2 Reyob 10 - Chol: I T’an Dios

Jehú tsi' laj jisa jini año' bʌ ti' yotot Acab

¹ Ya' ti Samaria an lujuntiquil i chʌnc'al (70) i yalobilob jini rey Acab. Jini cha'an Jehú tsi' ts'ijbubeyob majlel carta jini año' bʌ i ye'tel ya' ti Jezreel yic'ot jini año' bʌ ti' wenta cha'an mi' cosañob i yalobilob Acab ya' ti Samaria. Tsi' yʌlʌ ti jun:

^2-3 Che' mi la' q'uel ili jun, ña'tanla an ti la' wenta cha'an mi la' yajcan jini wen chajpʌbil bʌ i yalobil Acab, cha'an mi la' buchchocon ti' ye'tel ti' q'uexol i tat. Che' jini mi caj la' cha'len guerra cha'an mi la' coltan jini mu' bʌ la' wa'chocon. Come an la' cha'an cabʌl carreta yic'ot caballo yic'ot wen melbil bʌ la' tejclum, yic'ot e'tijibʌl cha'an guerra. Che' tsa' subentiyob ti carta.

⁴ Tsa' cajiyob ti cabʌl bʌq'uen. Tsi' yʌlʌyob: Awilan, tsi' tsʌnsa cha'tiquil reyob. Mi ma'anic tsa' mejli i coltañob i bʌ jini reyob, ¿bajche' mi caj i mʌjlel lac cha'an? che'ob.

⁵ Jini xq'uel e'telob ti' yotot rey, yic'ot jini yumʌl ti Samaria yic'ot jini año' bʌ i ye'tel, yic'ot jini año' bʌ ti' wenta cha'an mi' cosañob i yalobilob Acab, tsi' chocoyob majlel winicob cha'an mi' subeñob Jehú: A winicon lojon. Muc'ʌch c mel lojon pejtel chuqui ma' subeñon lojon. Mach comic c bajñel wa'chocon lojon c rey. Cha'len yumʌl jatet, mu'to c yumañet lojon, che'ob.

⁶ Jehú tsi' cha' chocbeyob tilel i q'uexol jini jun. Tsi' yʌlʌ: Mi jump'ejl la' pusic'al quic'ot, mi uts'at mi la' jac'beñon c t'an, yom mi la' wojwox ch'ʌmbeñon tilel i jolob i yalobilob la' yum. La'la ti Jezreel ijc'ʌl che' bajche' ti ili ora, che'en Jehú. Ya' añob ti Samaria jini lujuntiquil i chʌnc'al ch'itoñob yic'ot jini xñoxob am bʌ ti' wenta cha'an mi' cosañob.

⁷ Che' bʌ tsa' c'oti jini carta, tsi' pʌyʌyob tilel i yalobilob rey. Tsi' tsʌnsayob jini lujuntiquil i chʌnc'al ch'itoñob. Pejtelel i jolob tsi' wojwox otsayob ti cabʌl chiquib. Che' jini tsi' chocoyob majlel ti Jezreel.

⁸ Jini suboñel tsa' c'oti i suben Jehú: Tsa'ix juli i jolob i yalobilob jini rey, che'en. Jehú tsi' yʌlʌ: P'ulchoconla ti cha'p'ujch ya' ti' ti' jini tejclum c'ʌlʌl mi' sʌc'an, che'en.

⁹ Che' bʌ tsa' sʌc'a tsa' tili i q'uel. Tsi' sube pejtelel winicob: Mach la' mulic. Joñon tsaj contraji c yum Joram. Tsac tsʌnsa. Pero ¿majqui tsi' tsʌnsa pejtel i yalobilob?

¹⁰ Lac Yum tsi' tsʌnsayob, come yom mi la' ña'tan wersa mi' ts'ʌctiyel pejtel i t'an lac Yum tsa' bʌ i yʌlʌ ti' tojlel Acab. Tsi' jisa pejtel i p'olbalob che' bajche' tsi' yʌlʌ jini x'alt'an Elías. Che' tsi' yʌlʌ Jehú.

