1 Samuel 25 - Chol: I T’an Dios

David yic'ot Abigail

¹ Tsa' chʌmi Samuel. Tsi' tempayob i bʌ pejtelel israelob. Tsi' yuc'tayob. Tsi' mucuyob ya' ba'an i yotot ti Ramá. David tsa' majli ti' tiquiñal pañimil i c'aba' Parán.

² Ya'an wen chumul bʌ winic ti Maón. An i cha'an ñuc bʌ i lum ya' ti Carmel. Cabʌl i chubʌ'an. An i cha'an uxp'ejl mil tiñʌme' yic'ot jump'ejl mil chivo. Woli' set'ben loq'uel i tsutsel i tiñʌme' ya' ti Carmel.

³ I c'aba' jini winic jiñʌch Nabal. I c'aba' i yijñam jiñʌch Abigail. Jini x'ixic wen an i ña'tʌbal. Che' ja'el wen i t'ojol jax. Pero jini winic tsʌts i pusic'al. Jontol ja'el. I p'olbalʌch Caleb.

⁴ David tsi' yubi woli' set'ben i tsutsel i tiñʌme' Nabal.

⁵ Tsi' choco majlel lujuntiquil i winicob. Tsi' sube x'e'telob i cha'an: Letsenla majlel ti Carmel. Che' mi la' c'otel ba'an Nabal, aq'uenla cortesía tij c'aba'.

⁶ Mi caj la' suben: “La' ajniquet ti' ñʌch'tʌlel a pusic'al temel yic'ot a pi'ʌlob.

⁷ Tsa cubi wolix a tsepben i tsutsel a tiñʌme'. Ña'tan che' jini, cabʌl tsa' ajniyob a waj cʌnta tiñʌme'ob quic'ot lojon. Ma'anic tsac tic'la lojon. Ma'anic chuqui tsac chilbeyob lojon che' ya'añob quic'ot lojon ti Carmel.

⁸ Melel chuqui mic sub. C'ajtiben x'e'telob a cha'an. Mi cajel i subob. A wocolic la' i tajob i yutslel a t'an ili ch'iton winicob come tilemon lojon che' woliyetla ti q'uiñijel. Mij c'ajtibeñet ti wocol t'an cha'an ma' wʌq'ueñon lojon ts'ita' i bʌl lojon c ñʌc' ja'el. Aq'uen a walobil David yic'ot i winicob come x'e'telon lojon a cha'an”. Che' yom mi la' suben Nabal, che'en David.

⁹ Che' bʌ tsa' c'otiyob ili ch'iton winicob chocbilo' bʌ majlel i cha'an David, tsi' subeyob Nabal pejtelel ili t'an ti' c'aba' David. Tsa' ujtiyob ti t'an. Tsa' ñʌjch'iyob.

¹⁰ Nabal tsi' jac'beyob: ¿Majqui jini David? Mach j cʌñʌyic i yalobil Isaí. Añobix cabʌl x'e'telob mu' bʌ i puts'elob loq'uel ti' wenta i yumob.

¹¹ Q'uele c waj yic'ot c ja'al yic'ot we'elʌl tsa' bʌ c chajpʌbeyob c winicob woli bʌ i set'beñob i tsutsel c tiñʌme'. ¿Yom ba mic chilbeñob cha'an mic t'oxbeñob winicob mach bʌ cʌñʌlobic c cha'an? Mach cujilic baqui ch'oyoletla. Che' tsi' yʌlʌ Nabal.

¹² Jini ch'iton winicob chocbilo' bʌ majlel cha'an David tsa' cha' sujtiyob ti' bijlel. Che' bʌ tsa' tiliyob ba'an David, tsi' subeyob pejtelel ili t'an.

¹³ Jini cha'an David tsi' sube i winicob: Cʌchʌla la' wespada ti la' ñʌc' ti la' pejtelel, che'en. Che' jini tsi' cʌchʌyob i yespada. Tsi' pi'leyob majlel David jumbajc' winicob. Tsi' cʌyʌyob lujunc'al winicob cha'an mi' cʌntʌbeñob i chubʌ'an.

¹⁴ Pero juntiquil x'e'tel i cha'an Nabal tsa' majli i suben Abigail i yijñam Nabal. Tsi' yʌlʌ: David tsi' choco tilel suboñelob ya' ti' tiquiñal pañimil cha'an mi' yʌq'ueñob cortesía c yum, pero tsa' jach i yʌ'le.

