1 Cronicas 10 - Chol: I T’an Dios

Tsa' chʌmi Saúl yic'ot i yalobilob

¹ Jini filisteojob tsi' contrajiyob ti guerra jini israelob. Jini israelob tsa' puts'iyob majlel. Tsa' tsʌnsʌntiyob ya' ti wits i c'aba' Gilboa.

² Jini filisteojob tsi' tajayob Saúl yic'ot i yalobilob Jonatán, Abinadab, yic'ot Malquisúa. Tsi' laj tsʌnsayob.

³ Cabʌl tsa' contrajinti Saúl ti guerra. Jini filisteojob yujilo' bʌ jalʌjb tsi' juluyob Saúl.

⁴ Saúl c'am tsi' pejca jini xcʌntaya i cha'an: Tsʌnsañon yic'ot a wespada ame i tic'lañoñob jini winicob mach bʌ cʌmbilobic i cha'an Dios, che'en Saúl. Pero cha'an bʌq'uen ma'anic tsi' jac'ʌ i winic. Jini cha'an Saúl tsi' loc'sa i bajñel espada. Tsi' wʌlʌc yʌsa i bʌ ti' ni' i yespada.

⁵ Jini xcʌntaya i cha'an Saúl, che' bʌ tsi' q'uele chʌmenix i yum, tsi' wʌlʌc tsʌnsa i bʌ ja'el.

⁶ Che' jini tsa' chʌmi Saúl yic'ot uxtiquil jini ch'iton bʌ i yalobilob ti junyajlel. Ti jump'ejl jach q'uin tsa' bʌc' lu' jili i yumʌntel Saúl.

⁷ Jini israelob año' bʌ ti joctʌl ya' ti entʌl tsi' yubiyob bajche' tsa' puts'iyob jini soldadojob israelo' bʌ. Tsi' yubiyob chʌmeñobix Saúl yic'ot i yalobilob. Jini cha'an tsi' cʌyʌyob i tejclum tac. Tsa' puts'iyob ja'el. Jini filisteojob tsa' c'otiyob ti chumtʌl ti' tejclum tac israelob.

⁸ Che' ti' yijc'ʌlal jini filisteojob tsa' cha' majliyob i chilbeñob i chubʌ'an jini ch'ujlelʌl tac. Tsi' tajayob i bʌc'tal Saúl yic'ot i yalobilob.

⁹ Tsi' loc'sʌbeyob i bujc Saúl melbil bʌ ti tsucu taq'uin. Tsi' tsepbeyob loq'uel i bic'. Tsi' chocoyob majlel winicob cha'an mi' pʌsob ñumel i jol Saúl ti pejtelel tejclum tac. Tsi' cha'leyob q'uiñijel ti' tojlel i dios tac.

¹⁰ Tsi' joc'chocobeyob i bujc Saúl melbil bʌ ti tsucu taq'uin ti' bojte'lel i templo i dioste' tac. Tsi' joc'chocobeyob i jol ja'el ti' bojte'lel i templo Dagón.

¹¹ Che' bʌ tsi' yubiyob jini año' bʌ ti Jabes Galaad chuqui tsi' tumbeyob i bʌc'tal Saúl jini filisteojob,

¹² jini ch'ejl bʌ soldadojob ya'i tsa' majli i cha' q'uechob tilel i bʌc'tal Saúl yic'ot i bʌc'tal jini uxtiquil i yalobilob. Tsi' mucuyob ti' yebal jini c'ololte' ya' ti Jabes. Wucp'ejl q'uin tsi' yuc'tayob. Tsi' cha'leyob ch'ajb.

¹³ Tsa' chʌmi Saúl cha'an tsi' ñusʌbe i t'an lac Yum, cha'an tsi' pejca jini x'ixic yujil bʌ wujt.

¹⁴ Ma'anic tsi' c'ajtibe lac Yum chuqui yom i mel. Jini cha'an lac Yum tsi' tsʌnsa. Tsi' yʌq'ue i yumʌntel David i yalobil Isaí.