Numeros 6 - Chol de Tumbalá Bible

Jini nazareojob*

^1-2 Lac Yum tsi' sube Moisés: Yom ma' subeñob israelob: Jini winic mi x'ixic mu' bʌ i yʌc' i t'an tic tojlel cha'an mi' yotsan i bʌ ti nazareo

³ mach mejlic i jap jini paj'esʌbil bʌ i ya'lel ts'usub mi lembal. Mach mejlic i jap vinagre melbil bʌ ti ts'usub, mi i ya'lelic ts'usub. Mach mejlic i mʌq'ue tsij bʌ ts'usub mi jini tiquinix bʌ.

⁴ Ti pejtelel jabil che' mach set'bilic i tsutsel i jol mach mejlic i wis jap chuqui tac mi' mejlel ti ts'usub, anquese mi i bʌc' jach, mi i sujl, mach mejlic i c'ux.

⁵ Ti pejtelel ora che' mi' cha'len i ye'tel nazareo, ch'ujul jini winic. Mach mejlic i set' i tsutsel i jol jinto mi' ts'ʌctiyel i yorajlel cha'an mi' loq'uel ti ye'tel tic tojlel. Che' jini muq'uix i yʌc' ti colel i tsutsel i jol.

^6-7 Che' woli to ti ajñel bajche' nazareo tic tojlel, mach mejlic i ñochtan ch'ujlelʌl, anquese mi tsa' chʌmi i tat i ña' mi i yʌscun mi i chich. Mach mejlic i lʌc'tesan i bʌ ame bib'ac, come tsa'ix i yotsa i bʌ ti nazareo tic tojlel.

⁸ C'ʌlʌl che' bʌ tsi' yʌc'ʌ i bʌ mi' tsictiyel i ye'tel ti nazareo, ch'ujulʌch tic tojlel.

⁹ Mi tsa' chʌmi juntiquil ti' tojlel nazareo, mi' bib'an i tsutsel i jol tsa' bʌ i yʌc'ʌ ti colel tic tojlel. Jini cha'an wersa mi' set' i tsutsel i jol che' ti' wucp'ejlel q'uin cha'an mi' sʌq'uesʌntel.

¹⁰ Che' ti' waxʌcp'ejlel q'uin yom mi' pʌy tilel cha'cojt xpuruwoc o mi cha'cojt paloma, cha'an mi' yʌq'uen jini motomaj ti' ti' jini Tabernáculo.

¹¹ Jini motomaj mi caj i yʌc' juncojt cha'an i ñusʌntel mulil. Jini yambʌ mi caj i pul. Che' jini mi caj i yʌc' ti ñusʌntel i mul cha'an ti' caj jini xchʌmel.

¹² Che' jini mi' cha' cajel i sʌq'uesan i jol tic tojlel cha'an mi' ts'ʌctesan i ye'tel ti nazareo che' bajche' jayp'ejl q'uin tsi' wʌn ña'ta. Wersa mi' pʌy tilel juncojt tat tiñʌme' am bʌ jump'ejl i jabilel cha'an mi' ñusʌbentel i mul. Jini ñaxan bʌ q'uin tac che' bʌ tsa' ochi ti nazareo ma'anix mi' ch'ʌjmel ti wenta, come tsa' bib'esʌnti.

¹³ Jiñʌch mandar cha'an bajche' yom mi' mel nazareo che' mi' ts'ʌctiyel i q'uiñilel cha'an mi' loq'uel ti' ye'tel. La' tilic ti' ti' jini Tabernáculo.

¹⁴ La' i yʌq'ueñon juncojt tat tiñʌme' am bʌ jump'ejl i jabilel, mach bʌ wis anic i bibi'lel mi i c'amʌjel. Jiñʌch majtañʌl mu' bʌ i yʌc' ti pulel. La' i yʌq'ueñon ja'el xch'oc bʌ tiñʌme' am bʌ jump'ejl jab, mach bʌ wis anic i bibi'lel mi i c'amʌjel cha'an mi' ñusʌbentel i mul. La' i yʌc' juncojt tat tiñʌme' jiñʌch c'oc' bʌ ja'el. Jiñʌch majtañʌl cha'an wocolix cʌlʌ cha'an i coltʌntel.

