1 Reyob 3 - Chol: I T’an Dios

Tsa' ñujpuñi Salomón yic'ot i yalobil Faraón

¹ Salomón tsi' teme i t'an yic'ot Faraón rey bʌ ti Egipto. Tsi' pʌyʌ ti' yijñam i yalobil Faraón. Tsi' pʌyʌ ti chumtʌl ti Jerusalén, i tejclum David. Ya' tsa' chumleyob jinto tsa' ujti i wa'chocon i yotot, yic'ot i Templo lac Yum, yic'ot i ts'ajquil Jerusalén.

² Jini israelob tsi' chʌn tsʌnsayob majtañʌl ya' ti bujbujtʌl, come maxto melbilic i yotot lac Yum.

Tsi' c'ajti i ña'tʌbal Salomón

³ Salomón tsi' c'uxbi lac Yum. Tsi' jac'be i mandar David i tat. Tsi' chʌn tsʌnsa majtañʌl ya' ti bujtʌl tac. Tsi' chʌn pulu pom ya'i.

⁴ Jini rey tsa' majli ti Gabaón ba' wa'chocobil jini ñuc bʌ pulʌntib ti bujtʌl ba' i tilel mi' yʌq'uen tsʌnsʌbil bʌ i majtan Dios. Jump'ejl mil tsʌnsʌbil bʌ i majtan tsi' pulbe lac Yum ti jini pulʌntib.

⁵ Ti jump'ejl ac'ʌlel che' ya'an Salomón ti Gabaón, tsi' q'uele lac Yum ti' ñajal. Dios tsi' sube: C'ajtibeñon chuqui a wom, che'en.

⁶ Salomón tsi' jac'be: Cabʌl tsa' p'unta jini c tat David. A winicʌch. Che' wʌ'an ti pañimil tsi' chʌn tsajcayet ti isujm ti pejtelel i pusic'al. Toj i pusic'al yic'ot i melbal ti a tojlel. Jatet tsa' wen pʌsbe i yutslel a pusic'al che' bʌ tsa' wʌq'ue i yalobil cha'an mi' ch'ʌmben i ye'tel ti' q'uexol.

⁷ Wʌle c Yum Dios, tsa'ix a wa'chocoyon cha'an mi cochel ti rey ti' q'uexol c tat David, pero ch'itoñon to. Mach cujilic bajche' mi caj c mel mi bajche' mi caj i yujtel.

⁸ Wʌ' añon ti' tojlel a cha'año' bʌ yajcʌbilo' bʌ a cha'an. Wen cabʌlob. Mach mejlicob ti tsijquel cha'an cabʌlob.

⁹ Yom ma' wʌq'ueñon cabʌl c ña'tʌbal cha'an mic cha'len yumʌl ti' tojlelob, cha'an mic wen yajcan chuqui uts'at, come ma'anic majqui mi mejlel i bajñel cha'len yumʌl ti' tojlel pejtel a cha'año' bʌ, che'en Salomón.

¹⁰ Lac Yum uts'atax tsi' yubi iliyi che' bʌ tsi' c'ajtibe wen bʌ i ña'tʌbal.

¹¹ Dios tsi' sube: Ma'anic tsa' c'ajtibeyon cabʌl a jabilel ti pañimil, mi cabʌl a chubʌ'an. Ma'anic tsa' c'ajtibeyon cha'an mic jisan a contrajob. Tsa' jach a c'ajtibeyon a ña'tʌbal cha'an ma' cha'len meloñel ti uts'at.

¹² Jini cha'an mi caj c mel che' bajche' tsa' c'ajtibeyon. Mi caj cʌq'ueñet i p'ip'lel a pusic'al yic'ot cabʌl a ña'tʌbal. Ñumen ti p'is mi caj cʌq'ueñet che' bajche' yaño' bʌ. Ma'anic yambʌ lajal bʌ i ña'tʌbal ti oñiyi c'ʌlʌl wʌle, mi ti talto bʌ ora.

¹³ Mi caj cʌq'ueñet ja'el jini mach bʌ anic tsa' c'ajtibeyon, cabʌl a chubʌ'an yic'ot a ñuclel. Che' jini ma'anic yambʌ rey ti pañimil lajal bʌ bajche' jatet.

¹⁴ Mi xuc'ul ma' chʌn tsajcañon, mi uts'at ma' jac' pejtel c t'an yic'ot c mandar che' bajche' tsi' mele a tat David, mi caj cʌq'ueñet cabʌl a jabilel ti pañimil. Che' tsi' yʌlʌ Dios.

