1 Cronicas 13 - Chol: I T’an Dios

David yom i ch'ʌm tilel Arca ti Jerusalén

¹ David tsi' ñaxan ubibeyob i t'an jini yumʌlob año' bʌ ti' wenta jujump'ejl mil soldadojob, yic'ot jini yumʌlob ti jo'joc'al bʌ soldadojob, temel yic'ot pejtelel i yumob soldadojob.

² David tsi' subeyob jini tempʌbilo' bʌ israelob: Mi che'ʌch la' wom, mi che'ʌch yom lac Yum Dios ja'el, mi caj lac choc ti pʌyol jini lac pi'ʌlob tsa' bʌ cʌleyob ti yan tac bʌ tejclum ti Israel. La tilicob motomajob yic'ot levíjob ja'el.

³ Yom mi lac cha' ch'ʌm tilel jini Arca i cha'an bʌ lac Dios cha'an mi' yajñel la quic'ot, come che' bʌ tsa' wa'choconti ti rey Saúl c'ʌlʌl wʌle ma'anix tsa' laj q'uele', che'en David.

⁴ Che' jini pejtelel jini israelob tsi' yʌlʌyob che'ʌch yom, come uts'at tsi' yubibeyob i t'an David.

David tsi' ñopo i ch'ʌm tilel jini Arca

⁵ David tsi' tempa pejtelel jini israelob ti pejtelel i lumal cha'an mi' majlel i ch'ʌmob tilel jini Arca am bʌ ti Quiriat Jearim.

⁶ Che' jini David temel yic'ot pejtelel israelob tsa' majliyob ya' ti Baala (jiñʌch Quiriat Jearim) am bʌ ti Judá cha'an mi' cha' c'axtesañob jini Arca i cha'an bʌ Dios am bʌ i yumʌntel ti' tojlel querubiñob.

⁷ Tsi' ch'ʌmʌyob loq'uel ti' yotot Abinadab. Tsi' yotsayob majlel jini Arca ti tsiji' bʌ carreta. Uza yic'ot Ahío tsi' toj'esayob majlel jini tat wacax woli bʌ i tujc'añob majlel carreta.

⁸ Che' jini David yic'ot pejtelel israelob tsi' ñuq'uesʌbeyob i c'aba' lac Yum ti c'ay yic'ot ti son. Tsi' ñijcayob arpa tac, yic'ot salterio, yic'ot lajte', yic'ot címbalo, yic'ot trompeta tac.

⁹ Pero che' bʌ tsa' c'otiyob ti Quidón ba' mi' jajts'el trigo, jini tat wacax tsa' caji i p'ojquiñob majlel i yoc. Colel i yajlel tac. Jini cha'an Uza ti ora tsi' sʌts'ʌ i c'ʌb cha'an mi' chuc jini Arca.

¹⁰ Che' jini lac Yum tsi' mich'le Uza. Ti ora tsa' chʌmi cha'an ti' caj tsi' sʌts'ʌ i c'ʌb ba'an jini Arca. Jini cha'an tsa' chʌmi Uza ti' tojlel lac Yum.

¹¹ Tsa' mich'a David cha'an tsi' tsʌnsa Uza lac Yum. Jini cha'an tsi' yotsʌbe i c'aba' jini ajñibʌl Perez Uza ba' tsa' chʌmi Uza. Che'ʌch mi' yʌlob c'ʌlʌl ti ili ora.

¹² Che' jini David tsa' caji i bʌc'ñan Dios. Tsi' yʌlʌ: ¿Bajche'ca mi caj c ch'ʌm tilel jini Arca i cha'an bʌ Dios? che'en.

¹³ Ma'anic tsi' ch'ʌmʌ tilel jini Arca ti Jerusalén. Ya' jach tsi' cʌyʌ ti' yotot Obed Edom jini geteo.

¹⁴ Jini Arca i cha'an bʌ Dios tsa' ajni uxp'ejl uw ba'an Obed Edom yic'ot i pi'ʌlob. Lac Yum tsi' wen coltayob. Tsi' yʌq'ueyob i wenlel.