2 Cronicas 6 - Chol: I T’an Dios

Tsi' yʌc'ʌyob ti' wenta Dios jini Templo

¹ Salomón tsa' caji i pejcan lac Yum ti oración. Tsi' yʌlʌ: C Yum, tsa' wʌlʌ ya' chumulet ba' i'ic' pañimil.

² Pero tsa'ix c melbeyet a Templo ba' ma' chumtʌl ti pejtelel ora, che'en.

³ Tsi' sutq'ui i bʌ jini rey cha'an mi' yʌq'uen i yutslel i t'an pejtelel israelob ya' bʌ wa'alob.

⁴ Salomón tsi' subeyob: La' sujbic i ñuclel lac Yum i Dios Israel. Come ti' p'ʌtʌlel tsa'ix i ts'ʌctesa i t'an tsa' bʌ i sube c tat David.

^5-6 Come lac Yum tsi' sube David: “Che' bʌ tsac loc'sa c tejclum ti' lumal Egipto, c'ʌlʌl wʌle ma'anic tsac yajca mi jump'ejlic tejclum ti pejtelel a lumal cha'an mi cʌc' ti wa'chocontel cotot cha'an i ch'ujutesʌntel j c'aba', yic'ot ja'el ma'anic tsac yajca winic ti Israel cha'an mic wa'chocon ti rey ti' tojlel c tejclum Israel. Pero wʌle tsa'ix c yajca Jerusalén. Ya' mi caj cʌc' ti ñuc j c'aba'. Tsa'ix c yajca c winic David: Jatet mi caj a wochel ti rey”, che'en.

⁷ C tat David tsa' caji' ña'tan i wa'chocoben i yotot lac Yum, i Dios israelob.

⁸ Pero lac Yum tsi' sube: “Uts'at bajche' tsa' ña'ta cha'an a wom a wa'chocobeñon cotot,

⁹ pero mach mejliquet. Jini mu' bʌ caj i wa'chocobeñon jini cotot, jiñʌch a walobil”, che'en lac Yum.

¹⁰ Wʌle lac Yum tsa'ix i ts'ʌctesa i T'an tsa' bʌ i sube c tat, come ochemon ti rey ti Israel ti' q'uexol c tat che' bajche' lac Yum tsi' yʌlʌ.

¹¹ Tsa'ix c wa'chocobe i yotot lac Yum i Dios israelob. Tsac ch'ʌmʌ ochel jini Arca ba' lotol jini Trato tsa' bʌ i mele lac Yum yic'ot israelob, che'en Salomón.

^12-13 Ya' wa'al Salomón ti' tojlel pejtel israelob ti t'uchlibʌl melbil bʌ ti bronce joy lajal bʌ melbil ti ojlil i yuxp'ejl metro. An ojlil i cha'p'ejl metro i chanlel. Ya'i tsi' ñocchoco i bʌ Salomón ti' tojlel pejtelel israelob. Tsi' letsa i c'ʌb ti panchan ti oración.

¹⁴ Tsi' yʌlʌ: C Yum Dios, i Dioset israelob, ma'anic yambʌ Dios ti panchan yic'ot ti pañimil bajche' jatet. Ma' chʌn ña'tan a t'an, ma' chʌn pʌsbeñob i yutslel a pusic'al a cha'año' bʌ mu' bʌ i tsajcañetob ti pejtelel i pusic'al.

¹⁵ Come tsa' ts'ʌctesa a t'an che' bajche' tsa' sube c tat David. Tsa' mele che' bajche' tsa' wʌlʌ. Wʌle wolij q'uel lojon.

¹⁶ Jini cha'an c Yum, i Dios israelob, ts'ʌctesan ja'el a t'an che' bajche' tsa' sube c tat David: “Ma'anic mi caj i jilel a p'olbal mu' bʌ caj i yumʌntel ti a buchlib, mi xuc'ul mi' chʌn jac'ob c mandar a walobilob che' bajche' jatet”, che'et.

¹⁷ Jini cha'an, c Yum, i Dios israelob, ts'ʌctesan ili t'an tsa' bʌ a sube c tat David.

¹⁸ ¿Isujm ba mi' chumtʌl Dios yic'ot winicob ti pañimil? Come mach ñuquic panchan ti a tojlel. Mach ochic pejtelel a ñuclel. Jini cha'an, ¿bajche' mi mejlel a wochel ti ili otot tsa' bʌ c mele?

¹⁹ Pero yom ma' wubin coración come wolic pejcañet ti wocol t'an. C Yum Dios, yom ma' ñich'tañon come a winicon. Mele che' bajche' wolij c'ajtibeñet.

²⁰ Q'uele a wotot ti q'uiñil yic'ot ti ac'ʌlel wʌ' ba' mi caj a wʌc' ti cʌjñel a c'aba' che' bajche' tsa' wʌlʌ.

²¹ Ubibeñon coración quic'ot pejtel a cha'año' bʌ ti Israel wʌ' ti' tojel a wotot. Ñich'tʌbeñon lojon c t'an ya' ba' chumulet ti panchan. Ñusʌbeñon lojon c mul che' ma' wubiñon lojon.

²² Che' an majch mi' cha'len mulil, mi tsa' wersa pʌjyi tilel cha'an mi' tsictesan i bʌ wʌ' ti pulʌntib, mi tsi' yʌlʌ ma'anic i mul,

²³ ñich'tan ti panchan. Aq'uen i tojol i mul jini xlot. Sutq'uiben i jontolil. Pero mele ti uts'at jini mach bʌ anic i mul.

