2 Cronicas 16 - Chol: I T’an Dios

Asa tsi' teme i t'an yic'ot Benadad

¹ Che' ti wʌclujump'ejl i cha'c'al (36) jab i ye'tel jini rey Asa, jini rey Baasa ya' ti Israel tsa' tili i contrajin Judá. Tsi' joy ts'ajqui jini tejclum Ramá cha'an mi' mʌctan pejtel yomo' bʌ ochel loq'uel ti' tojlel Asa, rey ti Judá.

² Jini rey Asa tsi' loc'sa jini plata yic'ot oro am bʌ ti Templo yic'ot ti' yotot. Tsi' chocbe majlel Benadad rey bʌ ti Siria chumul bʌ ti Damasco.

³ Tsi' sube: La' lac laj lac t'an che' bajche' tsi' cha'leyob lac tatob. Woli cʌq'ueñet plata yic'ot oro cha'an ma' jem a trato yic'ot Baasa rey bʌ ti Israel. La' coltañon cha'an mi' tʌts' i bʌ tic tojlel lojon, che'en Asa.

⁴ Benadad uts'at tsi' yubibe i t'an jini rey Asa. Tsi' chocbe tilel bajc'ʌl soldadojob yic'ot i yaj capitán cha'an mi' contrajiñob Israel. Tsi' jisayob jini tejclum tac: Ijón, Dan, Abelmaim, yic'ot pejtelel jini tejclum ya' ti Neftalí.

⁵ Baasa tsi' junyajlel cʌyʌ i ts'ajquin Ramá che' bʌ tsi' yubi woli' contrajiñob jini siriajob.

⁶ Jini rey Asa tsi' pʌyʌ majlel pejtelel Judá ya' ti Ramá. Tsi' laj ch'ʌmʌyob majlel jini xajlel yic'ot jini te' tsa' bʌ i c'ʌñʌ jini rey Baasa. Tsi' c'ʌñʌyob cha'an mi' wa'chocoñob Geba yic'ot Mizpa.

⁷ Ti jim bʌ ora tsa' tili i pejcan Asa, rey bʌ ti Judá, juntiquil x'e'tel i cha'an Dios i c'aba' Hanani. Tsi' sube: Tsa' bajñel colta a bʌ ti' tojlel jini rey ti Siria. Ma'anic tsa' c'ajti a coltʌntel ti lac Yum Dios. Jini cha'an tsa'ix coli ti a c'ʌb i soldadojob jini rey ti Siria.

⁸ ¿Mach ba c'ajalic a cha'an bajche' tsa' jisʌntiyob jini etiopejob yic'ot libiajob, yic'ot bajc'ʌl i soldadojob, yic'ot pejtelel i carreta tac yic'ot bajc'ʌl c'ʌchʌlo' bʌ ti caballo? Lac Yum tsi' yʌc'ʌyob ti a c'ʌb come tsa' c'ajtibe a coltʌntel.

⁹ Come lac Yum woli' sʌclan ñumel ti pejtelel pañimil jini xuc'ulo' bʌ i pusic'al mu' bʌ i ñopob, cha'an mi' pʌsbeñob ñuc bʌ i coltaya. Pero leco chuqui tsa' mele. Jini cha'an ma'anic mi caj i ñʌjch'el guerra ti a tojlel, che'en Hanani.

¹⁰ Che' bʌ tsi' yubibe i t'an jini x'etel i cha'an Dios, Asa tsi' wen mich'le jini x'alt'an. Tsi' yotsa ti mʌjquibʌl. Asa cabʌl tsa' caji i tic'lan winicob ti jim bʌ ora.

Tsa' chʌmi jini Asa

¹¹ Ts'ijbubil ya' ti' juñilel i reyob Judá yic'ot Israel pejtelel i melbal Asa c'ʌlʌl ti' tejchibal i yumʌntel.

¹² Che' ti' bolomlujump'ejl i cha'c'al (39) jab i ye'tel jini Asa, tsi' taja wen tsʌts bʌ c'amʌjel ti' yoc, pero ma'anic tsi' peq'uesa i bʌ ti' tojlel lac Yum. Tsa' jach majli ba'an jini xchon ts'acob.

^13-14 Tsa' chʌmi Asa che' anix jump'ejl i yuxc'al (41) jab i yumʌntel. Tsi' mucuyob ya' ti mucoñibʌl tsa' bʌ i wʌn chajpa ya' ti Jerusalén. Ya' tsi' yotsayob ba' tocbil i mal xajlel yic'ot cabʌl perfume yic'ot xojocña bʌ ts'ajc chajpʌbil bʌ i cha'an jini yujil bʌ i melol. Tsi' puluyob cabʌl pom che' ba' ora tsi' mucuyob.