2 Cronicas 12 - Chol: I T’an Dios

Sisac tsa' ochi ti Judá

¹ Che' bʌ tsi' q'uele Roboam uts'at woli' mejlel pejtel i ye'tel, wen xuc'ul i yumʌntel, tsa' caji i cʌy lac Yum yic'ot pejtelel israelob.

² Jini cha'an che' ti' jo'p'ejlel jab i yumʌntel tsa' tili Sisac rey bʌ ti Egipto cha'an mi' contrajin Roboam

³ yic'ot uxbajc' carreta yic'ot uxc'al mil winicob c'ʌchʌlo' bʌ ti caballo, yic'ot bajc'ʌl soldadojob egiptojob, libiajob, suquieñob, yic'ot etiopejob.

⁴ Tsi' t'uchtayob cabʌl tejclum ti Judá, c'ʌlʌl tsa' c'otiyob ti Jerusalén.

⁵ Tsa' c'oti jini x'alt'an Semaías i pejcan Roboam yic'ot año' bʌ i ye'tel ti Judá tsa' bʌ i tempayob i bʌ ti Jerusalén cha'an mi' puts'tañob Sisac. Tsi' subeyob: Lac Yum tsi' yʌlʌ: “Jatetla tsa' la' cʌyʌyon. Jini cha'an tsaj cʌyʌyetla ti' c'ʌb Sisac cha'an mi la' tic'lʌntel”. Che' tsi' yʌlʌ lac Yum, che'en jini x'alt'an.

⁶ Jini año' bʌ i ye'tel ti Israel yic'ot jini rey tsi' peq'uesayob i bʌ. Tsi' yʌlʌyob: Toj lac Yum, che'ob.

⁷ Lac Yum tsi' q'uele che' bʌ tsi' peq'uesayob i bʌ ti' tojlel. Tsi' cha' pejca jini x'alt'an Semaías: Tsa'ix i peq'uesayob i bʌ. Ma'anix mi caj c jisañob. Mi caj j coltañob. Ma'anic mi caj c pʌsbeñob c mich'ajel ti Jerusalén. Ma'anic mi caj cʌc'ob ti' c'ʌb Sisac.

⁸ Pero mi caj i poj ochelob ti' wenta yambʌ i yum cha'an mi' ña'tañob tijicñayob mu' bʌ i yumañoñob, come uts c pusic'al. Mach utsobic jini yumʌlob ti pañimil. Che' tsi' yʌlʌ lac Yum.

⁹ Jini cha'an Sisac, rey bʌ ti Egipto, tsi' ch'ʌmʌ pejtelel chuqui tac an ti Templo, yic'ot pejtelel chuqui an i cha'an jini rey, yic'ot pejtelel jini mʌctijibʌl melbil bʌ ti oro tsa' bʌ i yʌc'ʌ ti melol Salomón.

¹⁰ Roboam tsi' mele mʌctijibʌl ti bronce i q'uexol jini melbil bʌ ti oro tsa' bʌ chilbenti. Tsi' yʌq'ueyob i yumob soldadojob mu' bʌ i chʌcʌ cʌntañob i ti' i yotot jini rey.

¹¹ Jini soldadojob tsi' ch'ʌmʌyob majlel mʌctijibʌl ba' ora tsa' majli ti Templo jini rey. Che' bʌ tsa' sujti ti' yotot, tsi' cha' otsayob ya' ba' cʌntʌbil.

¹² Che' bʌ tsi' peq'uesa i bʌ jini rey, ma'anix tsi' chʌn mich'le lac Yum. Ma'anic tsi' jisʌbe i lumal. Uts'at tsa' chʌn ajniyob ya' ti Judá.

¹³ Wuclujump'ejl (17) jab tsi' cha'le yumʌntel Roboam ya' ti Jerusalén, come lac Yum tsi' yajca Jerusalén cha'an ya'i mi' yʌc' ti cʌjñel i c'aba'. An jump'ejl i yuxc'al (41) i jabilel Roboam che' bʌ tsa' ochi ti' ye'tel. I c'aba' i ña' Roboam jiñʌch Naama, juntiquil amón.

¹⁴ Tsi' mele chuqui jontol ti' wut lac Yum, come ma'anic tsi' wen ñopo lac Yum ti pejtelel i pusic'al.

¹⁵ Ts'ijbubil ti' juñilel jini x'alt'an Semaías yic'ot ti' juñilel jini x'alt'an Iddo pejtelel i melbal Roboam c'ʌlʌl ti' cajibal i yumʌntel. Ma'anic tsa' lajmi guerra ti' tojlel Roboam yic'ot Jeroboam che' cuxul to.

¹⁶ Tsa' chʌmi Roboam. Tsa' mujqui yic'ot i ñojte'elob ya' ti Jerusalén. Tsa' ochi ti rey Abías ti' q'uexol i tat.