1 Samuel 20 - Chol: I T’an Dios

David yic'ot Jonatán tsi' wen c'uxbiyob i bʌ

¹ Ti ajñel tsa' loq'ui David ti Naiot am bʌ ti Ramá. Tsa' c'oti ba'an Jonatán. Tsi' sube: ¿Chuqui tsac mele? ¿Chuqui c mul? ¿Chucoch yom i tsʌnsañon a tat? che'en.

² Tsi' sube: Mach yomic. Ma'anic mi caj a chʌmel. Jini c tat ma'anic chuqui mi caj i mel che' ma'anic mi' ñaxan subeñon. Mi ñuc mi ch'o'ch'oc mux c laj tsictesʌbeñet. Ma'anic mi' mucbeñon c tat chuqui woli' ña'tan i mel. Melel mic subeñet, che'en Jonatán.

³ Pero David tsi' cha' ac'ʌ i t'an: Wen yujil a tat c'ux ma' wubiñon. Jini cha'an mi caj i yʌl: “Ma'anic mi caj c suben Jonatán ame ch'ijiyemic i pusic'al mi caj i yubin”, che' mi caj i yʌl. Pero isujmʌch jini mu' bʌ c subeñet, come mic bʌc'ñan lac Yum. Cujil bʌbʌq'uen mic chʌmel, che'en.

⁴ Jonatán tsi' sube David: Subeñon chuqui a wom mic melbeñet. Muc'ʌch j coltañet, che'en.

⁵ David tsi' jac'be: Ña'tan che' jini, ijc'ʌl jiñʌch tsiji' bʌ uw. An c mul ti' tojlel a tat che' ma'anic mic buchtʌl yic'ot che' i yorajlelix c'ux waj. Mach talonic. Mi caj c muc c bʌ cha'p'ejl q'uin ti mate'el. Chabi to mic tilel ti och'ajel q'uin.

⁶ Mi tsi' ña'tayon a tat, yom ma' suben: “Tsi' c'ajtibeyon ti wocol t'an David cha'an yom sujtel ti Belén ti' yotot i tat, come ya' woli' tempañob i bʌ i pi'ʌlob cha'an mi' melob jini q'uin cha'an tsʌnsʌbil bʌ majtañʌl che' bajche' i tilel ti jujump'ejl jab”. Che'ʌch yom ma' suben.

⁷ Mi uts'at mi' yubin a t'an, uts'at añon ti' tojlel che' jini. Pero mi tsa' mich'a, ña'tan che' jini yomʌch i tsʌnsañon.

⁸ Yom xuc'ulet quic'ot, come tsa'ix lac laja lac t'an ti' tojlel lac Yum. Mi an c mul, tsʌnsañon jatet. Mach wersajix ma' pʌyon majlel ba'an a tat, che'en.

⁹ Jonatán tsi' sube: Ma'anic a mul. Mi caj j coltañet. Mi tsa cubi woli' ña'tan jontolil ti a tojlel, mic bʌc' tsictesʌbeñet, che'en.

¹⁰ Che' jini David tsi' sube Jonatán: ¿Bajche' mi caj a tsictesʌbeñon mi tsi' jac'beyet ti mich' bʌ t'an jini a tat? che'en.

¹¹ Jonatán tsi' yʌlʌ: Conla ti jamil. Mux c subeñet, che'en. Che' jini temel tsa' majliyob ti jamil.

¹² Jonatán tsi' sube David: Testigojʌch lac Yum i Dios Israel. Ijc'ʌl che' ti ili ora o mi chabi mi caj c pejcan c tat che' mi' c'ajtibeñon baqui añet. Che' jini mi caj c chocbeñet t'an cha'an ma' ña'tan.

¹³ Mi woli' ña'tan i tic'lañet c tat, mi caj c tsictesʌbeñet cha'an ma' puts'el ti' ñʌch'tʌlel a pusic'al. Mi ma'anic mic mel che' bajche' wolic subeñet, la' c toj yic'ot Dios. La' ajnic lac Yum a wic'ot che' bajche' tsa' ajni yic'ot c tat.

