Numeros 3 - Chol de Tumbalá Bible

I tsicol yic'ot i ye'tel jini levíjob

^1-2 Che' bʌ lac Yum tsi' pejca Moisés ya' ti wits i c'aba' Sinaí, jiñobʌch i yalobilob Aarón: Nadab, Abiú, Eleazar yic'ot Itamar. (Jini yʌx alʌl jiñʌch Nadab.)

³ Ti' pejtelelob tsa' wa'chocontiyob ti' ye'tel ti motomaj.

⁴ Pero tsa' chʌmiyob Nadab yic'ot Abiú ti' tojlel lac Yum che' bʌ tsi' yotsayob yambʌ c'ajc, jini tic'bil bʌ, mach bʌ ch'ujulic. Che'ʌch tsi' meleyob ya' ti tiquiñal pañimil ya' ti Sinaí. Ma'anic i yalobilob Nadab yic'ot Abiú. Jini jach tsa' cʌleyob Eleazar yic'ot Itamar cha'an mi' cha'leñob i ye'tel ti motomaj che' cuxul to i tat.

^5-6 Lac Yum tsi' sube Moisés: Yom ma' pʌyob tilel i p'olbalob Leví cha'an mi' tilelob i coltan Aarón.

^7-9 Mi caj i jac'beñob i t'an Aarón cha'an mi' melob pejtelel jini ch'ujul bʌ e'tel ya' ti Tabernáculo. Jiñʌch i ye'tel ti' tojlel pejtelel israelob. Mi caj i laj q'uelob pejtelel chuqui tac mi' c'ʌjñel ya' ti Tabernáculo. Jini levíjob mi' cajelob ti e'tel ti' tojlel Aarón i q'uexolob i pi'ʌlob ti Israel.

¹⁰ Jini jach an ti' wenta Aarón yic'ot i yalobilob cha'an mi' cha'leñob motomajiyel. Mi tsa' ochi joch winic ti' ye'tel motomaj mi' tsʌnsʌntel.

^11-13 Lac Yum tsi' cha' sube Moisés: Awilan tsac yajca jini levíjob ti' tojlel israelob, i q'uexolobʌch jini ñoj ascuñʌlo' bʌ i yalobilob israelob. Jini cha'an c cha'añʌch jini levíjob come c cha'añʌch pejtelel jini yʌx alʌlob ti Israel. Ti jini q'uin che' bʌ tsac tsʌnsa pejtelel jini yʌx alʌlob ti Egipto, tsac yajca cha'an que'tel pejtelel yʌx alʌlob ti Israel yic'ot ñaxan bʌ i yal alʌc'ʌl. C cha'añobʌch, come la' Yumon.

^14-15 Lac Yum tsi' pejca Moisés ya' ti colem bʌ i tiquiñal pañimil i c'aba' Sinaí: Yom ma' tsic jini levíjob che' bajche' jaytiquilob añob ti mojt ti mojt. Yom ma' wotsan ti jun pejtelel ch'iton bʌ i yalobilob añobix bʌ jump'ejl uw yic'ot ñumen taquix bʌ, ch'itoñob yic'ot winicob, che'en lac Yum.

¹⁶ Che' jini Moisés tsi' chucuyob ti jun che' bajche' lac Yum tsi' sube.

^17-20 Awilan jiñobʌch i c'aba'ob i yalobilob Leví: Gersón, Coat yic'ot Merari. I p'olbal Gersón: Libni yic'ot Simei. I p'olbal Coat: Amram, Izhar, Hebrón yic'ot Uziel. I p'olbal Merari: Mahli yic'ot Musi. Jiñobʌch i p'olbal Leví che' bajche' jaytiquil i yalobilob ti mojt ti mojt.

^21-26 I yalobilob Gersón: jiñobʌch Libni yic'ot Simei. Pejtelel i p'olbal tsa' bʌ tsijquiyob añobix bʌ jump'ejl uw yic'ot ñumen tacobix bʌ ti jump'ejl uw jiñobʌch 7,500. Jini tilemo' bʌ ti Gersón tsa' aq'uentiyob i yajñib ti' pat jini Tabernáculo ba' mi' bʌjlel q'uin. I yum jini xchumtʌl tac jiñʌch Eliasaf i yalobil Lael. An ti' wenta i p'olbal Gersón cha'an mi' cʌntañob jini Tabernáculo. Mi' q'uelob jini tsalʌl tac yic'ot i tablajlel tac, yic'ot jini cortina tac ya' ti patio, yic'ot ya' ti' ti' jini patio am bʌ ti' joytʌlel jini Tabernáculo, yic'ot ya' ti pulʌntib, yic'ot pejtelel i ch'ajñal tac.