¹⁵ Pero jini winicob tsi' wen pʌsbeyon lojon i yutslel i pusic'al. Ma'anic tsi' tic'layon lojon. Ma'anic chuqui tsac cha'le lojon falta ti pejtelel q'uin che' ya' añob quic'ot lojon ya' ba' tsaj cʌnta lojon jini tiñʌme' ti jamil.

¹⁶ Tsi' mʌctayon lojon che' bajche' ts'ajc ti q'uiñil yic'ot ti ac'ʌlel, ti pejtelel q'uin che' bʌ tsaj cʌnta lojon tiñʌme' ya' ba' añob.

¹⁷ Jini cha'an ña'tan bajche' yom ma' mel, come jontol c yum. Bʌbʌq'uen mi caj i jisʌntel yic'ot pejtelel i pi'ʌlob cha'an i jontolil. Ma'anic majch mi mejlel i pejcan, che'en.

¹⁸ Ti ora Abigail tsi' ch'ʌmʌ lujunc'al caxlan waj yic'ot cha'p'ejl i yajñib vino melbil bʌ ti pʌchi yic'ot jo'cojt tiñʌme' tic'anix bʌ yic'ot jo'cujch trigo, yic'ot jo'c'al ti pets tiquesʌbil bʌ ts'usub yic'ot lujunc'al ti pets i wut higuera te' tiquinix bʌ. Tsi' laj letsʌbe ti' pat i burro tac cha'an mi' cuch majlel.

¹⁹ Abigail tsi' sube x'e'telob i cha'an: Ñaxan yom mi la' majlel ti' tojel c wut. Mux c tsʌcleñetla majlel, che'en. Ma'anic chuqui tsi' sube i ñoxi'al.

²⁰ C'ʌchʌl ti burro Abigail woli' jubel majlel ti wits che' bʌ tsi' q'uele wolix i tilel David yic'ot i winicob. Tsi' tajyob i bʌ.

²¹ David tsi' yʌlʌ ti' pusic'al che' maxto i q'uele: Lolom jach tsaj cʌntʌbe pejtelel i chubʌ'an jini Nabal ya' ti' tiquiñal pañimil. Ma'anic chuqui tsac chilbe. Tsac wen colta. Pero wʌle jontol woli' q'uextʌbeñon pejtelel chuqui tsac melbe, che'en.

²² Mich' David tsi' yʌc'ʌ i t'an: La' i tic'lañon Dios mi ma'anic mic tsʌnsan pejtelel jini winicob año' bʌ ti' wenta Nabal ti wʌle jach bʌ ac'ʌlel, che'en.

²³ C'ʌchʌl Abigail che' bʌ tsi' q'uele David. Tsa' bʌc' wa'le ti lum. Tsi' ñocchoco i bʌ ti' tojlel David.

²⁴ Tsi' pʌcchoco i bʌ ti' yoc. Tsi' yʌlʌ: C yum, ac'ʌ tic wenta ili mulil. Joñon a mozojon. Poj ñich'tʌbeñon c t'an. Mux c laj sub.

²⁵ Mach a p'is ti wenta i mul jini jontol bʌ winic Nabal, come lajal i sujmlel i c'aba' che' bajche' i pusic'al Nabal. Tonto i sujmlel i c'aba', tonto i pusic'al ja'el. Joñon a mozojon. Ma'anic tsaj q'uele jini winicob tsa' bʌ a choco tilel.

²⁶ Tijicña a pusic'al mi caj a wubin come lac Yum tsi' tiq'uiyet ti tsʌnsa che' mich'et, ame a bajñel q'uextʌben i mul Nabal. Cuxul lac Yum mu' bʌ caj i laj jisan a contrajob yic'ot jini yomo' bʌ' i jisañet.

²⁷ Q'uele ja'el a majtan, c yum. Tsac chajpʌbeyet ja'el pejtelel jini majtañʌl. La' aq'uenticob a winicob woli bʌ i coltañetob.

²⁸ A wocolic, ñusʌbeñon c mul cha'an wolic pejcañet. Lac Yum mi caj i xuc'chocobeñet a yumʌntel mach bʌ yujilic jilel ti pejtelel ora. Woli' coltañet ti guerra come i winiquet. Woli a melben i ye'tel che' ma' cha'len guerra. Tojet ti' tojlel c'ʌlʌl che' alʌlet to.

²⁹ Majqui jach mi' tic'lañet, mach mejlic i tsʌnsañet, come lac Yum Dios an a wic'ot. Junsujm jach a cuxtʌlel yic'ot i cuxtʌlel. Mi caj i cʌntañet. Dios mi caj i jisan a contrajob. Mi caj i chocob loq'uel che' bajche' tun ti' yojlil i pʌchʌlel pʌrʌntun.

