1 Reyob 17 - Chol: I T’an Dios

Elías tsi' wʌn subu jini jajmel

¹ Elías jini x'alt'an ch'oyol bʌ ti Galaad tsi' sube jini rey Acab: Melel mic subeñet come mic bʌc'ñan lac Yum i Dios Israel, jini cuxul bʌ Dios mu' bʌ c ch'ujutesan. Mic melben i ye'tel. Ma'anic mi' cajel ti chʌn tilel ja'al mi ye'ebic ti ili jabil tac jinto mic cha' ac' c t'an. Che' tsi' yʌlʌ Elías.

^2-3 Lac Yum tsi' sube Elías: Tʌts'ʌ a bʌ ilayi. Cucu ti' tojel i pasibal q'uin. Ajñen ba'an i xʌc' jini Jordán ja' i c'aba' Querit.

⁴ Japben i ya'lel jini pa'. C'uxu chuqui mi' ch'ʌmbeñet c'otel jini x'ac'xi', come tsa'ix cʌq'ue mandar cha'an mi' we'sañet, che'en lac Yum.

⁵ Che'ʌch tsi' mele Elías che' bajche' lac Yum tsi' sube. Ya' tsa' ajni lʌc'ʌl ti' ti' pa' i c'aba' Querit ti' tojel Jordán ba' mi' pasel q'uin.

⁶ Jini x'ac'xi' tsi' ch'ʌmbe c'otel waj yic'ot we'elʌl ti sʌc'ajel ti ic'ajel. Tsi' japʌ ja' ya' ti pa'.

⁷ Che' ñumenix cabʌl q'uin tsa' tiqui jini pa', come jamʌl to pañimil. Tsa' lajmi ja'al che' bajche' tsi' yʌlʌ Elías.

Elías yic'ot jini meba' x'ixic

^8-9 Lac Yum tsi' sube Elías: Cucu ti tejclum ya' ti Sidón i c'aba' Sarepta. Ajñen ya'i. Tsa'ix c sube juntiquil meba' x'ixic cha'an mi' we'sañet, che'en lac Yum.

¹⁰ Jini cha'an tsa' majli Elías ti Sarepta. Che' bʌ tsa' c'oti ti ochibʌl ti Sarepta, ya'an meba' x'ixic woli bʌ i tempan si'. Tsi' c'ajtibe jump'ejl tsima ja'.

¹¹ Che' woli' majlel jini x'ixic cha'an mi' ch'ʌmben tilel ja', Elías tsi' sube: Awocolic ch'ʌmbeñon tilel ja'el ts'ita' waj cha'an mij c'ux, che'en.

¹² Jini x'ixic tsi' jac'ʌ: Melel chuqui mic subeñet come mic bʌc'ñan a Yum Dios. Ma'anic mi ts'ita'ic waj ti cotot. Cojach an c cha'an jumujch' harina ya' ti' poq'uil c waj, yic'ot ts'ita' aceite ya' ti' yajñib. Tsa' tili c tempan majlel ts'ita' si' cha'an mic mel jini waj cha'an mij c'ux junyajl jach yic'ot calobil. Che' jini mi caj c chʌmel lojon ti wi'ñal, che'en jini meba' x'ixic.

¹³ Pero Elías tsi' sube: Mach a cha'len bʌq'uen. Cucu, melbeñon ts'ita' waj. Ch'ʌmbeñon tilel cha'an mij c'ux. Ñaxañon, ti wi'il jatetla.

¹⁴ Come lac Yum i Dios Israel tsi' yʌlʌ ma'anic mi' caj ti sʌjlel jini harina am bʌ ti' poq'uil. Ma'anic mi' caj ti jilel jini aceite ya' ti' yajñib jinto mi' cha' choc tilel ja'al lac Yum, che'en Elías.

¹⁵ Jini cha'an jini x'ixic tsi' mele che' bajche' tsi' sube Elías. Cabʌl q'uin tsi' cha'le we'el Elías ti' yotot jini x'ixic yic'ot i yalobil.

¹⁶ Ma'anic tsa' sʌjli jini harina am bʌ ti' poq'uil. Ma'anic tsa' jili jini aceite am bʌ ti' yajñib, che' bajche' tsi' sube Elías.

¹⁷ Pero ti jump'ejl q'uin tsa' caji ti c'am'an i yalobil jini meba' x'ixic. Tsa' jujch'i. Tsa' chʌmi.

¹⁸ Jini x'ixic tsi' sube Elías: Jatet i winiquet bʌ Dios, ¿chuqui tsac melbeyet? ¿Tsa' ba tiliyet cha'an ma' tsictesʌbeñon c mul, cha'an ma' wʌc' ti chʌmel jini calobil? che'en.

¹⁹ Elías tsi' jac'ʌ: Aq'ueñon a walobil, che'en. Elías tsi' loch' mec'be i yalobil jini x'ixic. Tsi' meq'ue majlel ya' ti' cha'lajmlel otot ba' mi' wʌyel. Tsi' ñolchoco jini ch'ujlelʌl ti' wʌyib.

²⁰ Ti c'am bʌ t'an tsi' pejca lac Yum ti oración: C Yum Dios, ¿chucoch tsa' tsʌnsʌbe i yalobil ili x'ixic wʌ' ba' jijlemon? che'en.

²¹ Uxyajl tsi' pʌcchoco i bʌ ti' pam jini alob. Ti c'am bʌ t'an tsi' cha' pejca lac Yum: C Yum Dios, awocolic mij c'ajtibeñet, cha' otsʌben i ch'ujlel ti' bʌc'tal, che'en.

²² Lac Yum tsi' yubibe i yoración Elías. Tsa' cha' juli i ch'ujlel. Tsa' cha' cuxtiyi jini alob.

²³ Che' jini Elías tsi' cha' pʌyʌ jubel ba'an i ña'. Tsi' yʌlʌ: Q'uele a walobil, cha' cuxulix, che'en.

²⁴ Jini meba' tsi' jac'ʌ: Wʌle cujil i winiquet Dios. Tilem ti Dios chuqui ma' wʌl, che'en.