^14-15 Che' cuxulon to xuc'ul mi caj a pʌsbeñon i yutslel a pusic'al. Che' ja'el mi tsa' chʌmiyon mi cajel a chʌn p'untan c pi'ʌlob. Lac Yum mi caj i jisan a contrajob ila ti pañimil. Che' laj jisʌbilobix, mach a cʌy a pʌsbeñon lojon i yutslel a pusic'al.

¹⁶ Lac Yum mi caj i yʌq'ueñet a toj a mul ti' c'ʌbob a contrajob mi ma'anix ma' chʌn p'untañon lojon, che'en Jonatán. Che'ʌch tsi' lajayob i t'an ti' tojlel lac Yum Jonatán yic'ot David.

¹⁷ Jonatán tsi' c'ajtibe David cha'an mi' cha' ac' i t'an, come wen c'ux tsi' yubi. Lajal tsi' c'uxbi che' bajche' tsi' bajñel c'uxbi i bʌ.

¹⁸ Jonatán tsi' sube: Ijc'ʌl an tsiji' bʌ uw. Mi cajel i ña'tan Saúl majlemetix come jochol a buchlib.

¹⁹ Uxi yom ma' jubel tilel baqui tsa' mujcu a bʌ ti yambʌ ora che' an a bʌq'uen ti' tojlel c tat. Pijtañon lʌc'ʌl ya' ba' ts'ʌlʌl xajlel.

²⁰ Mi caj c choc majlel uxts'ijt i te'el jalʌjb ya' ti a t'ejl. Mi caj c mel che' bajche' wolic chajpan c bʌ cha'an julbʌl.

²¹ Mi caj c suben majlel jini ch'iton cha'an mi' taj i te'el jalʌjb. Mi tsac sube: “Ya'an i te'el jalʌjb lʌc'ʌl ba'añet. Ch'ʌmʌ tilel”, mi cho'on, yom ma' tilel che' jini, come ma'anic bʌq'uen. Isujmʌch mu' bʌ c subeñet come mic bʌc'ñan lac Yum. Ma'anic a contrajintel che' jini.

²² Pero mi tsac sube jini ch'iton: “Ñajt to an i te'el jalʌjb ya' ba' wa'alet”, mi cho'on, cucux coltan a bʌ, che' jini, come lac Yum tsa'ix i chocoyet majlel.

²³ Chʌn ña'tan lac t'an wa'chocobil bʌ lac cha'an. Tsa'ix i yubi lac Yum am bʌ ti lac tojlel ti pejtelel ora, che'en Jonatán.

²⁴ David tsi' mucu i bʌ ti jamil. Che' bʌ tsa' c'oti i yorajlel jini tsiji' bʌ uw, tsa' buchle jini rey ti c'ux waj.

²⁵ Ya' buchul che' bajche' ti pejtelel ora ti' buchlib lʌc'ʌl ti ts'ajc. Wa'al Jonatán ti' ñoj i tat. Ya' buchul Abner ti' ts'ej Saúl. Jochol tsa' cʌle i buchlib David.

²⁶ Ti jim bʌ q'uin ma'anic chuqui tsi' yʌlʌ Saúl come tsi' lon ña'ta an chuqui tsa' ujti: Tic'ʌl mach sʌq'uesʌbilic David. Isujm mach sʌq'uesʌbilic, lon che'en ti' pusic'al.

²⁷ Pero che' ti' yijc'ʌlal jini tsiji' bʌ uw, jochol tsa' cha' cʌle i buchlib David. Saúl tsi' c'ajtibe Jonatán i yalobil: ¿Chucoch ma'anic tilem ti c'ux waj i yalobil Isaí? Sajmʌl yic'ot ac'bi ma'anic tsiquil, che'en.

²⁸ Jonatán tsi' jac'be: David tsi' c'ajtibeyon ti wocol t'an cha'an yom majlel ti Belén.

