1 Samuel 18 - Chol: I T’an Dios

David yic'ot Jonatán

¹ Jonatán i yalobil Saúl tsi' yubibe i t'an David che' woli' pejcan Saúl. Tsa' caji' wen c'uxbin David che' bajche' tsi' bajñel c'uxbi i bʌ. Junsujm jach tsa' ajni i pusic'al Jonatán bajche' i pusic'al David.

² Ti jini jach bʌ q'uin Saúl tsi' sube cʌytʌl David ti' yotot. Ma'anix tsi' yʌc'ʌ ti sujtel ti' yotot i tat.

³ Jonatán tsi' wa'choco i t'an ti' tojlel David cha'an c'ux tsi' yubi.

⁴ Tsi' wel jocho i bujc. Tsi' yʌq'ue David yic'ot yan tac bʌ i bujc, yic'ot i yespada, yic'ot i jalʌjb yic'ot i cajchiñʌc'.

⁵ David tsa' majli baqui jach tsi' sube Saúl. Pejtelel ora tsa' mʌjli i cha'an. Jini cha'an Saúl tsi' yʌq'ue i ye'tel ti xcʌnta soldadojob. Pejtelel winicob uts'at tsi' q'ueleyob yic'ot ja'el jini x'e'telob i cha'an Saúl.

I tsʌytsʌyñʌyel i pusic'al Saúl ti' tojlel David

⁶ Che' ujtemix i tsʌnsan jini filisteo, David tsa' sujti yic'ot soldadojob. Saúl woli' majlel ti ñaxan. Jini x'ixicob tsa' tiliyob i taj, loq'uemo' bʌ ti pejtelel jini tejclum ti Israel. Jini yujilo' bʌ son tsa' caji' ñijcañob música yic'ot c'ay yic'ot ñuqui tijp'el tac. Tsa' tili i tajob jini rey Saúl.

⁷ Che' bʌ woliyob ti son jini x'ixicob, tsa' cajiyob ti c'ay. Tsi' yʌlʌyob: Saúl tsi' jisayob ti mil ti mil. David tsi' jisayob ti pic ti pic, che'ob.

⁸ Tsa' wen mich'a Saúl che' bʌ tsi' yubi. Tsa' caji i yʌl ti' pusic'al: Woli' yʌq'ueñob David ti pic ti pic tac, joñon cojach ti mil ti mil. Wʌle ts'ita' jax yom cha'an mi' yochel ti rey. Che' tsi' ña'ta.

^9-10 Che' ti yijc'ʌlal tsa' c'oti ti' tojlel Saúl jini jontol bʌ espíritu chocbil bʌ tilel ti Dios. Che' jini Saúl tsa' caji ti capa wots'ol bʌ t'an ti' yotot. David tsa' cha' caji' ñijcan jini arpa che' bajche' ti yambʌ ora. Chucul i cha'an i lanza jini Saúl.

¹¹ Tsi' ñopo i ts'ʌp jul ti lanza. Tsi' yʌlʌ: Mi caj c ts'ʌp jul David ya' ti' ñʌc' ts'ajc, che'en. Pero ma'anic tsa' mejli. Cha'yajl tsi' tʌts'ʌ i bʌ David. Tsa' loq'ui ti' tojlel.

¹² Saúl tsa' caji' bʌc'ñan David. Come tsi' q'uele an lac Yum yic'ot. Pero lac Yum tsa'ix i cʌyʌ Saúl.

¹³ Che' jini Saúl tsi' choco loq'uel David ti' yotot. Tsi' yotsa ti yumʌl ti' tojlel lujunc'al i yuxbajc' (1,000) soldadojob. Tsa' caji ti cʌjñel ti cabʌl tejclum tac baqui jach tsa' ñumi.

¹⁴ Tsa' loq'ui ti uts'at, come lac Yum an yic'ot.

¹⁵ Saúl tsi' q'uele wen xuc'ul woli' mel i ye'tel. Jini cha'an ñumen tsi' bʌc'ña.

¹⁶ Pejtelel israelob yic'ot jini año' bʌ ti Judá wen c'ux tsa' caji' yubiñob David, come ñaxan tsa' majli ti' tojel soldadojob che' bʌ tsi' pʌyʌyob majlel ti guerra.

