1 Cronicas 22 - Chol: I T’an Dios

¹ Che' jini David tsi' yʌlʌ: Uts'at mi' yajñel i Templo Dios ilayi, ba' mi' pulob majtañʌl jini israelob, che'en.

I chajpʌntel Templo

² Jini cha'an David tsi' yʌc'ʌ mandar cha'an mi' wejts'elob tilel pejtelel jini ñajt bʌ ch'oyolob mach bʌ israelobic, ya' bʌ chumulob ti Israel. Tsi' yʌc'ʌ mandar cha'an mi' chajpañob xajlel tac cha'an mi' mejlel i Templo Dios.

³ Che' ja'el David tsi' chajpa cabʌl lawux cha'an i puertajlel tac jini otot, yic'ot cha'an mi' tʌc'ob jini te' tac. Tsi' chajpa cabʌl bronce mach bʌ anix i p'isol i yalel.

⁴ Jini año' bʌ ti Tiro yic'ot ti Sidón tsi' ch'ʌmbeyob tilel cabʌl ch'ujte'.

⁵ David tsi' yʌlʌ: Ch'iton to jini calobil Salomón. Maxto anic i ña'tʌbal. Jini i yotot Dios mu' bʌ caj ti mejlel, yom wen i t'ojol yic'ot wen ñuc cha'an mi' q'uejlel ti ñuc ti pejtelel pañimil. Jini cha'an joñon mi caj j q'uel chuqui tac yom, che'en. Jini cha'an David tsi' wʌn chajpa ti pejtelel che' cuxul to.

⁶ David tsi' pʌyʌ tilel Salomón. Tsi' sube cha'an mi' wa'chocoben i yotot lac Yum i Dios israelob.

⁷ David tsi' sube Salomón: Calobil, tsac lon ña'ta c wa'chocoben i yotot lac Yum Dios.

⁸ Tsa' tili i t'an lac Yum ba' añon cha'an mach joñonic mi caj c mel. Tsi' yʌlʌ: “Cabʌl tsa' cha'le tsʌnsa baqui jach tsa' majliyet ti guerra. Jini cha'an mach mejlic a wa'chocobeñon cotot, come tsaj q'uele wen cabʌl tsa' cha'le tsʌnsa.

⁹ Awilan mi caj i yilan pañimil juntiquil a walobil. Ñʌch'ʌl mi caj i yajñel, come joñon mi caj c ñʌch'chocobeñob i contrajob ti' tojlel. Jini cha'an mi caj i yotsʌbentel i c'aba' ti Salomón (an i ñʌch'tʌlel i pusic'al). Che' ti' yorajlel i yumʌntel mi caj cʌc'ob ti ajñel ti ñʌch'ʌl pejtelel jini israelob. Mi caj cʌq'ueñob i c'aj i yo.

¹⁰ Salomón mi caj i wa'chocobeñon cotot. Mi' caj ti ochel ti calobil. Mi caj i tatiñon. Mi caj cʌq'uen i ye'tel i yalobilob yic'ot i p'olbalob ti' tojlel israelob c'ʌlʌl ti pejtelel ora”, che'en.

¹¹ Jini cha'an wʌle calobil, la' i wen coltañet lac Yum cha'an ma' ch'ejl'esan a bʌ cha'an ma' wa'chocoben i Templo lac Yum che' bajche' tsi' subeyon.

¹² La' i wen aq'ueñet lac Yum i tojel yic'ot i ña'tʌbal, yic'ot a yumʌntel cha'an ma' jac'ben pejtelel i t'an yic'ot i mandar.

¹³ Che' jini mi caj a wen coltʌntel, mi tsa' jac'be pejtelel i t'an yic'ot i subal lac Yum tsa' bʌ i wʌn subeyob israelob ti' tojlel Moisés. Ch'ejl'esan a bʌ, yom p'ʌtʌlet. Mach yomic ma' cha'len bʌq'uen. Mach yomic mi' c'uñ'an a pusic'al.

¹⁴ Joñon tsa'ix c cha'le wersa cha'an mic tempan jo'c'al mil talento oro cha'an ma' melben i yotot lac Yum, yic'ot jump'ejl millón talento jini plata, yic'ot bronce, yic'ot tsucu taq'uin mach bʌ anic i p'isol i yalel, come c'ax cabʌl. Mach jinic jach pero tsac tempa ja'el jini xajlel yic'ot te' tac. Jini cha'an mux caj a wa'chocon jatet.

¹⁵ Come cabʌlix a winicob mu' bʌ mejlel i tsepob te', yic'ot albañilob, yic'ot carpinterojob, yic'ot yambʌ winicob chajpʌbilo' bʌ cha'an jujunchajp e'tel.

¹⁶ Wen yujilob e'tel ti oro, yic'ot ti plata, yic'ot ti bronce yic'ot ti tsucu taq'uin. Jini cha'an tejchen ti ora cha'an ma' tech jini e'tel. Lac Yum la' i wen coltañet, che'en.

¹⁷ David tsi' sube jini ñuc taco' bʌ i ye'tel ti' tojlel israelob cha'an mi' coltañob Salomón.

¹⁸ An la' wic'ot lac Yum Dios tsa' bʌ i yʌc'ʌyetla ti ajñel ti ñʌch'ʌl ti' tojlel la' contrajob, che'en. Come jini tsi' yʌq'ueyon tic wenta pejtelel jini winicob chumulo' bʌ ti yan tac bʌ tejclum. Pejtelel jini tejclum tac tsa'ix ochi ti' wenta lac Yum yic'ot ti' wenta i winicob.

¹⁹ Jini cha'an wʌle ti jump'ejl jach la' pusic'al yom mi la' sʌclan lac Yum Dios. Ch'ojyenla cha'an mi la' wa'chocoben jini ch'ujul bʌ i yotot lac Yum Dios, cha'an ya'i mi la' ch'ʌmben majlel jini Arca ba' lotol i trato lac Yum, yic'ot pejtelel jini ch'ujul bʌ uch'ibʌl tac i cha'an bʌ Dios. Ti pejtelel mi caj i ch'ʌjmel ochel ti' Templo lac Yum Dios, che'en David.