Numeros 18 - Chol de Tumbalá Bible

I cʌntʌntel motomajob yic'ot levíjob

¹ Lac Yum tsi' sube Aarón: An ti a wenta yic'ot ti' wenta a walobilob cha'an mi la' cʌntan jini Ch'ujul bʌ Ajñibʌl. Muq'uix a toj jatet yic'ot a walobilob mi mach ts'ʌcʌlic tsa' la' mele bajche' yom.

^2-3 La' i coltañet ti e'tel a pi'ʌlob, i p'olbal bʌ Leví. Muq'uix i jac'beñetob pejtelel chuqui ma' subeñob, pero jatet jach yic'ot a walobilob mi caj i melob que'tel ti' mal ili Tabernáculo. Mach yomic mi' lʌc'tesañob i bʌ ame i tʌlob chuqui tac ch'ujul, mi jini e'tijibʌl mi jini pulʌntib, ame chʌmicob, ame chʌmiquet ja'el.

⁴ Mux caj a wʌq'ueñob i ye'tel a pi'ʌlob ti jujuntiquil cha'an mi' ch'ʌmob ti' wenta jini e'tel ti Tabernáculo ba' mic ñochtañet, pero mach yomic mi' wis ochel la' wic'ot ti e'tel jini joch winic mach bʌ la' pi'ʌlic.

⁵ Cojach jatetla motomajet bʌ la, an ti la' wenta jini e'tel ti Ch'ujul bʌ Ajñibʌl yic'ot ya' ti' t'ejl pulʌntib. Che' jini mi xuc'uletla ma'anix mi' chʌn tilel c mich'ajel ti' contra israelob.

⁶ Awilan tsac yajca la' pi'ʌlob i yalobilo' bʌ Leví cha'an mi' coltañetob ti e'tel ti Tabernáculo.

⁷ Pero jatet yic'ot a walobilob, motomajetla. Xuc'ul yom mi la' mel la' we'tel ti motomaj cha'an pejtelel e'tel ti pulʌntib yic'ot ti juntsajl pisil. Tsa cʌq'ueyetla la' c'ʌjñibal cha'an ili e'tel. Mi tsi' yotsa i bʌ joch winic, mi' caj ti chʌmel, che'en lac Yum.

⁸ Lac Yum tsi' cha' sube Aarón: Joñon tsa'ix cʌq'ueyet ti a wenta jini c majtan tac. Jiñʌch majtañʌl tac mu' bʌ i yʌq'ueñoñob israelob. A cha'añʌch yic'ot i cha'añʌch ja'el a walobilob c'ʌlʌl ti pejtelel ora, come ch'ujuletla, motomajetla. La' tem cha'an jach pejtelel c majtan mu' bʌ i yʌq'ueñoñob.

⁹ Jini majtañʌl bʌ harina yic'ot jini majtañʌl tac cha'an mulil yic'ot majtañʌl tac cha'an jontolil a cha'añʌch. Ch'ujul pejtelel jini majtañʌl tac.

¹⁰ Ya' jach ti Ch'ujul bʌ Ajñibʌl mi mejlel la' c'uxe'. Cojach winicob mi mejlel i c'uxob.

¹¹ Che' ja'el pejtelel iliyi a cha'añʌch: Jini yan tac bʌ c majtan mu' bʌ i yʌq'ueñoñob israelob cha'an ma' jʌmts'un mi caj la' ch'ʌm cha'an mi la' c'ux yic'ot la' pi'ʌlob. Junlajal mi mejlel la' c'ux mi sʌquetla tic tojlel. Jini mach bʌ sʌquic mach mejlic i c'ux. Che'ʌch yom mi' chʌn melob a walobilob ti pejtelel ora.

¹² La' cha'añʌch ja'el jini ñaxan bʌ i wut pʌc'ʌbʌl jini c'ax wen bʌ mu' bʌ i yʌq'ueñoñob: jiñʌch aceite olivo, yic'ot i ya'lel ts'usub yic'ot trigo.

¹³ Pejtelel jini ñaxan tac bʌ i wut pʌc'ʌbʌl mu' bʌ i ch'ʌmbeñoñob tilel winicob, a cha'añʌch. Pejtelel majqui sʌc año' bʌ ya' ti a wotot mi mejlel i c'uxob.

^14-15 Pejtelel chuqui tac mi' yʌq'ueñoñob israelob, a cha'añʌch. A cha'añʌch pejtelel yʌx alʌlob ti' tojlel israelob mi winic mi alʌc'ʌl mu' bʌ i yʌq'ueñoñob. Pero yom ma' ch'ʌmben i tojol mi yʌx alʌl bʌ i yalobil winic, che' ja'el mi ñaxan bʌ i yal alʌc'ʌl mach bʌ sʌquic tic tojlel.

¹⁶ Mach mejlic a pʌy jini yʌx alʌlob. Muq'uix a ch'ʌm taq'uin cha'an i q'uexol jini alʌl. Che' bʌ anix jump'ejl uw i cha'an, mux a ch'ʌmben lujump'ejl i cha'c'al peso cha'an i tojol.

