1 Samuel 26 - Chol: I T’an Dios

David ma'anic tsi' tsʌnsa Saúl ya' ti Zif

¹ Winicob loq'uemo' bʌ ti Zif tsa' tiliyob ba'an Saúl ti Gabaa. Tsi' subeyob: Ya'ix mucul David ti bujtʌl i c'aba' Haquila ti' tojel i tiquiñal pañimil ba' mi' pasel q'uin.

² Che' jini Saúl tsa' jubi majlel ya' ti' tiquiñal pañimil i c'aba' Zif. Tsi' pʌyʌ majlel uxp'ejl mil winicob yajcʌbilo' bʌ ti Israel cha'an mi' sʌclañob David ya' ti' tiquiñal pañimil.

³ Tsa' jijli Saúl ti bujtʌl i c'aba' Haquila ti' t'ejl jini bij ya' ti' tojel i tiquiñal pañimil. Ya'an David ti' tiquiñal pañimil. Yujil wolix i sʌclan Saúl.

⁴ Jini cha'an David tsi' choco majlel xq'uelojelob. Che' jini tsa' caji' ña'tan ti isujm lʌc'ʌlix an Saúl.

⁵ Ti ora jach tsa' majli David ti jini wits ba' tsa' jijli Saúl. Tsi' q'uele baqui jijlemob Saúl yic'ot Abner i yalobil Ner. Jini Abner jiñʌch ñuc bʌ i yum soldadojob. Joyol Saúl ti' soldadojob ya' ba' wʌyʌlob.

⁶ David tsi' sube Ahimelec jini heteo yic'ot Abisai (i yalobil Sarvia) i yʌscun Joab: ¿Majqui yom majlel quic'ot ya' ba' jijlem Saúl? che'en. Abisai tsi' yʌlʌ: Joñon, che'en.

⁷ Ti ac'ʌlel tsa' ch'ojyiyob David yic'ot Abisai ya' ba' wʌyʌlob soldadojob. Wʌyʌl Saúl. Ts'ʌpʌl i cha'an i lanza ya' ti' t'ejl i jol. Ya' ñolol Abner ti' t'ejl i yum yic'ot pejtelel soldadojob ti' joytʌlel Saúl.

⁸ Abisai tsi' sube David: Dios tsa'ix i yʌq'ueyet a contra. Jini cha'an la' c ts'ʌb jec' yic'ot jini lanza. Ti junyajl jach mi caj c jec'. Jasʌl junyajl. Ma'anic mi caj c jec' cha'yajl, che'en.

⁹ David tsi' jac'be Abisai: Mach a tic'lan. Come jini mu' bʌ i tic'lan jini yajcʌbil bʌ i cha'an lac Yum mi caj i toj i mul, che'en.

¹⁰ Tsi' cha' alʌ David: Isujm woli bʌ c subeñet che' bajche' cuxul lac Yum. Lac Yum mi caj i low. Machiqui, yʌlol jach mi' caj ti chʌmel che' i yorajlelix, o mi' caj ti chʌmel ti guerra.

¹¹ La' i tic'on lac Yum ame mic tic'lan jini yajcʌbil bʌ i cha'an. Pero ch'ʌmʌ jini lanza yic'ot jini ja' am bʌ ti' t'ejl. Conixla, che'en.

¹² David tsi' ch'ʌmʌ majlel jini lanza yic'ot jini ja' am bʌ ti' t'ejl i jol Saúl. Tsa' majliyob. Ma'anic majqui tsi' q'ueleyob. Ma'anic majqui cañal i wut. Ma'anic majqui tsi' ña'ta, come lac Yum tsi' yotsʌbeyob tam bʌ i wʌyel.

¹³ Che' jini tsa' letsi majlel David ti yambʌ wits. Ñajt tsa' wa'le ti' pam jini bujtʌl.

