1 Cronicas 5 - Chol: I T’an Dios

I p'olbalob Rubén

¹ Jini ascuñʌl bʌ i yalobil Israel jiñʌch Rubén. Pero tsi' pi'lʌbe juntiquil i yijñam i tat. Jini cha'an tsa' aq'uenti José i yʌscunlel Rubén. Jini cha'an Rubén ma'anic tsa' ochi ti' listajlel i p'olbal Israel che' bajche' ascuñʌl bʌ i yalobil.

² Anquese tsa' aq'uenti i yʌscunlel José, ñumen p'ʌtʌl tsa' ajni Judá. Wen an i ñuclel ti Israel. Tsa' tsictiyi juntiquil ñuc bʌ Yumʌl ti Judá.

³ Jini ch'iton bʌ i yalobil Rubén jini ascuñʌl bʌ i yalobil Israel jiñobʌch Hanoc, Falú, Hezrón, Carmi.

⁴ I p'olbalob Joel jiñobʌch: Semaías i yalobil, yic'ot Gog i buts, yic'ot Simei i yalobil i buts.

⁵ I yalobil Simei jiñʌch Micaía. I yalobil Micaía jiñʌch Reaía. I yalobil Reaía jiñʌch Baal.

⁶ I yalobil Baal jiñʌch Beera jini yumʌl bʌ cha'an i tribu Rubén. Tsa' wersa pʌjyi ti Asiria cha'an ti' mandar jini rey i c'aba' Tiglat Pileser.

^7-8 I pi'ʌlob Beera tsa' cajiyob ti ochel ti' yumob ti jujunmojt i pi'ʌlob. Jiñobʌch tsa' bʌ ochi ti' listajlel i p'olbal Beera: Jeiel, Zacarías, Bela (i yalobil Azaz, i buts Sema, i yalobil i buts Joel). I p'olbalob Rubén tsa' chumleyob ya' ti Aroer c'ʌlʌl ti Nebo wits yic'ot ti Baalmeón.

⁹ Joel tsi' p'olo wacax. Tsi' yʌc'ʌ tac ti buc'bal i wacax ti' tojel ba' mi' pasel q'uin c'ʌlʌl ti' ti' tiquin lum, c'ʌlʌl ti colem ja' i caba' Eufrates, come cabʌl wacax ti Galaad.

¹⁰ Che' an ti rey Saúl jini winicob i p'olbalo' bʌ Rubén tsa' mʌjliyob i cha'an ti guerra ti' contra jini agareñob. Tsa' cajiyob ti chumtʌl ti pisil tac bʌ i yotot ya' ti Galaad ti' tojel ba' mi' pasel q'uin.

I p'olbalob Gad

¹¹ Jini i p'olbalob Gad tsa' cajiyob ti chumtʌl ti' tojel i p'olbal Rubén. Tsa' ajniyob ti' lumal Basán c'ʌlʌl ti Salca.

¹² Ñuc tsa' q'uejli Joel ti' lumal Basán. Ñuc ja'el jini Safán, pero mach lajalic yic'ot Joel. Ñuc ja'el jini Jaanai yic'ot Safat.

¹³ I pi'ʌlob tsa' ochiyob ti yumʌlob ti jujump'ejl otot. Jiñobʌch Micael, Mesulam, Seba, Jorai, Jacán, Zía, Heber.

¹⁴ I p'olbalob Buz che' bajche' an i p'olbal jiñobʌch Jahdo, Jesisai, Micael, Galaad, Jaroa, Huri, Abihail.

¹⁵ Ahí (i yalobil Abdiel, i buts Guni) jiñʌch i yum i pi'ʌlob.

¹⁶ Tsa' chumleyob ti Galaad yic'ot ti Basán yic'ot ti pejtelel jamil tac an tac bʌ ti Sarón.

¹⁷ Pejtelel ili winicob tsa' ochiyob ti' listajlel i p'olbalob Gad che' ti' yorajlel jini rey Jotam ti Judá yic'ot ti' yorajlel jini rey Jeroboam ti Israel.

Jini ojlil i yuxmojt i p'olbal Israel

¹⁸ Añob 44,760 soldadojob ti' tojlelob i p'olbalob jini Rubén, yic'ot Gad yic'ot ojlil tribu cha'an Manasés. Ti' pejtelelob añob i ye'tijibob cha'an guerra, wen chajpʌbilob ja'el.

¹⁹ Ili winicob tsi' cha'leyob guerra ti' contra jini agareñob, yic'ot ti' contra Jetur, yic'ot ti' contra Nafis, yic'ot ti' contra Nodab.

²⁰ C'am tsi' c'ajtibeyob Dios cha'an mi' coltʌntelob. Dios tsi' coltayob, come tsi' ñopoyob. Che' jini tsa' jisʌntiyob jini agareñob yic'ot pejtelel i pi'ʌlob ti guerra.

²¹ Tsi' chilbeyob lujump'ejl i yuxc'al mil camello tac, yic'ot lujunc'al mil yic'ot lujump'ejl i yuxc'al mil tiñʌme', yic'ot cha'p'ejl mil burro, yic'ot jo'c'al mil winicob.

²² Tsa' chʌmiyob cabʌl i contrajob ti guerra, come Dios tsi' coltayob. Jini cha'an i p'olbalob Rubén tsa' chumleyob ti' lumal jini agareñob jinto tsa' wersa pʌjyiyob majlel ti Babilonia.

²³ Tsa' p'ojli jini ojlil tribu cha'an Manasés c'ʌlʌl ti Basán c'ʌlʌl ti Baal Hermón, yic'ot Senir, yic'ot wits i c'aba' Hermón.

²⁴ Jini yumʌlob cha'an jujunmojt i pi'ʌlob jiñobʌch Efer, Isi, Eliel, Azriel, Jeremías, Hodavías, Jahdiel. Wen ch'ejlob ti guerra yic'ot ti e'tel jini winicob ti jujuntiquilob.

²⁵ Ma'anic tsi' tsajcʌbeyob i Dios i ñojte'elob. Jini jach tsi' tsajcʌbeyob i dioste' tac winicob tsa' bʌ i jisa tac lac Yum.

²⁶ Jini cha'an i Dios Israel tsi' choco tilel Pul i rey asiriajob (jini yambʌ i c'aba' jiñʌch Tiglat Pileser) cha'an mi' wersa ochel ti' lumal Israel. Tsi' wersa pʌyʌ majlel i p'olbalob Rubén, yic'ot Gad, yic'ot jini ojlil i p'olbal Manasés c'ʌlʌl ti Halah, yic'ot ti Habor, yic'ot ti Hara, yic'ot ba'an jini colem ja' i c'aba' Gozán. Ya' añob c'ʌlʌl wʌle che' woli ti ts'ijbuntel ili jun.