Proverbios 8 - Chol de Tumbalá Bible

Wen ñuc i c'ʌjñibal lac ñatʌbal

¹ Jini mach bʌ anic i p'isol i ña'tʌbal c'am mi' cha'len t'an. Jini mu' bʌ i wen ch'ʌmben isujm mi' pʌyonla cha'an mi la cubiben i t'an.

² Ya' mi' wa'tʌl ti chan bʌ wits ti' t'ejl bij yic'ot ti' xʌc' bij.

³ Ya' ba' mi' cha'leñob meloñel ti' ti' tac tejclum c'am mi' cha'len t'an.

⁴ Mi' yʌl: Winicob, wolic pejcañetla. Wolic pejcan pejtel año' bʌ ti pañimil.

⁵ Jatetla mach bʌ anic la' pusic'al yilal, ña'tanla bajche' yom mi la' mel ti pañimil. Jatetla tontojet bʌ la, yom mi la' wʌc' ti la' pusic'al chuqui uts'at.

⁶ Ubinla c t'an come uts'atax chuqui wolic sub. Toj pejtel c t'an.

⁷ Mic sub chuqui tac isujm. Ma'anic mic wis sub jontolil.

⁸ Toj pejtel c t'an mu' bʌ c sub. Ma'anic i sajtemal. Mach sojquemic.

⁹ Pejtel año' bʌ i pusic'al toj mi' yubiñob c t'an. Uts'atax mi' yubiñob jini mu' bʌ i ch'ʌmbeñob isujm.

¹⁰ Yom mi la' c'uxbin j cʌntesʌbal ñumen bajche' sʌsʌc taq'uin. Mulanla wen bʌ la' ña'tʌbal. Mach mi la' mulan oro anquese wen fino bʌ.

¹¹ Come jini wen bʌ la' ña'tʌbal jiñʌch mero yom bʌ. Ñumen an i c'ʌjñibal bajche' letsem bʌ i tojol xajlel. Ti pejtelel chuqui tac la com ma'anic yambʌ lajal bajche' jini.

¹² Joñon mi cʌq'ueñetla wen bʌ la' ña'tʌbal. Añon ti' pusic'al jini mu' bʌ i wen ña'tan pañimil. Sajcan cabʌl a pusic'al, sajcan a toj'esʌntel. Mux a taj ti joñon.

¹³ Jini mu' bʌ i bʌc'ñan lac Yum mi' ts'a'len jontolil. Mic ts'a'len jini mu' bʌ i chañ'esan i bʌ, yic'ot jini mu' bʌ i q'uel ti pec' i pi'ʌlob, yic'ot jini maña jax bʌ i pusic'al, yic'ot jini mu' bʌ i cha'len lot.

¹⁴ Joñon mi cʌq'ueñetla wen bʌ la' ña'tʌbal. Mic pʌsbeñetla bajche' yom ma' mel. Ma'anic i p'isol c ña'tʌbal. Ma'anic i p'isol c p'ʌtʌlel.

¹⁵ Joñon mi cʌq'ueñob wen bʌ i ña'tʌbal yumʌlob cha'an mi' melob ñuc bʌ i ye'tel. Joñon mi cʌq'ueñob i p'ʌtʌlel ti toj bʌ meloñel.

¹⁶ Joñon mi cʌq'ueñob i cha'len yumʌl jini ñuc bʌ winicob. Mi cʌq'ueñob i ye'tel ti meloñel.

¹⁷ Mij c'uxbin jini mu' bʌ i cha'leñob wersa i tajob wen bʌ i ña'tʌbal. Jini mu' bʌ i sajcañob wen bʌ i ña'tʌbal mi caj i tajob.

¹⁸ Mi cʌq'ueñob i chubʌ'an yic'ot i c'uxbintel. Mach jilic i chubʌ'an yic'ot i wenlel tic tojlel.

¹⁹ Ñumen uts'at bajche' oro chuqui tac mi cʌq'ueñob. Ñumen uts'at bajche' sʌsʌc taq'uin wen fino bʌ.

²⁰ Mi cʌq'ueñob i mel chuqui toj come mic mulan chuqui toj.

²¹ Mu' to cʌq'ueñob i chubʌ'an jini yom bʌ i wersa tajob wen bʌ i ña'tʌbal. Mi caj c bujt'esʌbeñob i caxa.

²² I cha'añoñix Dios che' ti' cajibal i melbal, che' maxto melbilic pañimil.

²³ C'ʌlʌ wajali ma'anic i p'isol c ña'tʌbal. Añon ti cajibal che' maxto anic pañimil.

²⁴ Che' maxto anic jini tam tac bʌ ñajb ya' añon, i ña'tʌbalon. Che' maxto anic jini cuxul bʌ ja',

²⁵ che' maxto anic tsa' ajni jini wits, che' maxto anic jini bujtʌl tac, ya' añon.

²⁶ Che' maxto anic tsa' mejli pañimil mi joctʌl tac, che' maxto anic lum ti pañimil,

²⁷ che' bʌ tsi' mele jini panchan ya' añon, i ña'tʌbalon. Che' bʌ tsi' yʌc'ʌ jini panchan ti' pam jini tam bʌ ñajb,

²⁸ che' xuc'ul tsi' mele jini panchan ti chan, che' bʌ tsi' yʌc'ʌ cuxul bʌ ja' ti tam tac bʌ i yajñib, ya' añon.

²⁹ Che' bʌ tsi' yʌc'ʌ i ti' tac jini colem ñajb cha'an ma'anic mi' ñusʌben i t'an, che' bʌ tsi' yʌc'ʌ i c'ʌclib pañimil, ya' añon.

³⁰ Tsaj colta lac Yum ti' melol pejtel ili e'tel. Tijicña tsa cubi ti jujump'ejl q'uin. Wen contentojon ti' tojlel ti pejtelel ora.

³¹ Tijicñayon cha'an tsa' tsictiyi Dios ti pañimil. Tijicñayon cha'an tsa' tsictiyi ti' tojlel winicob. Che'ʌch mi' cha'len t'an jini mach bʌ anic i p'isol i ña'tʌbal.

³² Jini cha'an wʌle, calobilob, ñich'tʌben i t'an Dios am bʌ wen bʌ i ña'tʌbal. Come an i coltʌntel jini mu' bʌ i tajob wen bʌ i ña'tʌbal.

³³ Ñich'tan la' cʌntesʌntel, taja la' ña'tʌbal. Mach la' ñusan la' cʌntesʌntel.

³⁴ Tijicña jini winic mu' bʌ i ñich'tʌben i t'an jini mach bʌ anic i p'isol i ña'tʌbal, mu' bʌ i pijtan ya' ti pam i yotot ti jujump'ejl q'uin, mu' bʌ i pijtan ya' ti' ti' i yotot.

³⁵ Majqui jach mi' taj jini mach bʌ anic i p'isol i ña'tʌbal mi' taj i cuxtʌlel. Mi' tajben i yutslel i pusic'al lac Yum.

³⁶ Jini mu' bʌ i ñusan jini mach bʌ anic i p'isol i ña'tʌbal mi' soc i bʌ. Pejtelel mu' bʌ i ts'a'leñob yomob chʌmel.