2 Cronicas 8 - Chol: I T’an Dios

Yan tac bʌ i ye'tel Salomón

¹ Che' junc'alix jab i yumʌntel Salomón, wa'chocobilix jini Templo yic'ot i yotot.

² Tsa' caji i cha' wen mel jini tejclum tac tsa' bʌ i yʌq'ue Hiram. Ya'i tsi' yʌc'ʌyob ti chumtʌl israelob.

³ Salomón tsa' majli i tech guerra ti' contra Hamat ti Soba. Tsi' t'uchta jini tejclum.

⁴ Tsi' cha' mele jini tejclum i c'aba' Tadmor ya' ti colem bʌ i tiquiñal lum. Tsi' mele tejclum tac ya' ti Hamat.

⁵ Che' ja'el tsi' wen ñup'u ti ts'ajc jini tejclum tac ba' lotol i chubʌ'an ya' ti Bethorón am bʌ ti chan yic'ot am bʌ ti entʌl. Tsi' melbe chan tac bʌ ts'ajc, yic'ot i ti' tac, yic'ot i c'ʌtlib.

⁶ Che' ja'el tsi' mele Baalat yic'ot yan tac bʌ tejclum ba' lotol i bʌl ñʌc'ʌl yic'ot carreta tac yic'ot caballo yic'ot e'tijibʌl. Ts'ʌcʌl tsi' laj mele pejtelel chuqui tsi' ña'ta i mel Salomón ya' ti Jerusalén, yic'ot ti Líbano, yic'ot ti yan tac bʌ lum am bʌ ti' wenta.

^7-8 Tsi' yotsa ti majtan e'tel jini heteojob, yic'ot amorreojob, yic'ot ferezeojob, yic'ot heveojob, yic'ot jebuseojob tsa' bʌ colobajiyob che' bʌ tsa' jiliyob i pi'ʌlob ti guerra. Jini israelob mi' yotsañob ti majtan e'tel c'ʌlʌl wʌle.

⁹ Pero Salomón ma'anic tsi' c'ʌñʌ ti majtan e'tel jini israelob. Tsi' yʌq'ueyob i ye'tel ti soldado, yic'ot ti xcʌnta caballojob cha'an guerra.

¹⁰ Salomón tsi' wa'choco lujunc'al yic'ot lujuntiquil i yuxc'al (250) año' bʌ i ye'tel ti' tojlel israelob.

¹¹ Che' melbilix i yotot, Salomón tsi' pʌyʌ majlel i yijñam ya' ba' chumul ti' tejclum David cha'an mi' chumtʌl ti tsiji' bʌ i yotot tsa' bʌ i wa'chocobe, come tsi' yʌlʌ: Ma'anic mi caj i chumtʌl quijñam ti' yotot c tat David i rey israelob, come ya' tsa' poj ajni jini Arca i cha'an bʌ lac Yum. Wen ch'ujul jini ajñibʌl, che'en.

¹² Salomón tsa' caji i pulben tsʌnsʌbil bʌ i majtan lac Yum ya' ti pulʌntib tsa' bʌ i wa'chocobe lac Yum ti' tojel jini corredor cha'an Templo.

¹³ Ti jujump'ejl q'uin tsi' yʌq'ue che' bajche' jaycojt yom, che' bajche' ts'ijbubil ti' mandar Moisés, ti' q'uiñilel tac c'aj o, yic'ot ti' pasibal uw, yic'ot ti ñuc tac bʌ q'uiñijel uxyajl ti jab. Jiñʌch i q'uiñilel Pascua, yic'ot i q'uiñilel Semana tac, yic'ot i q'uiñilel Lejchempat.

¹⁴ Tsi' pʌsbeyob i ye'tel motomajob ti jujuntiquil che' bajche' tsi' teche i mel David. Tsi' yʌq'ueyob i ye'tel levíjob cha'an mi' ñuq'uesañob lac Yum, cha'an ja'el mi' coltañob jini motomajob ti' ye'tel ti jujump'ejl q'uin. Tsi' wa'choco xcʌntayajob ya' ti' ti' jini Templo che' bajche' tsi' yʌc'ʌ mandar David, i winic Dios.

¹⁵ Ma'anic tsi' cʌyʌyob i jac'ob i mandar David, pero uts'at tsi' meleyob i ye'tel jini motomajob, yic'ot levíjob, yic'ot jini mu' bʌ i cʌntañob chuqui tac an ti' yotot lac Yum.

¹⁶ Salomón tsa' ujti i mel pejtelel jini e'tel tsa' bʌ i teche cha'an i yotot lac Yum.

^17-18 Tsa' majli ti Ezión Geber yic'ot ti Elot, cha'p'ejl tejclum am bʌ ti' ti' ñajb ya' ti Edom. Come Hiram tsi' chocbe tilel Salomón colem barco tac yic'ot xñijca barcojob. I winicob Hiram tsi' comol cha'leyob e'tel ti barco yic'ot i winicob Salomón. Tsajniyob ti Ofir ti' wenta Salomón. Tsi' cha' ch'ʌmbeyob tilel waxʌcc'al millón peso jini oro.