³⁰ Lac Yum mi caj i ts'ʌctesʌbeñet pejtelel i t'an tsa' bʌ i wʌn alʌ. Mi caj i yotsañet ti yumʌl ti Israel.

³¹ Che' jini tijicñayet mi tsa' cʌnta a bʌ, pero mach tijicñayetic mi tsa' cha'le tsʌnsa, mi tsa' bajñel q'uextʌbe i mul a contra. Che' mi' yʌq'ueñet lac Yum i tijicñʌyel a pusic'al, yom ma' ña'tañon come xuc'ulon a wic'ot. Che' tsi' yʌlʌ Abigail.

³² Che' jini David tsi' sube Abigail: La' sujbic i ñuclel lac Yum i Dios Israel tsa' bʌ i chocoyet tilel wʌle cha'an ma' tajon ti bij.

³³ Wocolix i yʌlʌ Dios, an cabʌl a pusic'al. Tsa' tili a lajmesan c mich'ajel. Machic tsa' tiliyet, tsac cha'le tsʌnsa, tsaj q'uextʌbe i jontolil jini winic.

³⁴ Isujm mu' bʌ c subeñet, come mic bʌc'ñan lac Yum i Dios Israel tsa' bʌ i coltayon cha'an ma'anic mic tic'lañet. Machic tsa' bʌc' tili a tajon, ma'anic majch mi' cʌytʌl mi juntiquilic i winic Nabal. Ijc'ʌl che' ti sʌc'ajel laj chʌmeñobix machic tsa' tili a mʌctañon, che'en.

³⁵ Che' jini David tsi' ch'ʌmʌ pejtelel i majtan tsa' bʌ i ch'ʌmbe tilel Abigail. Tsi' sube: Cha' cucux ti a wotot ti' ñʌch'tʌlel a pusic'al, come tsa'ix c jac'beyet a t'an. Tsa'ix c p'isiyet ti wenta, che'en.

³⁶ Abigail tsa' cha' majli ti' yotot. Ya'an Nabal. Wolix i mel q'uin che' bajche' ñuc bʌ yumʌl. Yʌquix Nabal. Wen tijicña tsi' yubi. Jini cha'an ma'anic chuqui tsi' sube jinto ti' yijc'ʌlal.

³⁷ Ti yijc'ʌlal che' cha' c'ajalix i yo Nabal, i yijñam tsi' sube pejtelel chuqui tsa' ujti. Tsa' tsʌts'a i pusic'al che' bajche' jump'ejl xajlel.

³⁸ Ñumenix lujump'ejl q'uin, lac Yum tsi' yʌc'ʌ ti bʌc' chʌmel ti ora. Tsa' chʌmi Nabal.

³⁹ Che' bʌ tsi' yubi David chʌmenix Nabal, tsi' yʌlʌ: La' sujbic i ñuclel lac Yum, come tsi' cha'le toj bʌ meloñel. Tsi' cʌntayon cha'an ma'anic mic cha'len jontolil. Lac Yum tsi' q'uextʌbe i jontolil Nabal, che'en. David tsi' choco majlel i winicob ba'an Abigail cha'an mi' pʌy cha'an i yijñam.

⁴⁰ I winicob David tsa' c'otiyob ba'an Abigail ti Carmel. Tsi' subeyob: David tsi' chocoyon lojon tilel c pʌyet majlel cha'an ma' wochel ti' yijñam, che'ob.

⁴¹ Tsa' ch'ojyi. Tsi' ñucchoco i wut ti lum. Tsi' yʌlʌ: Yom cu. Um ba' añon. Muq'uix c peq'uesan c bʌ c melbeñob i ye'tel i winicob c yum, che'en.

⁴² Ti ora tsi' chajpa i bʌ Abigail. Tsi' pʌyʌ majlel jo'tiquil i criadajob. C'ʌchʌl tsa' majli ti burro. Tsi' tsʌcle majlel i winicob David. Tsa' ochi ti' yijñam David.

⁴³ Anix yambʌ i yijñam David i c'aba' Ahinoam ch'oyol bʌ ti Jezreel. Che' jini cha'tiquilobix i yijñam.

⁴⁴ Come majlemix Mical jini ñaxan bʌ i yijñam David. Saúl, i tat Mical, tsi' yʌq'ue Palti (i yalobil Lais ch'oyol bʌ ti Galim) cha'an i yijñam.