1 Samuel 27 - Chol: I T’an Dios

David ti' tojlel filisteojob

¹ David tsa' caji' yʌl ti' pusic'al: Mach jalix mi caj c chʌmel, come ti jujump'ejl q'uin bʌbʌq'uen mi' tsʌnsañon Saúl. Yom mic puts'el majlel ba'an filisteojob cha'an ma'anix mi' chʌn ña'tañon Saúl. Anquese mi' chʌn sʌclañon ti pejtelel i lumal Israel, mach i tajayonic. Che' tsi' ña'ta David.

² Jini cha'an David yic'ot jini lujunc'al i cha'bajc' (600) i winicob tsa' c'axiyob majlel ba'an Aquis (i yalobil Maoc) jini yumʌl ti Gat.

³ Tsa' chumle David yic'ot i winicob ba'an Aquis ya' ti Gat. Ya' añob yic'ot i pi'ʌlob yic'ot i yalobilob. Ya'an David yic'ot cha'tiquil i yijñam, Ahinoam jini jezreel yic'ot Abigail tsa' bʌ cʌle ti meba' che' bʌ tsa' chʌmi Nabal ch'oyol bʌ ti Carmel.

⁴ Tsa' subenti Saúl majlemix David ti Gat. Jini cha'an Saúl ma'anix tsa' chʌn caji i sʌclan.

⁵ David tsi' sube Aquis: Mi uts'at ma' q'uelon, la' aq'uenticon cajñib ti jump'ejl alʌ tejclum cha'an mic chumtʌl ya'i. ¿Chuqui to i ye'tel mic chʌn chumtʌl ti jini ñuc bʌ tejclum? che'en.

⁶ Jini cha'an ti jim bʌ q'uin Aquis tsi' yʌq'ue jini tejclum Siclag. Jini cha'an Siclag i cha'anix i reyob Judá c'ʌlʌl wʌle.

⁷ Jump'ejl jab yic'ot chʌmp'ejl uw ya' chumul David ti' lumal filisteojob.

⁸ An i tajol tsa' loq'ui David yic'ot i winicob cha'an mi' contrajiñob jini gesurob, yic'ot jini gezrob, yic'ot jini amalecob, jini chumulo' bʌ ti xchumtʌl tac, c'ʌlʌl ti Shur yic'ot ti' bijlel Egipto ba' chumulob c'ʌlʌl ti oñiyi.

⁹ David tsi' jisa pejtelel jini xchumtʌl. Tsi' laj tsʌnsa winicob x'ixicob. Tsi' ch'ʌmʌ majlel tiñʌme', wacax, burro tac, camello yic'ot i pislelob winicob x'ixicob. Che' jini tsa' cha' sujti majlel ba'an Aquis.

¹⁰ Che' bʌ tsi' c'ajtibe Aquis: ¿Baqui tsa' cha'le guerra sajmʌl? David tsi' jac'be: Ya' ti Neguev ti Judá, yic'ot ya' ti Neguev Jerameel, yic'ot ya' ti Neguev ba'an ceneojob, che'en.

¹¹ David tsi' laj tsʌnsayob. Ma'anic tsi' cʌyʌ mi juntiquilic winic x'ixic cha'an mi' pʌy majlel ti Gat. Tsi' yʌlʌ: Ame anic majch mi' sub chuqui tsac mele, che'en. Che'ʌch tsi' mele David ti pejtelel ora che' ya' chumul ti' lumal filisteojob.

¹² Jini Aquis tsi' ñopo pejtelel chuqui tsi' sube David. Tsi' ña'ta Aquis: Jini cha'an woli ti ts'a'lentel David ti' tojlel israelob. Jini cha'an wersa mi caj i yajñel la quic'ot. Mi caj i coltañon. Che' tsi' lon ña'ta Aquis.