¹⁴ David tsi' yota jini soldadojob yic'ot Abner i yalobil Ner. Tsi' yʌlʌ: Abner, ¿mach ba anic ma' jac'? che'en. Che' jini Abner tsi' jac'ʌ: ¿Majquiyet mu' bʌ a wotan c rey? che'en.

¹⁵ David tsi' jac'ʌ: ¿Mach ba jatetic jini ñuquet bʌ winic? ¿Mach ba cabʌlic a c'ʌjnibal ti Israel? ¿Chucoch ma'anic tsa' wen cʌnta jini rey? Come tsa' tili winic i tsʌnsan a yum, jini rey.

¹⁶ Ili tsa' bʌ a mele mach uts'atic. Isujm woli bʌ c subeñet che' bajche' cuxul lac Yum. Mi caj a chʌmel, come ma'anic tsa' wen cʌnta jini rey yajcʌbil bʌ i cha'an lac Yum. Q'uele wʌ'an tij c'ʌb i lanza jini rey yic'ot i buxil i ya'al tsa' bʌ c chilbe. Che' tsi' yʌlʌ David.

¹⁷ Saúl tsi' cʌmbe i t'an David. Tsi' yʌlʌ: ¿Mach ba jinic a t'an calobil David? che'en. David tsi' jac'ʌ: Joñon cu c yum, reyet bʌ c cha'an, che'en.

¹⁸ Tsi' cha' alʌ: ¿Chucoch woli a wajñesañon? ¿Chuqui tsac tumbeyet? ¿Am ba chuqui jontol tsac melbeyet?

¹⁹ Jini cha'an mij c'ajtibeñet ti wocol t'an, ñich'tʌbeñon. Mi jiñʌch lac Yum tsa' bʌ i chocoyet tilel tij contra, la' i ch'ʌm i majtan tic tojlel. Pero mi jiñobʌch winicob tsa' bʌ i chocoyet tilel cha'an ma' tsʌnsañon, la' chojquicob loq'uel cha'an lac Yum. Come woli' chocoñob loq'uel tic lum yic'ot ti' tojlel c pi'ʌlob i cha'año' bʌ lac Yum. Woli' xic'oñob cha'an mic majlel c ch'ujutesan yan tac bʌ dios.

²⁰ Mach yomic mic tsʌnsʌntel ti yambʌ lum ba' mach cʌmbilic lac Yum. I rey israelob wolix i sʌclan ñumel ch'ʌc yilal che' bajche' winicob mi' sʌclañob xchʌlʌl ti mate'el. Che' tsi' yʌlʌ David.

²¹ Saúl tsi' jac'ʌ: Tsa'ix c cha'le mulil. Sujten, calobil David. Ma'anix mi caj c tic'lañet, come sajmʌl tsa' pʌsbeyon i yutslel a pusic'al. Tontojon. Ñucʌch c sajtemal, che'en.

²² David tsi' jac'ʌ: Wʌ'an a lanza. La' tilic juntiquil a winic cha'an mi' ch'ʌmbeñet majlel.

²³ Lac Yum mi caj i yʌq'ueñob i majtan jini tojo' bʌ winicob xuc'ulo' bʌ i pusic'al. Sajmʌl lac Yum tsi' yʌc'ʌyet tij c'ʌb, pero joñon ma'anic tsac letsa j c'ʌb ti a contra, come yajcʌbilet i cha'an lac Yum.

²⁴ P'isi ti wenta chuqui tsac mele. Ma'anic tsac tsʌnsayet. La' i p'untañon c Yum che' bajche' tsac p'untayet cha'an chʌn cuxul mi cajñel. La' i yʌc'on ti colel ti pejtelel wocol, che'en David.

²⁵ Saúl tsi' sube: Tijicñayet, calobil David. Come ti isujm mi caj a cha'len ñuc bʌ a melbal. Mi caj i mʌjlel a cha'an, che'en. Che' jini David tsa' majli ti' bijlel. Saúl tsa' sujti ti' yotot.