¹⁵ Che' ja'el yom jump'ejl alʌ chiquib waj mach bʌ xʌbilic yic'ot levadura*, melbil bʌ ti sʌsʌc bʌ harina xajc'ubil bʌ yic'ot aceite yic'ot hojuela (galleta) bombil bʌ yic'ot aceite mach bʌ anic i levadurajlel. Yom majtañʌl ja'el melbil bʌ ti trigo, yic'ot japbil bʌ majtañʌl tac.

¹⁶ Muq'uix i ch'ʌm jini motomaj. Mi' yʌq'ueñon tsʌnsʌbil bʌ c majtan cha'an i ñusʌntel i mul. Mi' pulben ja'el jini tsʌnsʌbil bʌ i majtan mu' bʌ i yʌq'ueñon.

¹⁷ Che' ja'el mux i ch'ʌm jini tat tiñʌme' cha'an mi' tsʌnsʌbeñon. Jiñʌch majtañʌl cha'an mi cʌq'uentel wocolix cʌlʌ cha'an i coltʌntel. Mux i tem ch'ʌm jini pan am bʌ ti chiquib mach bʌ anic i levadurajlel. Jini motomaj mi caj i yʌq'ueñon c majtan melbil bʌ ti trigo yic'ot japbil bʌ c majtan.

¹⁸ Mux caj i set' i tsutsel i jol jini nazareo ya' ti' ti' jini Tabernáculo. Mi caj i tempan i tsutsel i jol aq'uebilix bʌ Dios. Mi caj i yotsan ti c'ajc ba' woli ti pulel jini tat tiñʌme' woli bʌ i yʌq'ueñon cha'an mi' yʌq'ueñon wocolix cʌlʌ.

¹⁹ Ti wi'il jini motomaj mux i ch'ʌm loq'uel jini pojpobilix bʌ i quejlab jini tat tiñʌme', yic'ot jini waj am bʌ ti chiquib mach bʌ anic i levadurajlel cha'an mi' yʌq'uen ti' c'ʌb jini nazareo set'bilix bʌ i tsutsel i jol.

²⁰ Mi caj i jʌmts'un jini majtañʌl tic tojlel, ch'ujul ti' pejtelel. Jini jʌmts'ubil bʌ i bʌc'tal i tajn tat tiñʌme' yic'ot i quejlab i cha'añʌch motomaj cha'an i ye'tel. Ti wi'il mi mejlel i cha' jap vino jini winic, come loq'uemix ti' ye'tel ti nazareo, come tsa'ix ts'ʌctiyi ja'el i ye'tel.

²¹ Jiñʌch ili mandar tac cha'an jini nazareo yic'ot cha'an jini majtañʌl mu' bʌ i yʌc' che' mi' loq'uel ti' ye'tel che' ts'ʌctiyemix. Ts'ʌcʌl yom mi' yʌq'ueñon ti pejtelel che' bajche' tsi' subeyon che' bʌ tsa' ochi ti nazareo. Che' tsi' yʌlʌ lac Yum.

Bendición mu' bʌ i yʌc' motomajob

^22-23 Lac Yum tsi' cha' sube Moisés: Suben Aarón temel yic'ot i yalobilob: “Che'ʌch yom mi la' wʌq'ueñob bendición israelob:

²⁴ La' i yʌq'ueñet i yutslel lac Yum. La' i cʌntañet.

²⁵ La' i q'uelet lac Yum ti' tijicñʌyel i pusic'al. La' i p'untañet.

²⁶ La' i q'uelet lac Yum ti uts'at. La' i yʌq'ueñet i ñʌch'tʌlel a pusic'al, che'etla.

²⁷ Mi caj i subob j c'aba' ti' tojlel israelob. Mi caj cʌq'ueñob i yutslel c t'an”, che'en lac Yum.