¹¹ Che' ja'el tsi' laj tsʌnsa i pi'ʌlob Acab año' bʌ ti Jezreel yic'ot pejtel año' bʌ i ye'tel, yic'ot pejtel i cʌñʌyo' bʌ, yic'ot motomajob. Jehú tsi' laj jisayob ti pejtelelob.

¹² Tsa' loq'ui ya'i cha'an mi' majlel ti Samaria. Che' woli ti xʌmbal majlel ti bij, tsa' c'oti ti jump'ejl alʌ otot ba' mi' jijlelob xcʌnta tiñʌme'ob.

¹³ Ya' ti bij tsi' taja i pi'ʌlob Ocozías rey bʌ ti Judá. Jehú tsi' c'ajtibeyob: ¿Majquiyetla? che'en. Jini winicob tsi' jac'ʌyob: I pi'ʌlon lojon jini rey Ocozías. Mic majlel cʌq'ueñob cortesía i yalobilob Acab yic'ot i yalobilob Jezabel, che'ob.

¹⁴ Jehú tsi' sube i winicob: Chucula, che'en. Tsi' laj tsʌnsayob ti pejtelelob, cha'tiquil i yuxc'al (42) winicob. Tsi' chocoyob jini ch'ujlelʌl ti ch'en. Ma'anic tsi' p'unta mi juntiquilic.

¹⁵ Jehú tsa' loq'ui ya'i. Ya' ti bij tsi' taja Jonadab (i yalobil Recab). Jehú tsi' yʌq'ue cortesía. Tsa' caji i suben: ¿Jump'ejl ba a pusic'al quic'otet? che'en. Jonadab tsi' jac'ʌ: Che'cuyi, che'en. Jehú tsi' sube: Mi che'ʌchi, la' lac chucben lac bʌ laj c'ʌb, che'en. Tsi' yʌq'ue i c'ʌb. Temelix tsa' majliyob ti carreta.

¹⁶ Jehú tsi' sube: Conla. Yom ma' q'uel jini tsa' bʌ c melbe lac Yum, che'en. Che' jini Jonadab tsi' pi'le majlel ya' ti carreta.

¹⁷ Che' bʌ tsa' c'oti Jehú ya' ti Samaria, tsa' caji i jisan i pi'ʌlob Acab tsa' bʌ cʌleyob. Tsi' laj jisayob che' bajche' tsi' yʌlʌ lac Yum, che' bajche' tsi' yʌlʌ jini x'alt'an Elías.

Jehú tsi' laj jisa i winicob Baal

¹⁸ Jehú tsi' laj tempa winicob. Tsa' caji i subeñob: Acab ts'ita' jach tsi' ch'ujutesa Baal, pero joñon cabʌl mi caj c ch'ujutesan.

¹⁹ Jini cha'an pʌyʌla tilel ti ora pejtelel jini x'alt'añob i cha'an Baal, yic'ot i winicob, yic'ot i motomajob. Mach yomic mi' cʌytʌl mi juntiquilic, come ñuc jini majtañʌl mu' bʌ caj cʌq'uen Baal. Majqui jach mi' cʌy i bʌ, wersa mi caj i chʌmel, che'en. Jehú tsi' yʌlʌ ili t'an cha'an mi' yʌc jini winicob, cha'an mi' jisan pejtelel mu' bʌ i ch'ujutesañob Baal.

^20-21 Jehú tsi' choco majlel suboñelob ti pejtelel Israel. Tsi' pʌyʌ tilel pejtelel mu' bʌ i ch'ujutesañob Baal. Che' jini tsa' c'otiyob pejtelel jini x'e'telob i cha'an Baal. Ma'anic majch tsa' cʌle mi juntiquilic. Tsa' ochiyob ya' ti' templo Baal, jinto tsa' wen bujt'i ti jujunwejl i mal jini templo.

²² Jehú tsi' sube jini am bʌ ti' wenta jini bujcʌl tac: Ch'ʌmʌla tilel jini bujcʌl cha'an mi' lʌpob jini x'e'telob i cha'an Baal, che'en.

