1 Samuel 3 - Chol: I T’an Dios

Lac Yum tsi' pʌyʌ Samuel

¹ Che' ch'iton to Samuel tsa' caji i melben i ye'tel lac Yum ba'an Elí. Ma'anic majch tsi' yubibe i t'an lac Yum ti ili ora. Ma'anic chuqui woli' chʌn q'uelob ch'oyol bʌ ti panchan.

² Ñoxix Elí, wolix i yajpel i wut. Jump'ejl ac'ʌlel che' ñolol ti' wʌyib Elí,

³ che' maxto yajpemic i lámpara Dios, ya' ñolol ja'el jini ch'iton Samuel ti' Templo lac Yum.

⁴ Lac Yum tsi' pʌyʌ Samuel. Tsi' jac'ʌ: Um ba' añon, che'en.

⁵ Ti ajñel tsa' majli ba'an Elí. Tsi' sube: Um ba' añon. ¿Chuqui a wom? ¿Chucoch tsa' pʌyʌyon? che'en. Elí tsi' sube: Ma'anic wolic pʌyet, che'en. Tsa' cha' majli ti ñoltʌl.

⁶ Lac Yum tsi' cha' pejca Samuel. Ti ora tsa' cha' ch'ojyi, tsa' majli ba'an Elí. Tsi' sube: Um ba'añon. Tsa cubi wola' pʌyon. ¿Chuqui a wom? che'en. Elí tsi' jac'ʌ: Calobil, ma'anic wolic pʌyet. Cha' cucux ti ñoltʌl, che'en.

⁷ Maxto cʌmbilic i cha'an Samuel i t'an lac Yum. Maxto anic ba' ora tsi' yubibe i t'an.

⁸ Lac Yum tsi' cha' pejca Samuel ti' yuxyajlel. Tsa' cha' tejchi, tsa' majli ba'an Elí. Tsi' sube: Um ba'añon. ¿Chuqui a wom? Tsa cubi wola' pʌyon, che'en. Che' jini tsa' caji i ña'tan Elí, lac Yum woli' pʌy Samuel.

⁹ Tsi' cha' sube: Cha' cucux ti ñoltʌl. Che' ma' cha' ubiben i t'an che' an majch mi' cha' pʌyet, yom ma' jac'ben che' bajche' iliyi: “Subeñon chuqui a wom, c Yum, come a winicon. Wolic ñich'tañet”. Che' yom ma' jac'ben, che'en. Che' jini Samuel tsa' cha' majli ti ñoltʌl ya' ba' mi' wʌyel.

¹⁰ Lac Yum tsa' cha' tili ti wa'tʌl ti' tojlel Samuel. Tsi' cha' pʌyʌ che' bajche' tsi' pejca ti ñaxan. Tsi' yʌlʌ: Samuel, Samuel, che'en. Samuel tsi' jac'ʌ: Subeñon chuqui a wom c Yum, come a winicon. Wolic ñich'tañet, che'en.

¹¹ Lac Yum tsi' sube: Ubin chuqui mi caj c mel ti' tojlel israelob. Majqui jach mi' yubin, mi caj i toj sajtel i pusic'al.

¹² Ti jump'ejl jach q'uin mi caj c ts'ʌctesan c t'an ti' contra Elí yic'ot ti' contra i yalobilob. Ti jini jach bʌ q'uin che' mi' tejchel que'tel ti' tojlelob mi' joloñel.

¹³ Tsa'ix c sube Elí cha'an mi caj cʌq'ueñob i toj i mul i yalobilob yic'ot i p'olbalob ti pejtelel ora, come ña'tʌbil i cha'an Elí woli' wajleñoñob, pero ma'anic tsi' ju'sʌbeyob i pusic'al.

¹⁴ Jini cha'an tsa'ix c subeyob Elí yic'ot i pi'ʌlob ma'anix mi caj c ñusʌbeñob i mul. Mach mejlic ti ñusʌntel i mul yic'ot pulbil bʌ c majtan, mi yan tac bʌ c majtan, che'en lac Yum.

¹⁵ Ya' jach ñolol tsa' cʌle Samuel c'ʌlʌl tsa' sʌc'a pañimil. Che' jini tsa' ch'ojyi, tsi' jamʌ i yotot lac Yum. Pero woli ti bʌq'uen cha'an i t'an lac Yum. Mach yomic i suben Elí jini tsa' bʌ i sube lac Yum.

¹⁶ Elí tsi' pʌyʌ Samuel: La', calobil Samuel, che'en. Wʌ' añon, che'en Samuel.

¹⁷ Elí tsi' c'ajtibe: ¿Chuqui tsi' subeyet lac Yum? A wocolic subeñon. Mach yomic ma' muc. La' i yʌq'ueñet a toj Dios mi ma'anic ma' cha' subeñon pejtelel chuqui tsi' subeyet, che'en.

¹⁸ Che' jini Samuel tsi' laj tsictesʌbe chuqui tsi' sube lac Yum. Ma'anic chuqui tsi' mucu. Elí tsi' jac'be: Jiñʌch lac Yum. La' i mel che' bajche' yom, che'en.

¹⁹ Tsi' taja i colel Samuel. Lac Yum tsa' ajni yic'ot ti jujump'ejl q'uin. Jini winicob x'ixicob tsi' p'isiyob ti wenta.

²⁰ Pejtelel israelob ya' ti Dan c'ʌlʌl ti Beerseba tsi' ña'tayob jiñʌch xuc'ul bʌ x'alt'an i cha'an lac Yum.

²¹ Tsa' caji i cha' pʌs i bʌ lac Yum ya' ti Silo, come tsi' pejca Samuel. Tsi' yʌc'ʌ i bʌ ti cʌjñel ti' t'an.