1 Cronicas 21 - Chol: I T’an Dios

David tsi' yotsayob ti censo pejtelel winicob x'ixicob

¹ Ti jim bʌ ora jini xiba (Satanás) tsa' caji i contrajin Israel. Tsa' caji i xic'ben David cha'an mi' tsicob pejtelel israelob.

² Che' jini David tsa' caji i suben Joab yic'ot jini ñuc taco' bʌ i ye'tel: Cucula c'ʌlʌl ti Beerseba yic'ot c'ʌlʌl ya' ti Dan cha'an mi la' chuc ti censo jini israelob. Che' ujtemix ti pejtelel, yom mi la' tilel la' subeñon, che'en David.

³ Joab tsi' yʌlʌ: La' i p'ojlesan lac Yum bajc'ʌl winicob. A cha'añʌch ti' pejtelel. ¿Chucoch woli a ña'tan a mel jini? Jiñʌch mulil ti' tojlel israelob, che'en Joab.

⁴ Pero jini rey David tsi' wersa choco majlel Joab. Jini cha'an ti wersa tsa' caji i pam xʌn ñumel i lumal Israel. Tsa' cha' sujti ti Jerusalén cha'an mi' suben David jaytiquil winicob tsi' yotsa ti censo.

⁵ Tsa' tajleyob ti Israel jump'ejl millón yic'ot jo'c'al mil (1,100,000) winicob mu' bʌ i mejlel ti majlel ti guerra. Ti Judá añob jumbajc' yic'ot lujump'ejl i chʌnc'al mil (470,000) mu' bʌ i majlelob ti guerra.

⁶ Jini levíjob ma'anic tsa' ch'ʌjmiyob ti tsic yic'ot jini benjamiñob, come ch'ijiyem i pusic'al Joab cha'an i t'an jini rey.

⁷ Che' ja'el lac Yum mach uts'atic tsi' q'uele i tsicol winicob. Jini cha'an lac Yum tsi' yʌq'ueyob wocol jini israelob.

⁸ Pero David tsi' sube lac Yum: Joñon tsac taja c mul ti a tojlel che' bʌ tsac tsiqui winicob. A wocolic ñusʌbeñon c mul, come tsac mele chuqui jontol, che'en.

⁹ Lac Yum tsi' sube Gad, jini am bʌ i ña'tʌbal ti' tojlel David:

^10-11 Yom ma' suben David: “Lac Yum tsi' yʌlʌ an uxchajp wocol woli bʌ i pʌsbeñet cha'an ma' yajcan junchajp.

¹² Ña'tan baqui bʌ yom, mi uxp'ejl jab wi'ñal, o mi uxp'ejl uw mi la' tic'lʌntel ti' tojlel la' contrajob, o mi uxp'ejl q'uin jontol bʌ c'amʌjel che' mi caj i ñumel ti lum i yángel lac Yum”. Che' tsi' yʌlʌ lac Yum. Jini cha'an yom ma' ña'tan chuqui yom mic suben jini tsa' bʌ i chocoyon tilel, che'en Gad.

¹³ Che' jini David tsi' sube Gad: Wen wocol jax mic yajcan. Wen ch'ijiyem jax c pusic'al. Jini cha'an, la' i yʌq'ueñonla wocol lac Yum che' bajche' yom. La' i p'untañonla, come mach p'isbilic i c'uxbiya ti pejtelel pañimil, pero mach uts'atic mi lac yajlel ti' c'ʌb winicob, che'en.

¹⁴ Che' jini lac Yum tsi' choco tilel jontol bʌ c'amʌjel ti' tojlel israelob. Ti jim bʌ q'uin tsa' chʌmiyob lujump'ejl i chʌnc'al mil (70,000) winicob x'ixicob.

¹⁵ Lac Yum tsi' choco majlel i yángel cha'an mi' jisa Jerusalén, pero lac Yum tsi' cha' p'unta jini winicob. Tsi' cha' tiq'ui jini ángel: Cʌyʌx, mach a chʌn jisañob, che'en. Ti jimbʌ ora i yángel lac Yum ya'ix an ti' t'ejl i patio Ornán jini jebuseo ya' ba' mi' jats' i trigo.

