1 Samuel 19 - Chol: I T’an Dios

Saúl tsi' ña'ta i tsʌnsan David

¹ Saúl tsi' sube Jonatán i yalobil yic'ot pejtelel x'e'telob i cha'an, cha'an mi' tsʌnsañob David. Pero ma'anic tsi' jac'ʌ Jonatán come c'uxatax tsi' yubi David.

² Jonatán tsi' sube: Yom i tsʌnsañet c tat. Jini cha'an yom ma' tsajin a bʌ. Pijtañon ijc'ʌl ti sʌc'ajel ya' ba' ma' puts'el cha'an ma' muc a bʌ.

³ Ya' talon quic'ot c tat lʌc'ʌl ba' añet ti jamil. Che' mic pejcan lojon c bʌ mi caj c ña'tan chuqui mi caj i tumbeñet. Ti wi'il mic cha' subeñet, che'en.

⁴ Che' jini Jonatán tsa' caji' suben i tat: Uts'at i pusic'al David. Mach yomic ma' tic'lan David jini xuc'ul bʌ a winic, come ma'anic chuqui leco tsi' melbeyet. Uts'at pejtelel chuqui woli' mel.

⁵ Colelix i tsʌnsʌntel che' bʌ tsi' tsʌnsa jini filisteojob. Lac Yum tsi' c'ʌñʌ cha'an mi' coltan jini israelob che' bajche' tsa' q'uele ja'el. Tijicña a pusic'al tsa' wubi. ¿Chucoch che' jini mi caj a cha'len ñuc bʌ mulil? che'en.

⁶ Saúl tsi' wen ñich'tʌbe i t'an Jonatán. Tsi' yʌlʌ: Melel mic subeñet, come cuxul lac Yum, ma'anic mi caj i tsʌnsʌntel David, che'en.

⁷ Che' jini Jonatán tsi' pʌyʌ tilel David cha'an mi' cha' suben pejtelel jini t'an. Tsi' cha' pʌyʌ majlel ya' ti' yotot i tat. David tsi' cha' melbe i ye'tel jini rey che' bajche' ti yambʌ ora.

⁸ Tsa' cha' caji guerra. David tsa' loq'ui majlel cha'an mi' contrajin jini filisteojob. Tsa' mʌjli i cha'an. Cabʌl tsi' jisayob jinto tsa' laj puts'iyob.

⁹ Tsa' cha' c'oti ti' tojlel Saúl jini jontol bʌ espíritu chocbil bʌ tilel cha'an lac Yum. Ya' buchul Saúl ti' yotot, chucbil i cha'an i lanza. David woli' jats' jini arpa.

¹⁰ Saúl tsi' ñopo i sʌl jec' David ya' ti' ñʌc' ts'ajc. Pero ma'anic tsa' mejli. David tsi' tʌts'ʌ i bʌ. Cojach jini ts'ajc tsi' taja. Che' jini David tsa' puts'i majlel.

¹¹ Ti jini jach bʌ ac'ʌlel Saúl tsi' choco majlel winicob ti' yotot David cha'an mi' joy q'uelob cha'an mi' tsʌnsañob David che' ti sʌc'ajel. Pero Mical i yijñam David tsi' tsictesʌbe i ñoxi'al. Tsi' sube: Mi ma'anic ma' puts'el wʌle, ijc'ʌl mux caj a tsʌnsʌntel, che'en.

¹² Jini cha'an Mical tsi' colta David cha'an mi' loq'uel ti ventana. Tsi' ju'sa ti lazo. Che' jini tsa' puts'i majlel.

¹³ Mical tsi' ch'ʌmʌ i yejtal winic lajal bʌ i chanlel bajche' winic. Tsi' ñolchoco ya' ti' wʌyib. Tsi' yʌq'ue i c'ʌnjol melbil bʌ ti' tsutsel chivo. Tsi' moso ti pisil.

¹⁴ Saúl tsi' choco majlel winicob ti' yotot David cha'an mi' chucob. Pero i yijñam tsi' yʌlʌ: Mach c'oq'uic, che'en.

¹⁵ Saúl tsi' cha' choco majlel yambʌ winicob cha'an mi' wersa pʌyob tilel. Tsi' subeyob: Pʌybeñonla tilel David ti' wʌyib cha'an mic tsʌnsan, che'en.

¹⁶ Che' bʌ tsa' ochiyob jini soldadojob, tsi' tajayob jini melbil bʌ i yejtal winic, c'ʌcʌl i jol ti' c'ʌnjol melbil bʌ ti' tsutsel chivo.

¹⁷ Jini cha'an Saúl tsi' c'ajtibe i yalobil Mical: ¿Chucoch tsa' lotiyon? Tsa'ix a wʌc'ʌ ti colel j contra, che'en. Mical tsi' sube lot: Come tsi' subeyon: “Mi ma'anic ma' coltañon ti majlel, mi caj c tsʌnsañet”. Che' tsi' subeyon David, che'en Mical.

¹⁸ Che' jini tsa' puts'i David. Tsa' majli ba'an Samuel ya' ti Ramá. Tsi' sube pejtelel chuqui tsi' melbe Saúl. Jini cha'an tsa' tem majliyob ti chumtʌl ya' ti Naiot.

¹⁹ An majqui tsi' sube Saúl: Ya' chumul ti Naiot ti Ramá, che'en.

²⁰ Jini cha'an Saúl tsi' choco majlel winicob cha'an mi' chucob tilel David. Pero ya' tsa' caji' q'uelob junmojt x'alt'añob woliyo' bʌ ti alt'an yic'ot Samuel. Jini Espíritu i cha'an bʌ lac Yum tsa' c'oti ti' tojlel jini winicob. Tsa' caji' cha'leñob alt'an ja'el.

²¹ Che' bʌ tsi' yubi Saúl, tsi' cha' choco majlel yambʌ winicob ti' cha'yajlel. Lajal tsa' cajiyob ti alt'an ja'el. Ti' yuxyajlel tsi' choco majlel winicob. Pero lajal jach tsa' cha' ujti.

²² Jini cha'an tsa' caji ti majlel Saúl ja'el ya' ti Ramá. Che' bʌ tsa' c'oti ya' ti colem pozo am bʌ ti Secú, tsi' c'ajtibe winicob: ¿Baqui an Samuel yic'ot David? che'en. Tsi' jac'ʌyob: Ya' añob ti Naiot ti Ramá, che'ob.

²³ Che' bʌ tsa' caji ti majlel Saúl ya' ti Naiot ti Ramá, awilan jini Espíritu i cha'an bʌ lac Yum tsa' c'oti ti' tojlel Saúl ja'el. Tsa' caji' cha'len alt'an ja'el che' woli ti xʌmbal majlel c'ʌlʌl jinto tsa' c'oti ti Naiot ti Ramá.

²⁴ Tsi' jocho i pislel. Tsi' cha'le alt'an ti' tojlel Samuel. Pits'il tsa' ajni jump'ejl q'uin yic'ot jump'ejl ac'ʌlel. Jini cha'an tsa' caji i yʌlob jini winicob: ¿Jim ba i pi'ʌl x'alt'añob jini Saúl? che'ob.