1 Cronicas 15 - Chol: I T’an Dios

David tsi' c'axtesa tilel jini Arca ti Jerusalén

¹ David tsi' wa'choco i yotot tac ti Jerusalén. Tsi' chajpa jump'ejl tsiji' bʌ Tabernáculo cha'an jini Arca i cha'an bʌ Dios.

² David tsa' caji i yʌc' jini mandar: Che' mi laj c'axtesan tilel jini Arca, cojach jini levíjob mi mejlel i q'uechob tilel, come wa'chocobilob jini levíjob cha'an mi' q'uechob jini Arca, cha'an mi' melbeñob i ye'tel ti pejtelel ora, che'en.

³ David tsi' laj wets'eyob tilel pejtelel jini israelob ya' ti Jerusalén, cha'an mi' tem c'axtesañob tilel jini Arca ti tsiji' bʌ Tabernáculo.

^4-10 David tsi' pʌyʌ tilel i p'olbalob Aarón yic'ot jini levíjob. Jiñobʌch iliyi: 120 loq'uemo' bʌ ti' p'olbal Coat, Uriel jiñʌch i yum. 220 loq'uemo' bʌ ti' p'olbal Merari, Asaías jiñʌch i yum. 130 loq'uemo' bʌ ti' p'olbal Gersón, Joel jiñʌch i yum. 200 loq'uemo' bʌ ti' p'olbal Elizafán, Semaías jiñʌch i yum. 80 loq'uemo' bʌ ti' p'olbal Hebrón, Eliel jiñʌch i yum. 112 loq'uemo' bʌ ti' p'olbal Uziel, Aminadab jiñʌch i yum.

¹¹ Che' jini David tsi' pʌyʌ tilel jini motomajob, Sadoc yic'ot Abiatar, yic'ot jini ñuc bʌ motomajob, yic'ot i yumob levíjob: Uriel, Asaías, Joel, Semaías, Eliel, Aminadab.

¹² David tsi' subeyob: Jatetla i yumetla levíjob. Sʌq'uesan la' bʌ, temel yic'ot pejtelel la' pi'ʌlob, cha'an mi la' c'axtesan tilel jini Arca ti' yajñib tsa' bʌ c chajpa.

¹³ Lac Yum tsi' jats'ʌyonla ti yambʌ ora, come ma'anic tsa' la' q'ueche tilel, che'en David.

¹⁴ Che' jini tsa' caji i sʌq'uesañob i bʌ jini motomajob yic'ot jini levíjob cha'an mi' ch'ʌmbeñob tilel jini Arca i cha'an bʌ lac Yum i Dios israelob.

¹⁵ Jini levíjob tsa' caji i q'uechob tilel jini Arca ti' quejlab yic'ot cha'ts'ijt te', che' bajche' tsi' wʌn subu Moisés cha'an ti' mandar lac Yum.

¹⁶ David tsi' subeyob jini año' bʌ i ye'tel ti' tojlel levíjob, cha'an mi' wa'chocoñob jini yujilo' bʌ c'ay yic'ot yujilo' bʌ i ñijcʌntel música, yic'ot salterio, yic'ot arpa, yic'ot címbalo, cha'an mi' ñijcañob cha'an i tijicñʌyelob i pusic'al.

¹⁷ I yumob jini yujilo' bʌ música jiñobʌch Hemán (i yalobil Joel), Asaf (i yalobil Berequías), Etán (i yalobil Cusaías). Loq'uemob ti' p'olbal Merari.

¹⁸ I yaj coltayajob i yumob música jiñobʌch iliyi: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías, Obed Edom, Jeiel, jini xcʌntati' templojob.

¹⁹ Tsa' wa'chocontiyob Hemán, yic'ot Asaf, yic'ot Etán cha'an mi' ñijcañob címbalo tac melbil bʌ ti bronce.

²⁰ Tsa' wa'chocontiyob Zacarías, Aziel, Semiramot, Jehiel, Uni, Eliab, Maasías, Benaía cha'an mi' cha'leñob c'ay che' woli' ñijcʌntel arpa.

²¹ Jini xñijca arpajob jiñobʌch: Matatías, Elifelehu, Micnías, Obed Edom, Jeiel, Azazías.

²² Jini tsa' bʌ i cʌntesa c'ay jiñʌch Quenanías, i yum levíjob. Wen yujil música.

²³ Jini xcʌntayajob cha'an Arca jiñobʌch Berequías yic'ot Elcana.

²⁴ Tsa' yajcʌntiyob motomajob mu' bʌ i ñijcañob trompeta cha'an ñaxan mi' majlelob ti marcha. Jiñobʌch iliyi: Sebanías, Josafat, Natanael, Amasai, Zacarías, Benaía, Eliezer. Obed Edom yic'ot Jehías tsi' cʌntayob jini Arca.

²⁵ Che' jini David yic'ot jini año' bʌ i ye'tel ti Israel yic'ot jini ñuc bʌ yumʌlob cha'an soldadojob tsa' majliyob ti' tijicñʌyel i pusic'al ya' ti' yotot Obed Edom cha'an mi' ch'ʌmob majlel jini Arca ti Jerusalén.

²⁶ Dios ma'anic tsi' jisa jini levíjob tsa' bʌ i q'uecheyob majlel jini Arca. Jini cha'an tsi' yʌq'ueyob Dios wuccojt tat wacax yic'ot wuccojt tiñʌme' cha'an tsʌnsʌbil bʌ i majtan.

²⁷ David lʌpbil i cha'an lino bʌ bujcʌl, yic'ot jini levíjob woli bʌ i q'uechob majlel Arca, yic'ot jini xc'ayob, yic'ot Quenanías mu' bʌ i tech c'ay. Lʌpbil i cha'an David ja'el jump'ejl efod melbil bʌ ti lino bʌ pisil.

²⁸ Che'ʌch tsi' ch'ʌmʌyob tilel jini Arca ti Jerusalén jini año' bʌ i ye'tel ti Israel. Tsi' cha'leyob c'am bʌ t'an ti' tijicñʌyel i pusic'al. Tsi' wusuyob trompeta tac. Tsi' jats'ʌyob címbalo tac, yic'ot arpa tac, yic'ot salterio.

²⁹ Che' woli' c'otel jini Arca ti Jerusalén, jini Mical i yixic'al Saúl, tsi' ñajtʌ q'uele ti ventana che' bʌ woli ti ñuqui tijp'ejl David. Che' jini Mical tsa' caji i ts'a'len ti' pusic'al.