌl jini ch'ujlelʌl ya' ba' tsa' mujqui Eliseo. Che' bʌ tsa' c'oti ti yajlel jini ch'ujlelʌl ya' ti' mal ba' mucul Eliseo, tsa' cha' cuxtiyi jini xchʌmel. Ti ora jach tsa' cha' ch'ojyi.

²² Che' woli ti yumʌntel Joacaz ma'anic tsa' lajmi wocol ti Israel. Hazael jini rey ti Siria tsi' wen tic'la jini israelob.

²³ Pero lac Yum tsi' pʌsbeyob i yutslel i pusic'al jini israelob. Ma'anic tsa' laj jiliyob. Tsi' p'untayob Dios come tsi' q'uele ti ñuc jini xuc'ul bʌ i t'an yic'ot i tatob. Tsi' chʌn ña'ta Abraham yic'ot Isaac yic'ot Jacob. Jini cha'an ma'anic tsi' junyajlel cʌyʌyob c'ʌlʌl wʌle.

²⁴ Tsa' chʌmi Hazael jini rey ti Siria. Tsa' ochi ti rey Benadad ti' q'uexol i tat.

²⁵ Joás jini rey ti Israel (i yalobil Joacaz), tsi' cha' ch'ʌmʌ ti' wenta jini tejclum tac tsa' bʌ cʌn chilbenti i tat che' bʌ tsi' cha'le guerra Hazael ti' contra Joacaz. Uxyajl tsa' mʌjli i cha'an Joás ti' tojlel jini siriajob.