²⁴ Che' mi' jisʌntelob israelob cha'an ti' caj i mul ti a tojlel, mi tsi' cha' sutq'uiyob i bʌ ba' añet cha'an mi' cha' tsajcañetob,

²⁵ yom ma' wubibeñob i t'an ya' ti panchan che' mi' pejcañetob ti oración wʌ' ti a wotot. Ñusʌbeñob i mul. Cha' aq'ueñob ili lum tsa' bʌ a wʌq'ueyob i ñojte'elob.

²⁶ Che' ma'anix mi' jubel ja'al cha'an ti' caj c mul lojon, mi tsac sutq'ui lojon c wut ti' tojel ili Templo cha'an mic pejcañet lojon ti oración, cha'an mic cha' diosiñet lojon, mi tsaj cʌyʌ lojon c mul che' jusʌbil lojon c pusic'al ti wocol,

²⁷ yom ma' ñich'tañon lojon ya' ti panchan. Ñusʌbeñon lojon c mul. Pʌsbeñon lojon jini toj bʌ bij ba' yom mic cha'len lojon xʌmbal. Cha' chocbeñon lojon tilel ja'al wʌ' ti c lumal lojon tsa' bʌ a wʌq'ueyon lojon.

²⁸ Che' mi' tilel wocol ti pañimil, mi wi'ñal mi c'amʌjel, mi i chʌmel c pʌc'ʌb lojon, mi sajc' o mi joy mʌcʌl c tejclum lojon cha'an guerra,

²⁹ yom ma' wubibeñob i yoración a cha'año' bʌ majqui jach woli ti wocol, come ti jujuntiquil mi' bajñel cʌn i wocol. Mi tsi' pejcayet ti' tojel ili otot,

³⁰ yom ma' ñich'tʌbeñob i t'an ya' ba' chumulet ti panchan. Ñusʌben i mul. Sutq'uiben che' bajche' an i melbal, come jatet ma' laj cʌmbeñob i pusic'al ti pejtelelob.

³¹ Che' jini ti pejtelel ora mi caj i bʌc'ñañetob. Mi caj i chʌn cha'leñob xʌmbal ti a bijlel che' cuxulob to ila ti pañimil.

³² Q'uele ja'el jini ñajt bʌ ch'oyolob mach bʌ israelobic che' mi' tilel i ch'ujutesañetob cha'an ñuc a c'aba', che' mi' sutq'uiñob i wut ti' tojel a Templo cha'an mi' pejcañetob ti oración.

³³ Yom ma' ñich'tʌbeñob i t'an ya' ba' chumulet ti panchan. Yom ma' wʌq'ueñob che' bajche' mi' c'ajtibeñetob. Che' jini wen ñuc mi caj i q'ueletob pejtel winicob. Mi caj i bʌc'ñañetob che' bajche' a tejclum Israel. Mi caj i ña'tañob a cha'añʌch ili Templo tsa' bʌ c mele.

³⁴ Che' ma' chocob majlel ti guerra a winicob ti' tojlel i contrajob, mi tsi' sutq'uiyob i wut ti' tojel ili tejclum Jerusalén tsa' bʌ a yajca yic'ot ti' tojel ili Templo cha'an mi' pejcañetob ti oración,

³⁵ yom ma' ñich'tʌbeñob i yoración ya' ti panchan. Coltañob ti' wocol.

³⁶ Mi tsi' cha'leyob mulil ti a contra, come a wujil ma'anic mi juntiquilic winic mach bʌ anic mi' cha'len mulil, mi tsa' caji a mich'leñob, mi tsa' wʌc'ʌyob ti' c'ʌb i contra cha'an mi' cʌchob majlel ti yambʌ lum mi ñajt mi lʌc'ʌl,

^37-38 mi tsi' ña'tayob i mul ya' ba' tsa' cʌjchiyob majlel, mi tsi' sutq'uiyob i bʌ ti' tojel ili lum tsa' bʌ a wʌq'ueyob i ñojte'elob ti' tojel ili tejclum yic'ot ili Templo tsa' bʌ c mele, mi tsi' c'ajtibeyetob ti pejtelel i pusic'al: “Ñusʌbeñon lojon c mul”, mi che'ob,

³⁹ yom ma' jac'beñob i yoración ya' ba' chumulet ti panchan. Coltañob ya' ba' chujquemob ti wocol. Ñusʌbeñob i mul a cha'año' bʌ año' bʌ i mul ti a tojlel.

⁴⁰ Wʌle, c Yum Dios, mij c'ajtibeñet ti wocol t'an, p'isi ti a wenta pejtel coración lojon ti ili Templo.

⁴¹ La', c Yum Dios, c'aja a wo ti a chumlib yic'ot jini Arca i yejtal bʌ a p'ʌtʌlel. C Yum Dios, la' i tajob i coltʌntel a motomajob. La' i yubiñob i tijicñʌyel pejtel a cha'año' bʌ cha'an i yutslel a pusic'al.

⁴² C Yum Dios, mach a mʌyben a wut jini yajcʌbil bʌ a cha'an. Ña'tan pejtel i yutslel a pusic'al tsa' bʌ a pʌsbe a winic David.