²⁹ Tsi' subeyon: “A wocolic mic subeñet, la' majlicon quic'ot c pi'ʌlob tic tejclum. Come woli' tsʌnsʌbeñob i majtan Dios. Wersa woli' pʌyon majlel cʌscun. A wocolic com ma' chocon majlel c jula'tan c pi'ʌlob”, che'en. Jini cha'an ma'anic tsa' tili ti buchtʌl wʌ' ti mesa ti' tojlel rey, che'en Jonatán.

³⁰ Che' jini Saúl tsa' mich'le Jonatán. Tsi' sube: Lajalet che' bajche' a ña' mach bʌ yujilic jac'ol. Lajal ma' chan'esan a bʌ. ¿Mach ba cujilic tsa' mele a bʌ ti amigo yic'ot i yalobil Isaí? Mi caj a wubin quisin. Che' ja'el wola' wʌc' ti quisin a ña'. Cujil bajche' mi caj i yujtel.

³¹ Che' cuxul to David ila ti pañimil ma'anic mi caj a cha'len yumʌntel. Mach xuc'ulic mi caj i yajñel a yumʌntel. Choco majlel winicob cha'an mi' pʌyob tilel ba' añon. Wersa mi' cajel ti chʌmel, che'en Saúl.

³² Jonatán tsi' jac'be: ¿Chucoch mi' cajel ti chʌmel? ¿Chuqui i mul? che'en.

³³ Saúl tsi' choco junts'ijt lanza cha'an mi' tsʌnsan i yalobil. Che' jini tsi' ch'ʌmbe isujm Jonatán melelʌch wolix i ña'tan i tsʌnsan David.

³⁴ Wen mich' tsa' ch'ojyi ti mesa Jonatán. Ma'anix tsa' chʌn tili ti c'ux waj ti' yijc'ʌlal jini tsiji' bʌ uw. Ch'ijiyem i pusic'al cha'an ti' caj David come jontol Saúl ti' tojlel.

³⁵ Che' ti yambʌ q'uin ti sʌc'ajel tsa' loq'ui Jonatán ti jamil ti' yorajlel che' bajche' tsi' wʌn sube David. Tsa' majli alʌ ch'iton yic'ot.

³⁶ Jonatán tsi' sube jini ch'iton: Cucu ti ajñel. Sʌclan i te'el jini jalʌjb mu' bʌ caj c choc, che'en. Che' woli' ti ajñel jini ch'iton, ñajt to tsi' choco. Tsi' ñusa jini ch'iton.

³⁷ Che' bʌ tsa' c'oti jini ch'iton ya' baqui an i te'el jalʌjb tsa' bʌ i choco Jonatán, Jonatán tsi' sube ti c'am bʌ t'an: Mach ya'ic an i te'el jalʌjb ya' ba' wa'alet. Ñajt to an, che'en.

³⁸ Tsi' cha' ota jini ch'iton: Cha'len ajñel. Se'ñun. Mach yomic ma' wa'tʌl, che'en. Che' jini tsi' tempa i te'el jalʌjb. Tsa' tili i cʌyben i yum.

³⁹ Cojach Jonatán yic'ot David tsi' ch'ʌmbeyob isujm. Pero jini ch'iton ma'anic tsi' ña'ta chuqui i ye'tel.

⁴⁰ Jonatán tsi' yʌq'ue i jalʌjb jini ch'iton. Tsi' sube: Cucux, ch'ʌmʌ majlel ya' ti tejclum, che'en.

⁴¹ Che' majlemix jini ch'iton, tsa' loq'ui David ya' ba' mucul ti' pat jini much'ul bʌ xajlel. Tsi' pʌcchoco i bʌ uxyajl ti' tojlel Jonatán. Tsi' ts'ujts'uyob i bʌ. Tsi' cha'leyob uq'uel. Jal tsa' mejli i tic' i bʌ ti uq'uel David.

⁴² Jonatán tsi' sube: Cucu ti' ñʌch'tʌlel a pusic'al. Come ti lac cha'ticlel tsa'ix la cʌc'ʌ lac t'an ti' c'aba' lac Yum. Lac Yum mi caj i yajñel ti lac tojlel yic'ot ti' tojlel lac p'olbal, che'en. Che' jini tsa' majli David. Tsa' sujti ti tejclum Jonatán.