Salmos 81 - Chol de Tumbalá Bible

I yutslel i pusic'al Dios

¹ C'ʌyinla jini p'ʌtʌl bʌ Dios lac cha'an. Cha'lenla c'am bʌ t'an ti' tojlel i Dios Jacob cha'an tijicña la' pusic'al.

² Wen cha'lenla c'ay. Ñijcanla jini arpa yic'ot salterio.

³ Wusula trompeta che' mi' pasel uw Yic'ot che' pomolix, che' mi lac mel q'uin.

⁴ Come che'ʌch mi lac mel ti Israel. Che'ʌch tsi' yʌc'ʌ mandar i Dios Jacob.

⁵ Jiñʌch tsa' bʌ i yʌlʌ Dios Che' bʌ tsa' caji' pʌs i p'ʌtʌlel ti' contra i lumal Egipto. Tsa' cubibe i t'an jini mach bʌ j cʌñʌyic.

⁶ Dios tsi' yʌlʌ: Tsac chucbe jubel i cuch ti' pat, Tsac chucbe jubel jini al bʌ chiquib jich'iye'el bʌ i cha'an.

⁷ Jatet tsa' pejcayon che' woliyet ti wocol, tsa cʌc'ʌyet ti libre. Tsac jac'beyet ya' ti tocal ba' woli ti t'an chajc. Tsa quilʌbeyet a pusic'al ya' ti ja' i c'aba' Meriba.

⁸ Ubinla winicob x'ixicob c cha'an. Mi caj c subeñet, Israel, mi a wom a ch'ujbibeñon c t'an:

⁹ Mach yomic dioste' ti a tojlel. Ma'anic mi caj a ch'ujutesan dioste'.

¹⁰ Joñon a Yumon, a Dioson, Tsa' bʌ c pʌyʌyet loq'uel ti' lumal Egipto. Yom ma' wen c'ajtibeñon chuqui tac a wom. Mi caj cʌq'ueñet, cho'on.

¹¹ Pero c winicob x'ixicob ma'anic tsi' ch'ujbibeyon c t'an. Ts'a' tsi' q'ueleyoñob.

¹² Jini cha'an tsaj cʌyʌyob cha'an i tsʌtslel i pusic'alob, Cha'an mi' melob che' bajche' i bajñel yomob.

¹³ Uts'atax tsa'ic i ch'ujbibeyon c t'an jini c cha'año' bʌ, Tsa'ic i cha'leyob xʌmbal israelob tic bijlel.

¹⁴ Che'ic jini tsac t'uchtbeyob i contrajob. Tsaj contraji jini woli bʌ i tic'lañob.

¹⁵ Che'ic jini tsa'ix i yotsayob i bʌ tic wenta jini woli bʌ i ts'a'leñoñob, Che' xuc'ul tsa' chʌn ajniyob israelob ti pejtelel ora.

¹⁶ Tsa'ic i jac'beyoñob, tsac wen we'sayob ti trigo, jini wen fino bʌ. Tsa cʌq'ueyob chab loq'uem bʌ ti xajlel cha'an mi' wen jastiyelob, che'en Dios.