¹⁶ Che' bʌ tsi' ts'ita' letsa i wut David ti panchan, tsi' q'uele ya' wa'al i yángel lac Yum ya' ti yojlil pañimil, bots'bil i cha'an i yespada ti' c'ʌb cha'an mi' jisan jini año' bʌ ti Jerusalén. David yic'ot jini xñox taco' bʌ ya' ti tejclum tsi' ñocchocoyob i bʌ. Tsi' lʌpʌyob coxtal.

¹⁷ Che' jini David tsa' caji' pejcan Dios: Tilem tic bajñel pusic'al tsac mele i tsicol winicob. C mulʌch. Jiñʌch ñuc bʌ c sajtemal. Pero ma'anic i mul ili winicob x'ixicob año' bʌ tic wenta. C Yum Dios, la' c toj joñon quic'ot c pi'ʌlob, pero p'untan a tejclumob ame laj jilicob ti ili wocol, che'en David.

¹⁸ Jini cha'an i yángel lac Yum tsi' sube Gad cha'an mi' majlel i tsictesʌben David, yomʌch mi' chajpʌben lac Yum jump'ejl pulʌntib ya' ti' patio Ornán jini jebuseo.

^19-20 Jini cha'an David tsa' majli i q'uel Ornán ba' woli' jats' trigo. Che' bʌ tsi' sutq'ui i bʌ Ornán, tsi' q'uele jini ángel. Ti ora tsa' puts'iyob jini chʌntiquil i yalobilob ya' bʌ tem añob yic'ot ti jats' trigo.

²¹ Tsi' cʌyʌ i ye'tel Ornán che' bʌ tsi' q'uele ya' woli' tilel jini rey. Tsa' majli i ñocchocon i bʌ ba'an David.

²² Che' jini David tsi' sube: Chombeñon ili a patio cha'an mic wa'chocoben i pulʌntib i majtan lac Yum cha'an mi' tijq'uelob ti chʌmel jini winicob ti ili tejclum. Yom ma' subeñon bajche' i tojol, che'en David.

²³ Ornán tsi' sube: Che jach ma' ch'ʌm. Yom ma' mel che' bajche' tsa' ña'ta. Muq'uix cʌc' ja'el jini wacax cha'an mi' pulbentel lac Yum ti' majtan, yic'ot si', yic'ot trigo cha'an majtañʌl. Joñon mi cʌc' ti pejtelel, che'en Ornán.

²⁴ David tsi' jac'be: Mach comic tic majtan. Muc'ʌch c tojbeñet che' bajche' c'amel a wom, come mi caj cʌq'uen lac Yum ti' majtan. Ma'anic mi caj c pulben tsʌnsʌbil bʌ i majtan lac Yum che' ma'anic tsac wis tojo, che'en.

²⁵ Che' jini David tsi' yʌq'ue Ornán lujump'ejl i yuxc'al mil (50,000) peso oro i tojol jini lum yic'ot jini wacax.

²⁶ Che' jini David tsa' caji i wa'chocoben i pulʌntib i majtan lac Yum. Tsa' caji i pulben tsʌnsʌbil bʌ i majtan lac Yum yic'ot yambʌ majtañʌl cha'an i tijicñʌyel i pusic'al. Tsa' caji i pejcan lac Yum ti oración. Lac Yum tsi' choco tilel c'ajc ti panchan cha'an mi' pul jini majtañʌl.

²⁷ Che' jini lac Yum tsi' tiq'ui jini Angel woli bʌ ti jisaya. Ti ora jach tsi' cha' otsa' i yespada ti' yotot.

Ya' ba' tsi' meleyob Templo

²⁸ Che' bʌ tsi' q'uele David bajche' lac Yum tsi' jac'be i yoración, David tsi' cha' aq'ue tsʌnsʌbil bʌ i majtan.

²⁹ Ya' an ti bujtʌl i c'aba' Gabaón jini pisil bʌ i yotot lac Yum yic'ot jini pulʌntib tsa' bʌ i mele Moisés ya' ti tiquiñal pañimil.

³⁰ Pero David ma'anix tsa' mejli ti majlel i pejcan Dios ya'i, come tsa' wen ochi i bʌq'uen cha'an jini Angel tsa' bʌ i jisa cabʌl winicob.