¹⁷ Saúl tsa' caji' suben David: Wʌ'an xch'oc bʌ calobil i c'aba' Merab. Mi caj cʌq'ueñet cha'an a wijñam. Chʌn ch'ejl yom ma' cha'len guerra tic tojlel yic'ot ti' tojlel lac Yum, che'en. Pero tsi' lon ña'ta Saúl: Mach comic c tsʌnsan joñon. La' i tsʌnsañob jini filisteojob, che'en.

¹⁸ David tsi' sube: C rey, mach ñuconic. Mach cʌmbilic c tat ti pejtelel Israel cha'an mic ñij'alin jini rey, che'en.

¹⁹ Pero che' i yorajlelix mi' sijintel jini Merab cha'an i yijñam David, ma'anic tsi' pʌyʌ David, come tsa' aq'uenti yambʌ cha'an i yijñam. Tsi' pʌyʌ Adriel jini chumul bʌ ti Meholat.

²⁰ Pero Mical jini xch'oc bʌ i yalobil Saúl tsa' caji' c'uxbin David. Che' bʌ tsi' yubi Saúl, uts'at tsa' caji' q'uel, come tsi' ña'ta i yʌc' ti chʌmel.

²¹ Tsi' yʌlʌ: Mi caj cʌq'uen David calobil Mical. Cha'an ti' caj Mical, mi caj i tsʌnsʌntel ti' tojlel filisteojob, che'en. Jini cha'an Saúl tsi' sube David ti' cha'yajlel: Wersa mi caj a wochel tic ñij'al, che'en.

²² Jini cha'an Saúl tsi' sube jini x'e'telob i cha'an, cha'an mi' mucu pejcañob David. Tsi' yʌlʌ: Subenla: “C'ux mi' yubiñet jini rey. C'ux mi cubiñet lojon ja'el. I yorajlelix ma' ñij'alin jini rey”. Che'ʌch yom mi la' suben, che'en Saúl.

²³ Jini x'e'telob i cha'an Saúl tsa' majli i subeñob David jini t'an. Tsi' jac'ʌ: Woliyetla ti alas t'an. Mach ñuconic. Ma'anic cabʌl c chubʌ'an. ¿Yom ba mic ñij'alin jini rey? che'en.

²⁴ Jini x'e'telob i cha'an Saúl tsa' cha' c'otiyob i suben bajche' tsi' sube David.

²⁵ Saúl tsi' yʌlʌ: Cha' suben David bajche' iliyi: “Mach abi yomic taq'uin jini rey. Yom jach abi ma' ch'ʌmben tilel jo'c'al i pʌchʌlel jini filisteojob cha'an mi' q'uextʌbentelob i jontolil ti' tojlel jini rey”. Che'ʌch yom mi la' suben, che'en Saúl. Pero woli jach i ña'tan bajche' mi caj i yʌc' ti chʌmel David ti' c'ʌb filisteojob.

²⁶ Jini x'e'telob i cha'an Saúl tsi' subeyob David bajche' tsi' yʌlʌ Saúl. Uts'at tsi' jac'ʌ David cha'an mi' yochel ti' ñij'al jini rey.

²⁷ David tsa' majli yic'ot i winicob. Tsi' tsʌnsa lujunc'al filisteojob. Ts'ʌcʌl tsi' ch'ʌmbeyob c'otel i pʌchʌlel cha'an mi' yʌq'uen jini rey cha'an mi' mejlel ti ochel ti' ñij'al che' bajche' tsi' sube Saúl. Jini cha'an Saúl tsi' yʌq'ue jini xch'oc bʌ i yalobil i c'aba' Mical cha'an i yijñam.

²⁸ Saúl tsi' wen ña'ta an lac Yum yic'ot David. Tsi' q'uele ja'el wen c'ux woli' yubin David Mical, jini xch'oc bʌ i yalobil.

²⁹ Jini cha'an tsa' utsi caji ti bʌq'uen Saúl. Tsa' caji' contrajin David c'ʌlʌl jinto tsa' chʌmi Saúl.

³⁰ Ti jujunyajl che' bʌ tsa' cha' cajiyob ti tilel jini ñuc taco' bʌ filisteojob, tsa' loq'ui i tajob ti guerra David. Ñumen tsi' mʌlʌ bajche' yaño' bʌ capitán. Jini cha'an tsa' wen caji ti cʌjñel c'ʌlʌl ti ñajtʌl cha'an wen ñuc i ye'tel.