1 Samuel 8 - Chol: I T’an Dios

Jini israelob tsi' c'ajtiyob i rey

¹ Che' ñoxix Samuel, tsi' yotsa i yalobilob ti juez ti' tojlel israelob.

² Jini ñoj ñaxan bʌ i yalobil jiñʌch Joel. Jini ijts'iñʌl bʌ jiñʌch Abías. Tsi' cha'leyob meloñel ya' ti Beerseba.

³ Pero mach lajalobic tsi' meleyob che' bajche' i tat. Tsa' jach caji i mulañob taq'uin. Tsi' ch'ʌmʌyob tac i majtan. Mach tojic tsi' cha'leyob meloñel.

⁴ Tsa' caji i tempañob i bʌ pejtelel jini ñoxobix bʌ ti' tojlel israelob. Tsa' majliyob ti Ramá ya' ba' chumul Samuel.

⁵ Tsi' subeyob: Awilan ñoxetix. Leco jax woli' melob a walobilob. Mach lajalobic che' bajche'et. Jini cha'an yom ma' wa'chocobeñon lojon c rey cha'an mic yuman lojon che' bajche' mi' melob ti yan tac bʌ tejclum, che'ob.

⁶ Tsa' caji i wen mel i pusic'al Samuel cha'an tsi' c'ajtiyob rey cha'an mi' yumañob. Tsa' caji i pejcan lac Yum ti oración.

⁷ Lac Yum tsi' sube Samuel: Yom ma' wen ñich'tʌbeñob i t'an jini winicob ti pejtelel chuqui mi' subeñetob. Mach jatetic woli a ts'a'lentel, pero woli' ts'a'leñoñob. Mach chʌn yomobix i yumañon.

⁸ Che' bʌ tsac loc'sayob ti Egipto c'ʌlʌl wʌle mi' chañ'esañob i bʌ. I tilelʌch mi' cʌyoñob cha'an mi' ch'ujutesañob yambʌ diosob. Che'ʌch woli' melob ti a tojlel ja'el.

⁹ Jini cha'an yomix ma' wubibeñob i t'an. Pero tsictesʌbeñob ti jamʌl bajche' mi caj i ñusañob wocol ti' tojlel i reyob mu' bʌ caj i yumañob, che'en.

¹⁰ Jini cha'an Samuel tsi' cha' pejca jini año' bʌ i ye'tel tsa' bʌ i c'ajtiyob i rey. Tsi' subeyob pejtelel i t'an lac Yum.

¹¹ Tsi' yʌlʌ: Che'ʌch mi caj i melbeñetla jini rey mu' bʌ caj la' yuman. Mi caj i pʌy majlel la' walobilob cha'an mi' cʌntʌbeñob i carreta tac tujc'ʌbil bʌ majlel ti caballo. C'ʌchʌlob ti caballo mi caj i majlelob ti guerra. Yaño' bʌ ajñel mi caj i majlelob ti' tojel i carreta i yum.

¹² Jini rey mi caj i wa'chocon ñuc taco' bʌ i ye'tel cha'an mi' cʌntañob winicob ti mil tac, yic'ot lujuntiquil i yuxc'al tac año' bʌ i ye'tel ti guerra. Yaño' bʌ mi caj i top'beñob i lum, mi' cajelob ti c'ajbal. Yaño' bʌ mi caj i melbeñob i ye'tijib cha'an guerra yic'ot i te'el tac i carreta.

¹³ Jini rey mi caj i pʌy ja'el jini xch'oc bʌ la' walobilob cha'an mi' melbeñob xojocña bʌ perfume. Yaño' bʌ mi caj i melbeñob i waj yic'ot i bʌl i ñʌc'.

¹⁴ Mach jinic jach pero mi caj i chilbeñetla uts'at tac bʌ la' chol, yic'ot la' ts'usubil, yic'ot la' wolivojil cha'an mi' yʌq'ueñob x'e'telob i cha'an.

¹⁵ Mi caj i ch'ʌm i diezmojlel la' ts'usub yic'ot la' pac', cha'an mi' yʌq'ueñob x'e'telob i cha'an.

¹⁶ Mi caj i pʌy x'e'telob la' cha'an, yic'ot la' criada, yic'ot wen ch'ejl bʌ ch'iton winicob la' cha'an, yic'ot la' burro cha'an mi' c'ʌn i mel i ye'tel.

¹⁷ Mi caj i ch'ʌm i diezmojlel la' tiñʌme'. Mi caj la' melbeñob i ye'tel.

¹⁸ Ti jim bʌ q'uin mi caj la' cha'len c'am bʌ t'an cha'an cabʌl la' wocol ti' tojlel jini rey tsa' bʌ la' lon yajca. Pero ti jim bʌ q'uin ma'anic mi caj i jac'beñetla lac Yum. Che' tsi' yʌlʌ Samuel.

¹⁹ Jini winicob ma'anic tsi' mulayob i ñich'tʌben i t'an Samuel. Tsi' yʌlʌyob: Mach isujmic bajche' wola' wʌl. Wersa mi caj c taj lojon c rey cha'an mic yuman lojon.

²⁰ Com lojon ajñel che' bajche' yan tac bʌ tejclum. Jini c rey lojon mi caj i cha'len meloñel tic tojlel lojon. Mi caj i pʌyon lojon ti guerra, che'ob.

²¹ Samuel tsi' laj ubi pejtelel chuqui tsi' yʌlʌyob. Tsi' cha' sube lac Yum.

²² Lac Yum tsi' sube Samuel: Jac'beñob i t'an. Wa'chocobeñob i rey, che'en. Che' jini Samuel tsa' caji i subeñob israelob cha'an mi' laj sujtelob ti' lumal.