1 Cronicas 14 - Chol: I T’an Dios

Hiram tsi' choco majlel suboñelob ba'an David

¹ Hiram i rey jini año' bʌ ti Tiro tsi' choco majlel suboñelob ba'an David. Tsi' choco majlel ch'ujte' yic'ot albañilob yic'ot carpinterojob cha'an mi' melbeñob i yotot David.

² Che' jini David tsi' ña'ta che' bʌ tsa' ochi ti rey ti' tojlel jini israelob, wa'chocobilʌch i cha'an lac Yum cha'an mi' tajob i wenlel jini israelob.

I yalobilob David tsa' bʌ i yilayob pañimil ti Jerusalén

³ Tsi' pʌyʌ yambʌ i yijñam jini David ya' ti Jerusalén. Tsi' yilayob pañimil ch'iton bʌ yic'ot xch'oc bʌ i yalobilob David.

^4-7 Jiñʌch i c'aba' tac i yalobilob tsa' bʌ i yilayob pañimil ti Jerusalén: Samúa, Sobab, Natán, Salomón, Ibhar, Elisúa, Elpelet, Noga, Nefeg, Jafía, Elisama, Beeliada, Elifelet.

David tsi' jisa jini filisteojob

⁸ Che' bʌ tsi' yubiyob jini filisteojob wa'chocobilix David ti rey ti Israel, tsa' letsiyob tilel cha'an mi' wersa chucob David. Pero David tsi' yubi wolix i tilelob. Jini cha'an tsi' tempa i soldadojob.

⁹ Jini filisteojob woli' jisañob ñumel jini joctʌl bʌ lum i c'aba' Refaim.

¹⁰ David tsi' c'ajtibe lac Yum ti oración: Mi tsa' majli j contrajin jini filisteojob ti guerra, ¿mu' ba caj a coltañon? che'en. Lac Yum tsi' jac'ʌ: Mu' cu caj j coltañet, che'en.

¹¹ Jini cha'an David tsa' majli i contrajin jini filisteojob ya' ti Baal Perazim. Tsi' laj jisayob. Che' jini David tsi' yʌlʌ: Dios tsa'ix i c'ʌñʌyon cha'an mic laj misun majlel jini filisteojob che' bajche' but'ja' mu' bʌ i poc majlel misujelʌl, che'en. Jini cha'an tsi' yotsʌbe i c'aba' jini lum ti Baal Perazim (mu' bʌ i yʌl ti lac t'an, mi' laj misuntel majlel).

¹² Jini filisteojob tsi' cʌyʌyob i dioste' tac. David tsi' yʌc'ʌ mandar cha'an mi' pulob ti c'ajc.

¹³ Ti wi'il jini filisteojob tsa' cha' ochiyob ti jini joctʌl.

¹⁴ David tsi' cha' c'ajtibe Dios bajche' yom mi' mel. Dios tsi' sube: Yom mi la' joy majlel jini filisteojob. Che' jini mi mejlel a contrajiñob ti guerra ya' ba'an jini te' i c'aba' balsamera.

¹⁵ Che' ma' wubin jini ju'ucña bʌ ya' ti balsamera te', yom ma' majlel ba' añob ti ora, come mi caj j coltañet cha'an ma' jisan jini filisteojob. Che' tsi' yʌlʌ Dios.

¹⁶ Che' jini David tsi' mele che' bajche' Dios tsi' sube. Tsi' laj jisa jini filisteojob c'ʌlʌl ti Gabaón c'ʌlʌl ti Gezer.

¹⁷ Tsa' pam tsictiyi ti' joytʌlel i lumal chuqui tac ñuc woli' mel David. Lac Yum tsi' yotsʌbeyob i bʌq'uen jini tejclumob cha'an mi' p'isob ti' wenta David.