1 Samuel 13 - Chol: I T’an Dios

Guerra ti' tojlel filisteojob

¹ Ñumenix jump'ejl jab i yumʌntel Saúl. Ti' cha'p'ejlel jab che' woli ti yumʌntel,

² tsa' caji i yajcan uxp'ejl mil winicob. Cha'p'ejl mil tsa' ajni yic'ot Saúl ya' ti Micmas ya' ti wits i c'aba' Betel. Jump'ejl mil ya' añob yic'ot Jonatán ya' ti Gabaa ti' lumal benjamiñob. Jini i colobal winicob tsa' cha' chojquiyob sujtel ti tejclum, jujuntiquil ti' yotot.

³ Jonatán tsi' tsʌnsa junmojt filisteojob año' bʌ ti Geba. Tsa' caji' yubiñob ti' pejtelel i lumal jini filisteojob. Che' jini Saúl tsi' yʌc'ʌ ti wustʌl jini trompeta ti pejtelel Israel, come tsi' yʌlʌ wersa mi' yubiñob chuqui tsa' ujti.

⁴ Pejtelel israelob tsi' yubiyob tsa'ix mʌjli i cha'an Saúl ti' contra jini filisteojob. Jini cha'an jini filisteojob ts'a' mi' q'uelob israelob. Saúl tsi' tempa tilel winicob ya' ti Gilgal. Tsi' chajpayob i bʌ cha'an guerra.

⁵ Jini filisteojob ja'el tsa' caji i tempañob i bʌ cha'an mi' cha'leñob guerra ti' contra Israel. An i cha'añob lujump'ejl i cha'c'al mil (30,000) carreta, yic'ot wʌcp'ejl mil (6,000) winicob c'ʌchʌlo' bʌ ti caballo, yic'ot cabʌl winicob lajal bʌ i yonlel bajche' i ji'il colem ja'. Tsa' caji' ñochtañob tilel jini israelob año' bʌ ti Micmas ti' tojel Betavén ba' mi' pasel q'uin.

⁶ Jini israelob che' bʌ tsi' q'ueleyob i yonlel i contrajob, tsa' cajiyob ti bʌq'uen come obolobix i bʌ. Tsa' caji i mucob i bʌ ti ch'en tac yic'ot ti' jajp tac lum, yic'ot ti mate'el yic'ot ti xajlelol tac cha'an mi' puts'tañob i contra.

⁷ Yaño' bʌ tsa' c'axiyob ti junwejl Jordán ti' lumal Gad yic'ot ti Galaad. Pero Saúl tsa' cʌle ti Gilgal. Pejtelel jini winicob tsa' bʌ i tsʌcleyob tsiltsilñayob ti bʌq'uen.

⁸ Saúl tsi' pijta Samuel wucp'ejl q'uin. Tsi' pijta che' bajche' tsi' sube Samuel, pero maxto anic tsa' tili ti Gilgal. Tsa' c'unte' cajiyob ti sujtel jini winicob.

⁹ Che' jini Saúl tsi' yʌlʌ: Ch'ʌmbenla tilel i majtan lac Yum cha'an mic pulben yic'ot yan tac bʌ i majtan, che'en. Che' jini tsa' caji' bajñel pul jini majtañʌl.

¹⁰ Che' ujtel jax to i pul jini majtañʌl, awilan tsa' caji' q'uel ya'ix tilel Samuel. Che' jini Saúl tsa' majli i taj cha'an mi' yʌq'uen cortesía.

¹¹ Pero Samuel tsi' c'ajtibe: ¿Chuqui tsa' cha'le? che'en. Saúl tsi' jac'ʌ: Tsaj q'uele wolix i laj sujtelob c winicob, cha'an ma'anic tsa' juliyet che' bajche' tsa' wʌlʌ. Awilan ya'ix tempʌbilob ti Micmas jini filisteojob.

¹² Tsac ña'ta mux caj i tilel jini filisteojob cha'an mi' jisañoñob ila ti Gilgal che' max to anic tsaj c'ajtibe i coltaya lac Yum. Jini cha'an tsac bajñel xiq'ui c bʌ cha'an mic pulben i majtan lac Yum, che'en.

¹³ Samuel tsi' yʌlʌ: Leco jax chuqui tsa' mele. Ma'anic tsa' jac'be i mandar lac Yum Dios che' bajche' tsi' subeyet. Tsa'ic a jac'be i t'an lac Yum, tsi' coltayet cha'an ma' chʌn cha'len yumʌl ti Israel, jatet yic'ot a walobilob ti pejtelel ora.

¹⁴ Pero wʌle, mach chʌn che'ix. Mach jalix mi caj a chilbentel a yumʌntel. Lac Yum tsa'ix i sajca juntiquil winic uts'at bʌ ti' wut cha'an mi' yochel ti ñuc bʌ yumʌl ti' tojlel i tejclum, come ma'anic tsa' jac'be i mandar che' bajche' tsi' subeyet, che'en.

¹⁵ Che' jini Samuel tsa' loq'ui ti Gilgal cha'an mi' majlel ti Gabaa ba'an benjamiñob. Jixcu Saúl tsa' caji i cha' tempan tilel jini winicob ya'to bʌ añob yic'ot. Añob jax lujunc'al i chabajc' (600) che' ti' pejtelelob.

¹⁶ Jonatán, i yalobil Saúl, yic'ot jini winicob ya'to bʌ añob, tsa' cʌleyob ya' ti Gabaa ti' lumal Benjamín. Jixcu jini filisteojob ya'ix tempʌbilob ti Micmas.

¹⁷ Tsa' loq'uiyob ti guerra uxmojt filisteojob cha'an mi' tic'lañob israelob. Junmojt tsi' xʌñʌyob majlel i bijlel Ofra ti' lumal Sual.

¹⁸ Yambʌ junmojt tsi' xʌñʌyob majlel i bijlel Bethorón. I yuxmojtlel tsa' letsiyob majlel ti bujtʌl am bʌ ti' chañelal jini joctʌl i c'aba' Zeboim ya' ti' tojel i tiquiñal pañimil.

¹⁹ Ma'anic mi juntiquilic yujil bʌ pʌc'ol tsucu taq'uin ti pejtelel i lumal Israel, come jini filisteojob tsi' tiq'uiyob jini hebreojob cha'an mach mi' melob lanza yic'ot espada tac.

²⁰ Jini cha'an wersa tsa' majliyob israelob ba'an filisteojob cha'an mi' juc'beñob i yej machit, i jachaj, i yazadón, yic'ot e'tijibʌl mu' bʌ i c'ʌñob ti top' lum yic'ot ti c'ajbal.

²¹ Wʌcp'ejl peso tsi' c'ajtibeyob i tojol cha'an mi' juc'beñob i yej azadón yic'ot i yej jini mu' bʌ i c'ʌñob ti top' lum. Uxp'ejl peso cha'an mi' juc'ob jini jacha yic'ot e'tijibʌl.

²² Jini cha'an che' ti' yorajlel guerra ma'añobic i yespada mi i lanzajic jini israelob año' bʌ ti' wenta Saúl yic'ot Jonatán. Jini jach Saúl yic'ot i yalobil, añob i cha'an.

²³ Awilan ya' añob ti' bijlel Micmas junmojt filisteojob. Tsa' c'ʌlʌl c'otiyob ti wits ti' tojel Micmas.