¹⁵ Che' bʌ tsa' cajni i wut Salomón, tsi' ña'ta chuqui tsi' ñajle. Tsa' sujti ti Jerusalén. Tsa' c'oti ya' ti tojel jini Arca ba' lotol jini xuc'ul bʌ t'an i cha'an lac Yum. Tsi' yʌq'ue lac Yum pulbil bʌ i majtan yic'ot jini majtañʌl cha'an i ñʌch'tʌlel i pusic'al. Che' ja'el tsi' mele ñuc bʌ q'uin. Tsi' pʌyʌ pejtelel año' bʌ i ye'tel.

I ña'tʌbal yic'ot i ñuclel Salomón

¹⁶ Tsa' c'otiyob cha'tiquil sts'i'lel bʌ x'ixicob ti' tojlel jini rey Salomón.

¹⁷ Juntiquil tsi' yʌlʌ: C yum rey, chumulon lojon ti jump'ejl jach otot. Tsac meq'ue calobil che' añon lojon cha'tiquil ti jump'ejl otot.

¹⁸ Che' i yuxp'ejlix q'uin tsac meq'ue calobil, ili c pi'ʌl ja'el tsi' meq'ue i yalobil ya' ba' chumulon lojon. Ma'anic yambʌ ya' ti otot, c bajñel lojon.

¹⁹ Ti jump'ejl ac'ʌlel tsa' chʌmi i yalobil, come tsi' wʌyta.

²⁰ Tsa' ch'ojyi ti' yojlil ac'ʌlel. Tsi' chilbeyon calobil che' wen wʌyʌlon. Tsi' yotsa jini chʌmen bʌ i yalobil tic wʌyib quic'ot.

²¹ Che' bʌ tsa' cajni c wut che' ic'to cha'an mic tsu'san calobil, tsaj q'uele chʌmenix. Jinto che' bʌ tsa' wen sʌc'a pañimil, tsa' caji j q'uel mach jinic calobil tsa' bʌ cʌc'ʌ ti pañimil, che'en.

²² Jini yambʌ x'ixic tsi' yʌlʌ: Jiñʌch calobil ili cuxul bʌ. Jini chʌmen bʌ jiñʌch a walobil, che'en. Pero jini ñaxan bʌ x'ixic tsi' yʌlʌ: Mach isujmic. Jiñʌch a walobil jini chʌmen bʌ. Jini cuxul bʌ jiñʌch calobil, che'en. Tsi' yʌ'leyob i bʌ jini cha'tiquil x'ixicob ti' tojlel jini rey.

²³ Jini rey tsi' yʌlʌ: Ili x'ixic mi' yʌl: “Jini calobil jiñʌch jini cuxul bʌ. Jini chʌmen bʌ jiñʌch a walobil”, che'en. Yambʌ x'ixic mi' yʌl: “Mach isujmic. Jiñʌch a walobil jini chʌmen bʌ. Jiñʌch calobil ili cuxul bʌ”, che'en.

²⁴ Jini rey tsi' yʌc'ʌ mandar: Ch'ʌmbeñon tilel junts'ijt espada, che'en. Tsi' ch'ʌmbeyob tilel.

²⁵ Jini rey tsi' yʌlʌ: Set' t'ojo ti ojlil ili cuxul bʌ alʌl cha'an ma' wʌq'ueñob ojlil ti jujuntiquil, che'en.

²⁶ Jini mero i ña' jini cuxul bʌ alʌl tsi' p'unta i yalobil. Tsi' yʌlʌ: Mach che'ic yom, c yum. La' i ch'ʌm calobil ili x'ixic, pero mach a tsʌnsan, che'en. Pero jini yambʌ x'ixic tsi' yʌlʌ: La' i tsep che' bajche' tsi' yʌlʌ. Che' jini mach c cha'anic, mach a cha'anic ja'el, che'en.

²⁷ Jini rey Salomón tsi' yʌlʌ: Aq'uen ili ñaxan bʌ x'ixic jini cuxul bʌ alʌl. Mach a tsʌnsan, come i cha'añʌch, che'en.

²⁸ Tsa' caji' yubiñob ti pejtelel i lumal bajche' tsi' cha'le meloñel jini rey Salomón. Jini cha'an tsi' bʌc'ñayob, come tsi' q'ueleyob añʌch i ña'tʌbal tilem bʌ ti Dios, come toj tsi' cha'le meloñel.