²³ Che' jini Jehú yic'ot Jonadab (i yalobil Recab) temel tsa' ochiyob ti' templo Baal. Tsi' subeyob jini x'e'telob i cha'an Baal: Wʌle yom mi la' wen q'uel, ame ochic juntiquil mach bʌ anic mi' ñop Baal. Jini jach yom mi' yochelob jini x'e'telob i cha'an Baal, che'en.

²⁴ Jini x'alt'añob i cha'an Baal tsa' caji' tsʌnsañob alʌc'ʌl tac. Tsa' caji' pulob cha'an majtañʌl. Jehú tsi' wa'choco chʌnc'al winicob cha'an mi' joy wa'tʌlob ya' ti' joytʌlel templo. Tsi' subeyob: An ti la' wenta cha'an mi la' laj tsʌnsañob. Mi tsa' coli juntiquil, wersa mi' chʌmel jini tsa' bʌ i colo, che'en.

²⁵ Jehú tsa' ujti i pul majtañʌl cha'an mi' yʌc jini winicob i cha'año' bʌ Baal. Tsa' loq'ui i pejcan jini xcʌntayajob i cha'an yic'ot i yum soldadojob. Tsi' subeyob: Ochenixla ti mal cha'an mi la' tsʌnsañob ti pejtelelob. Mach la' cʌy mi juntiquilic, che'en. Che' jini tsi' laj tsʌnsayob ti espada. Che' ujtemix i laj tsʌnsañob, tsa' caji i jexbañob loq'uel jini ch'ujlelʌlob. Tsa' ochiyob ti yambʌ i mal i templo Baal.

²⁶ Tsa' caji i loc'sañob pejtelel oy tac i yejtal bʌ Baal am bʌ ti' templo. Tsi' laj puluyob.

²⁷ Tsi' xuluyob i yejtal tac Baal. Tsi' jisʌbeyob i c'ʌjñibal i templo Baal. Tsa' sujti ti' yotlel ta'jibʌl c'ʌlʌl wʌle.

²⁸ Jehú che'ʌch tsi' laj jisa i ch'ujutesʌntel Baal ya' ti Israel.

²⁹ Pero mach tojic i melbal, come lajal tsi' mele che' bajche' Jeroboam (i yalobil bʌ Nabat), tsa' bʌ i yʌsa ti mulil israelob. Tsi' chʌn ch'ujutesa jini alʌ tat wacax melbil tac bʌ ti oro am bʌ ti Betel yic'ot ti Dan.

³⁰ Lac Yum tsi' sube Jehú: Tsa' wen jac'ʌ chuqui tsac subeyet. Tsa' laj jisa jini año' bʌ ti' yotot Acab che' bajche' tsac ña'ta. Jini cha'an mi caj i wa'chocontelob ti rey ti' tojlel Israel a walobilob, yic'ot a buts, yic'ot i yalobil a buts, che'en.

³¹ Pero Jehú ma'anic tsi' pejca lac Yum ti pejtelel i pusic'al, come tsi' chʌn ch'ujutesa jini wacax tsa' bʌ i mele Jeroboam, tsa' bʌ i yʌsa ti mulil jini israelob.

^32-33 Ti jim bʌ ora lac Yum tsa' caji' t'oxben i lumal Israel. Hazael tsa' tili i tic'lan Israel. Tsa' mʌjli i cha'an ya' ti junwejl Jordán. Tsi' chilbeyob pejtel i lumal Galaad, yic'ot Gad, yic'ot Rubén, yic'ot lamital Manasés, c'ʌlʌl ti' ti' Aroer am bʌ ti' tojel jini pa' i c'aba' Arnón, yic'ot pejtel i lum Galaad yic'ot Basán.

³⁴ Ts'ijbubil ti' juñilel i reyob Israel pejtel yan tac bʌ i melbal Jehú.

³⁵ Tsa' chʌmi Jehú che' bajche' i tatob. Tsi' mucuyob ya' ti Samaria. Tsa' caji i cha'len i yumʌntel Joacaz i yalobil Jehú.

³⁶ Waxʌcp'ejl i cha'c'al (28) jab tsi' cha'le yumʌl ti' tojlel israelob ya' ti Samaria.