Numeros 9 - Chol de Tumbalá Bible

I q'uiñilel Pascua

¹ Lac Yum tsi' pejca Moisés ya' ti colem bʌ i tiquiñal pañimil i c'aba' Sinaí, che' ti ñaxan bʌ uw che' wolix i tejchel i cha'p'ejlel jab i loq'uelob ti Egipto. Tsi' sube:

^2-3 Subeñob israelob cha'an mi' chajpañob i q'uiñilel Pascua ti jujump'ejl jab. Ti i chʌnlujump'ejlel (14) tsic ti ñaxan bʌ uw ti ili jab che' ti ic'ajel, mi caj la' tech jini q'uiñijel. Yom xuc'ul mi la' mel che' bajche' wolic subeñet, che'en lac Yum.

^4-5 Jini cha'an Moisés tsi' subeyob israelob cha'an mi' chajpañob i q'uiñilel jini Pascua. Tsi' meleyob ya' ti colem bʌ i tiquiñal pañimil i c'aba' Sinaí che' ti' chʌnlujump'ejlel tsic ti jini ñaxan bʌ uw che' wolix i bʌjlel q'uin. Jini israelob tsi' meleyob che' bajche' tsi' subeyob lac Yum Dios.

⁶ Pero ti jim bʌ ora añob cha'tiquil uxtiquil bibi'o' bʌ cha'an tsi' tʌlʌyob xchʌmel. Ma'anic tsa' mejli i melob i q'uiñilel Pascua ti jim bʌ ora. Tsa' c'otiyob ba'an Moisés yic'ot Aarón ti jim bʌ ora.

⁷ Tsi' yʌlʌyob: Joñon lojon bibi'on lojon cha'an tsac tʌlʌ lojon xchʌmel. ¿Chucoch tic'bilon lojon cha'an mi cʌq'uen lojon i majtan lac Yum che' i yorajlelix woli i yʌc'ob pejtelel israelob? che'ob.

⁸ Moisés tsi' jac'beyob: Pijtanla, la' to cubin chuqui mi caj i yʌl lac Yum cha'an jini woli bʌ la' ña'tan, che'en.

^9-10 Lac Yum tsi' jac'be Moisés: Subeñob jini israelob: Ña'tanla jatetla yic'ot la' walobilob, mi an majqui bibi' cha'an tsa' ajni ba'an xchʌmel, o mi ñajt añob ti xʌmbal che' ti' yorajlel, mi mejlel i melob i q'uiñilel Pascua tic tojlel ti yambʌ uw.

¹¹ Che' ti' chʌnlujump'ejlel q'uin che' ti' cha'p'ejlel uw, che' mi' bʌjlel q'uin, la' i chajpañob jini tiñʌme' cha'an mi' tsʌnsañob. Mi caj i c'uxob jini tiñʌme' yic'ot waj mach bʌ anic i levadurajlel. Yom mi' c'uxob jini ch'aj bʌ pimel.

¹² Mach yomic mi' cʌybeñob i bʌc'tal jini we'elʌl cha'an mi' cha' c'uxob ti yambʌ q'uin. Mach yomic mi' c'ʌsbeñob i bʌquel. Che'ʌch yom mi' melob i q'uiñilel Pascua* che' bajche' tsac subeyetla.

¹³ Pero mi an winic mu' bʌ i to'o cʌy i bʌ che' sʌcʌch, che' ma'anic ba' tsa' majli, cha'an jach mach yomic i mel i q'uiñilel Pascua, che' jini wersa yom mi' chojquel loq'uel ti' tojlel c winicob, come ma'anic tsi' yʌc'ʌ i bʌ che' ti' yorajlel mi' cha'leñob q'uiñijel tic tojlel. Jini cha'an i bajñel an ti' wenta i mul jini winic.

¹⁴ Mi an winic chumul bʌ la' wic'ot mach bʌ i lumalic, yom bʌ i mel Pascua ja'el, lajal yom mi' melob che' bajche' jatetla. Jini cha'an junsujm jach jini q'uiñijel mi la' mel, yic'ot jini xjula'ob chumulo' bʌ ti la' tojlel. Che' tsi' yʌlʌ lac Yum.

Tocal ti' tojel Tabernáculo

¹⁵ Ti jini jach bʌ q'uin che' bʌ tsa' ujti i wa'chocoñob jini Tabernáculo, tsi' moso jini Tocal. Che' ti ic'ajel chʌcleman tsa' majli che' bajche' c'ajc. Ya' tsa' jal'a c'ʌlʌl ti sʌc'ajel.

¹⁶ Che'ʌch tsa' ujti ti pejtelel ora. Jini Tocal tsa' bʌ i moso ti q'uiñil, chʌcleman tsa' majli che' bajche' c'ajc che' ti ac'ʌlel.

¹⁷ Pero che' bʌ tsa' caji ti letsel majlel jini Tocal am bʌ ya' ti' pam jini Tabernáculo, jini israelob tsi' tsajcayob majlel jinto tsa' wa'le jini Tocal. Ya' tsa' wa'leyob ja'el. Tsi' wa'chocoyob pisil bʌ i yototob.

¹⁸ Che'ʌch tsi' meleyob. Baqui jach bʌ ora lac Yum tsi' subeyob majlel tsa' majliyob. Che' bʌ tsi' subeyob cʌytʌl, tsa' cʌleyob ya' ba' tsa' wa'le jini Tocal.

¹⁹ Mi cabʌl tsa' jal'a jini Tocal, cabʌl tsa' jal'ayob ja'el. Tsi' meleyob che' bajche' yom lac Yum.

²⁰ Mi cha'p'ejl uxp'ejl jach q'uin ya'an jini Tocal, cha'p'ejl uxp'ejl jach q'uin ya'añob ja'el jini israelob, come che'ʌch tsi' yʌq'ueyob mandar lac Yum. Ba' ora tsi' yʌc'ʌ tac i t'an lac Yum cha'an mi' majlelob, tsa' cha' cajiyob ti xʌmbal.

²¹ An i tajol tsa' cʌle jini Tocal jump'ejl jach ac'ʌlel. Ti sʌc'an tsi' cha' techeyob i xʌmbal. An i tajol ti q'uiñil yic'ot ti ac'ʌlel tsi' tsʌcleyob majlel jini Tocal jini israelob.

²² Mi cha'p'ejl q'uin, mi jump'ejl uw, mi jump'ejl jab ya'an jini Tocal ti' pam jini Tabernáculo, ya' tsa' jal'ayob jini israelob ti' t'ejl jini Tabernáculo. Jini jach tsa' cajiyob ti xʌmbal che' bʌ tsa' caji ti xʌmbal jini Tocal.

²³ Ti' mandar lac Yum tsa' jal'ayob. Che' ja'el ti' mandar lac Yum tsa' cajiyob ti xʌmbal. Che' bajche' lac Yum tsi' wʌn sube Moisés, che'ʌch tsi' meleyob. Tsi' jac'beyob i mandar.