Numeros 27 - Chol de Tumbalá Bible

Tsi' c'ajtiyob wocol t'an i yixic'alob Zelofehad

¹ Tsa' tiliyob ba'an Moisés jini xch'oc bʌ i yalobilob Zelofehad (i yalobil Hefer, i yalobil bʌ Galaad, i yalobil bʌ Maquir, i yalobil bʌ Manasés, i yalobil bʌ José). I c'aba'ob jini xch'ocob jiñʌch Maala, Noa, Hogla, Milca, yic'ot Tirsa.

² Che' wa'alob ti' tojlel Moisés yic'ot jini motomaj Eleazar, yic'ot jini año' bʌ i ye'tel ti Israel ti' ti' jini Tabernáculo, tsi' yʌlʌyob:

³ Jini c tat lojon tsa' bʌ chʌmi ya' ti colem bʌ i tiquiñal pañimil ma'anic tsi' yotsa i bʌ che' bʌ tsi' contrajiyob lac Yum jini Coré, pero cha'an jach ti' bajñel mul tsa' chʌmi. Ma'anic ch'iton bʌ i yalobilob.

⁴ ¿Yom ba mi' sajtel i c'aba' jini c tat lojon ti' tojlel i pi'ʌlob, cha'an jach ma'anic ch'iton bʌ i yalobil? Awocolic aq'ueñon lojon c lum ja'el quic'ot c yumijel lojon, che'ob.

^5-7 Jini cha'an Moisés tsa' majli i c'ajtiben lac Yum mi che'ʌch yom. Lac Yum tsi' sube Moisés: Uts'at che' bajche' woli' ña'tañob i yixic'alob Zelofehad. Yomʌch ma' wʌq'ueñob i lum ti' tojlel i yerañob i tat. Jini lum am bʌ ti' wenta i tat la' aq'uenticob.

⁸ Subeñob jini israelob: Che'ʌch yom mi' yujtel che' ma'anic ch'iton bʌ i yalobilob. Che' mi' chʌmel i yum jumpejt lum, mux i cʌytʌl ti' wenta xch'oc bʌ i yalobilob.

⁹ Mi ma'anic xch'oc bʌ i yalobil, yom mi' cʌytʌl ti' wenta i yerañob.

¹⁰ Mi ma'anic i yerañob, mi' cʌytʌl ti' wenta i yumijelob.

¹¹ Mi ma'anic i yumijel, mi' cʌytʌl ti' wenta jini lajal bʌ i c'aba' yic'ot jini winic, che'en lac Yum Dios. Jiñʌch yom bʌ mi' melob israelob ti pejtelel ora che' bajche' lac Yum tsi' yʌq'ue mandar Moisés.

Josué tsa' cʌle ti' q'uexol Moisés

¹² Lac Yum tsi' sube letsel Moisés ya' ti wits i c'aba' Abarim am bʌ ti lʌc'ʌl, cha'an mi' ñajti q'uel jini lum woli bʌ i yʌq'ueñob israelob ba' mi caj i chumtʌlob.

¹³ Tsi' sube: Che' bʌ ujtemix a q'uel, mi caj a pʌjyel majlel ba'an a ñojte'elob che' bajche' tsa' pʌjyi majlel Aarón a wʌscun.

¹⁴ Come tsa' ñusʌbeyon c t'an ya' ti colem bʌ i tiquiñal pañimil i c'aba' Zin. Ma'anic tsa' tsictesayon ti' tojlel israelob cha'an mi' ch'ujutesañoñob ya' ti Meriba ti Cades, che'en lac Yum Dios. (Jiñʌch ba' tsa' aq'uentiyob ja' che' bʌ tsi' cha'leyob a'leya.)

^15-16 Moisés tsi' sube lac Yum: C Yum, i Dioset bʌ pejtelel winicob, ma' laj cʌmbeñob i pusic'al. Yom ma' yajcan juntiquil cha'an ma' wʌq'uen i ye'tel ti' tojlel pejtelel israelob.

¹⁷ Yom juntiquil yumʌl mu' bʌ mejlel i toj'esañob majlel che' mi' loq'uelob ti guerra. Mi mejlel i cʌntañob, ame lajalic mi' yajñel a tejclum che' bajche' p'ump'un jax bʌ tiñʌme' mach bʌ anix i yum, che'en Moisés.

¹⁸ Lac Yum tsi' sube Moisés: Pʌyʌ Josué (i yalobil Nun), jini am bʌ i cha'an quEspíritu ti' pusic'al. Ac'ʌ a c'ʌb ti' jol.

¹⁹ Pʌyʌ majlel ba'an jini motomaj Eleazar ti' wutob pejtelel israelob cha'an ma' wʌq'uen i ye'tel.

²⁰ Aq'uen i ye'tel ti' tojlel israelob. Suben che' bajche' yom mi' mel. Aq'uen i ñuclel cha'an mi' yumañob i pi'ʌlob che' bajche' tsi' yumayetob.

²¹ Jiñʌch mu' bʌ caj i wa'tʌl ti' tojlel jini motomaj Eleazar cha'an mi' yubin bajche' com mi' mel. Joñon mi caj c pejcan Eleazar ya' ti Urim i yejtal bʌ i ña'tʌntel Dios. Jini mi caj i cha' suben Josué yic'ot pejtelel israelob. Che' jini mi caj i toj'esañob majlel, che'en lac Yum.

²² Che'ʌch tsi' mele Moisés che' bajche' tsi' sube lac Yum Dios. Tsi' pʌyʌ majlel Josué ba'an jini motomaj Eleazar ti' wutob pejtelel israelob.

²³ Tsi' yʌc'ʌ i c'ʌb ti' jol. Tsi' wa'choco cʌytʌl ti' ye'tel che' bajche' lac Yum tsi' sube.