1 Cronicas 25 - Chol: I T’an Dios

Jini xc'ayob yic'ot jini mu' bʌ i ñijcañob música tac

¹ David yic'ot jini año' bʌ i ye'tel ti Tabernáculo tsi' wa'chocoyob winicob cha'an mi' cha'leñob subt'an che' woli ti ñijcʌntel jini arpa, yic'ot címbalo tac yic'ot salterio. I cha'añob Asaf, yic'ot Hemán, yic'ot Jedutún ili winicob. Jiñobʌch i c'aba' tac yic'ot i ye'tel:

² Asaf jini x'alt'an ti' tojlel rey, yic'ot i yalobilob: Zacur, José, Netanías, Asarela.

³ Jedutún tsi' teche i yʌq'uen wocolix i yʌlʌ lac Yum che' woli ti ñijcʌntel jini arpa. Jini ch'iton bʌ i yalobilob jiñobʌch iliyi: Gedalías, Zeri, Jesaías, Hasabías, Matatías, Simei.

^4-5 Hemán jiñʌch i motomaj rey. I yalobilob Hemán año' bʌ ti' wenta jiñobʌch iliyi: Buquías, Matanías, Uziel, Sebuel, Jeremot, Hananías, Hanani, Eliata, Gidalti, Romantiezer, Josbecasa, Maloti, Hotir, Mahaziot. (Dios tsi' yʌq'ue chʌnlujuntiquil (14) ch'iton bʌ i yalobilob yic'ot uxtiquil xch'oc bʌ i yalobilob.)

^6-7 Tsi' ñijcayob címbalo, yic'ot salterio, yic'ot arpa tac. Jini Asaf tsi' teche música che' woli' ñijcañob música tac ti Tabernáculo. Asaf, yic'ot Jedutún, yic'ot Hemán temel tsa' ajniyob ti' wenta jini rey David. Ili uxtiquil yic'ot i pi'ʌlob wen yujilob c'ay ti' tojlel lac Yum. Añob chʌnlujunc'al yic'ot waxʌcp'ejl (288) ti pejtelel. Laj yujilob música.

⁸ Tsi' cha'leyob yajcaya ti alas cha'an mi' wa'chocoñob jini xc'ayob che' ti' yorajlel, mi ñuc bʌ mi ch'o'ch'oc bʌ winic, mi anix i jabilel, mi maxto anic i jabilel.

^9-31 Ti ñaxan tsi' yajcayob José loq'uem bʌ ti' pi'ʌlob Asaf. Ti cha'yajlel tsi' yajcayob Gedalías yic'ot lajchʌntiquil i yalobilob yic'ot i yerañob. Ti' yuxyajlel, Zacur yic'ot lajchʌntiquil i yalobilob yic'ot i yerañob. Ti' chʌnyajlel, Izri yic'ot lajchʌntiquil i yalobilob yic'ot i yerañob. Ti' jo'yajlel, Netanías yic'ot lajchʌntiquil i yalobilob yic'ot i yerañob. Ti' wʌcyajlel, Buquías yic'ot lajchʌntiquil i yalobilob yic'ot i yerañob. Ti' wucyajlel, Jesarela yic'ot lajchʌntiquil i yalobilob yic'ot i yerañob. Ti' waxʌcyajlel, Jesahías yic'ot lajchʌntiquil i yalobilob yic'ot i yerañob. Ti' bolonyajlel, Matanías yic'ot lajchʌntiquil i yalobilob yic'ot i yerañob. Ti' lujunyajlel, Simei yic'ot lajchʌntiquil i yalobilob yic'ot i yerañob. Ti' junlujunyajlel, Azareel yic'ot lajchʌntiquil i yalobilob yic'ot i yerañob. Ti' lajchʌnyajlel, Hasabías yic'ot lajchʌntiquil i yalobilob yic'ot i yerañob. Ti' yuxlujunyajlel, Subael yic'ot lajchʌntiquil i yalobilob yic'ot i yerañob. Ti' chʌnlujunyajlel, Matatías yic'ot lajchʌntiquil i yalobilob yic'ot i yerañob. Ti' jo'lujunyajlel, Jeremot yic'ot lajchʌntiquil i yalobilob yic'ot i yerañob. Ti' wʌclujunyajlel, Hananías yic'ot lajchʌntiquil i yalobilob yic'ot i yerañob. Ti' wuclujunyajlel, Josbecasa yic'ot lajchʌntiquil i yalobilob yic'ot i yerañob. Ti' waxʌclujunyajlel, Hanani yic'ot lajchʌntiquil i yalobilob yic'ot i yerañob. Ti' bolonlujunyajlel, Maloti yic'ot lajchʌntiquil i yalobilob yic'ot i yerañob. Ti' junc'alel bʌ tsi' yajcayob Eliata yic'ot lajchʌntiquil i yalobilob yic'ot i yerañob. Ti' jump'ejlel i cha'c'al, Hotir yic'ot lajchʌntiquil i yalobilob yic'ot i yerañob. Ti' cha'p'ejlel i cha'c'al, Gidalti yic'ot lajchʌntiquil i yalobilob yic'ot i yerañob. Ti' yuxp'ejlel i cha'c'al, Mahaziot yic'ot lajchʌntiquil i yalobilob yic'ot i yerañob. Ti' chʌmp'ejlel i cha'c'al, Romantiezer yic'ot lajchʌntiquil i yalobilob yic'ot i yerañob.