¹⁷ Pero jini ñaxan tac bʌ i yal wacax, yic'ot tiñʌme', yic'ot chivo, mach yomic ma' ch'ʌmben i tojol, come ch'ujul. Wersa mi' yʌq'ueñoñob. Mi caj a c'ʌn i ch'ich'el cha'an ma' tsijcan jini pulʌntib. Pejtelel i lewil mi caj a pule' cha'an c majtan. Jiñʌch xojocña bʌ i yujts'il tic tojlel.

¹⁸ Jini i bʌc'tal a cha'añʌch, yic'ot pejtelel jini jʌmts'ubil bʌ tic tojlel. Jini i bʌc'tal i tajn jini alʌc'ʌl yic'ot i bʌc'tal i pat am bʌ ti' ñoj, a cha'añʌch ja'el.

¹⁹ Pejtelel jini ch'ujul tac bʌ majtañʌl mu' bʌ i yʌq'ueñoñob jini israelob tsa'ix cʌq'ueyetla ti la' wenta, yic'ot ti' tojlel jini ch'iton bʌ yic'ot xch'oc bʌ la' walobilob. Che'ʌch yom melol ti pejtelel ora. Yom chʌn c'ajal la' cha'an, come jiñʌch c trato woli bʌ cʌq'ueñet yic'ot a walobilob c'ʌlʌl ti pejtelel ora, che'en lac Yum Dios.

²⁰ Lac Yum tsi' sube Aarón: Ma'anic mic t'oxbeñetla lum yic'ot israelob. Ma'anic mi caj cʌq'ueñet a cha'an bʌ ti' tojlelob. Joñon la' cha'añon. Muq'uix la' taj i tijicñʌyel la' pusic'al tic tojlel.

²¹ Awilan tsa'ix cʌq'ueyob jini levíjob pejtelel jini diezmo tac mu' bʌ i ch'ʌmob tilel jini israelob. I wenta i lum cha'an woli' melob que'tel ti Tabernáculo ba' mi lac ñochtan lac bʌ.

²² Mach yomix mi' chʌn ochelob israelob ya' ti Ch'ujul bʌ Ajñibʌl ame chʌmicob cha'an i mul.

²³ Pero an ti' wenta jini levíjob cha'an mi' q'uelob jini e'tel ya' ti Tabernáculo. Muq'uix i bajñel tojob i mul mi mach ts'ʌcʌlic mi' melob che' bajche' yom. Che'ʌch mi caj i melob ja'el la' walobilob ti pejtelel ora. Jini cha'an mach yomic mi' yʌq'uentelob i lum jini levíjob ti' tojlel israelob.

²⁴ Come tsa'ix cʌq'ueyob ti' wenta levíjob jini diezmo tac mu' bʌ i yʌc'ob israelob tic tojlel. Jini cha'an tsa'ix c subeyob: Mach yomic mi la' wotsan la' bʌ ti censo cha'an i lum israelob, che'en lac Yum.

^25-26 Lac Yum tsi' sube Moisés: Subeñob jini levíjob: Che' mi la' wʌq'uentel jini diezmo tac tsa'ix bʌ cʌq'ueyetla ti la' wenta, yom mi la' loc' jump'ejl diezmo ti tempʌbil tac bʌ diezmo mu' bʌ i ch'ʌmob tilel israelob, cha'an mi la' wʌq'ueñon che' bajche' jʌmts'ubil bʌ c majtan.

²⁷ Uts'at mi caj j q'uel iliyi che' bajche' ñaxan bʌ i wut pʌc'ʌb, yic'ot ñaxan bʌ i ya'lel ts'usub. Come la' diezmojʌch jini mu' bʌ la' wʌq'ueñon.

^28-29 Yom mi la' loc' diezmo ya' ti tempʌbil tac bʌ diezmo, mu' bʌ i ch'ʌmob tilel israelob. Yajcanla jini ñumen wen bʌ cha'an mi la' wʌq'uen Aarón jini motomaj.

³⁰ Subeñob: “I wentajlelʌch la' cha'an jini mu' bʌ la' wʌq'uen lac Yum. Junlajalʌch ti' wut lac Yum che' bajche' loq'uemʌch ti la' pʌc'ʌb yic'ot ti la' ts'usubil.

³¹ Muq'uix i c'uxob Aarón yic'ot i pi'ʌlob yic'ot i yalobilob baqui jach yomob i c'ux, come jiñʌch i tojolob i ye'tel mu' bʌ i cha'leñob ti Tabernáculo ba' mi lac tempan lac bʌ la quic'ot.

³² Jini cha'an ma'anic la' mul che' mi la' ch'ʌmben i diezmo israelob mi tsa' la' yajca jini ñumen wen bʌ cha'an mi la' wʌq'ueñob jini motomajob. Pero tsajiletla ame chʌmiquetla. Ma'me la' lon ts'a'leben i majtan lac Yum mu' bʌ i yʌq'ueñob jini israelob, come ch'ujulʌch i majtan lac Yum”. Che'ʌch yom ma' subeñob, che'en lac Yum.