^27-32 I yalobilob Coat: jiñobʌch Amram, Izhar, Hebrón yic'ot Uziel. Pejtelel i p'olbal tsa' bʌ tsijquiyob, añobix bʌ jump'ejl uw yic'ot ñumen tacobix bʌ ti jump'ejl uw, jiñʌch 8,600. Añob ti' wenta cha'an mi' q'uelob jini ch'ujul bʌ i bʌl Tabernáculo. Jini tilemo' bʌ ti Coat yom mi' yajñelob ya' ti' tojel jini Tabernáculo ya' ti sur. Awilan i yum jini xchumtʌl tac jiñʌch Elizafán i yalobil Uziel. Añob ti wenta i p'olbalob Coat cha'an mi' q'uelob jini Arca, yic'ot jini mesa, yic'ot jini ba' mi' ts'ʌjbel c'ajc, yic'ot jini pulʌntib tac, yic'ot ch'ujul tac bʌ e'tijibʌl mu' bʌ i c'ʌñob jini motomajob. Jini ñuc bʌ yumʌl mu' bʌ caj i yumañob jini levíjob jiñʌch Eleazar i yalobil jini motomaj Aarón. Tsa' wa'choconti ti' yum jini año' bʌ ti' wenta jini Ch'ujul* bʌ Ajñibʌl.

^33-37 I p'olbalob Merari: jiñobʌch Mahli yic'ot Musi. Ti' pejtelel jini tsa' bʌ tsijquiyob añobix bʌ jump'ejl uw, yic'ot ñumen tacobix bʌ ti jump'ejl uw jiñobʌch 6,200. Jini i yum pejtelel ili winicob jiñʌch Zuriel i yalobil Abihail. Yom mi' yajñelob ya' ti junwejl Tabernáculo am bʌ ti norte. Añob ti' wenta i p'olbalob Merari cha'an mi' wen q'uelob jini i tablajlel yic'ot i chunte'lel, yic'ot i yebal jini Tabernáculo, yic'ot pejtelel mu' bʌ i c'ʌjñel tac. An ti' wenta ja'el i postejlel jini patio yic'ot pejtelel i c'ʌclib ba' mi' wa'tʌl jini poste tac, yic'ot i ch'ajñal tac yic'ot pejtelel mu' bʌ i c'ʌjñel.

³⁸ Jini mu' bʌ caj i yajñelob ya' ti' tojel Tabernáculo ba' mi' pasel q'uin jiñobʌch Moisés yic'ot Aarón yic'ot i yalobilob, cha'an i ye'tel ti' mal jini Ch'ujul bʌ Ajñibʌl, cha'an mi' ch'ujutesañob Dios ti' tojlel israelob. Majqui jach joch winic mi tsa' ochi ya' ti Tabernáculo muq'uix i chʌmel.

³⁹ Ti' pejtelelob jini levíjob tsa' bʌ i tsiquiyob Moisés yic'ot Aarón cha'an ti' mandar lac Yum Dios, jiñobʌch 22,000. Jiñobʌch añobix bʌ jump'ejl uw yic'ot ñumen tacobix bʌ, ch'itoñob yic'ot winic tacobix bʌ.

Tsa' tsijqui jini yʌx alʌlob

⁴⁰ Lac Yum Dios tsi' sube Moisés: Yom ma' tsic pejtelel jini yʌx alʌlob ti Israel winicob yic'ot ch'itoñob añobix bʌ jump'ejl uw yic'ot ñumen taquix bʌ. Yom mi la' ts'ijban ti jun i c'aba'ob.

⁴¹ Jini levíjob c cha'añobʌch. I q'uexolobʌch pejtelel jini yʌx alʌlob ti israel. C cha'añʌch ja'el i yʌlac'ob jini levíjob. I q'uexolobʌch jini ñaxan tac bʌ i yʌlac' israelob. Come la' Yumon.

⁴² Che' jini Moisés tsa' caji i tsic pejtelel jini yʌx alʌlob bʌ israelob che' bajche' lac Yum Dios tsi' sube.

⁴³ Pejtelel jini yʌx alʌl bʌ ti' tojlel israelob añobix bʌ jump'ejl uw yic'ot ñumen taquix bʌ, ch'itoñob yic'ot winicobix bʌ, jiñobʌch 22,273.

^44-45 Lac Yum tsi' sube Moisés: Yom ma' pʌy jini levíjob i q'uexolob jini yʌx alʌlob ti Israel. Pʌyʌ ja'el i yʌlac' levíjob cha'an i q'uexol i yʌlac' israelob, come jini levíjob c cha'añobʌch. Come la' Yumon.

^46-48 Ti Israel an i ñumel 273 yʌx alʌlob ñumen bajche' añob jini levíjob. Che' jini yom ma' c'ajtibeñob israelob uxc'al peso ti jujuntiquil. Che' jini yom ma' wʌq'uen jini taq'uin Aarón yic'ot i yalobilob, cha'an jini mach bʌ añobic i q'uexol ti' tojlel levíjob.

⁴⁹ Che' jini Moisés tsa' caji i ch'ʌm jini taq'uin cha'an jini 273 ch'itoñob ti Israel mach bʌ añobic i q'uexol ti' tojlel Leví.

⁵⁰ Ti pejtelel jini taq'uin tsa' bʌ tempʌyi cha'an yʌx alʌl bʌ israelob, jiñʌch l6,000 peso.

⁵¹ Che' jini Moisés tsi' yʌq'ue jini taq'uin Aarón yic'ot i yalobilob che' bajche' lac Yum tsi' sube.