Numeros 12 - Chol de Tumbalá Bible

Miriam yic'ot Aarón tsi' wulwul a'leyob Moisés

¹ Awilan tsa' cajiyob ti wulwul a'leya Miriam yic'ot Aarón ti' contra Moisés cha'an tsi' pʌyʌ i yijñam ch'oyol bʌ ti Cus.

² Tsa' caji i yʌlob: ¿Cojach ba mi' cha'len t'an lac Yum yic'ot Moisés? ¿Mach ba anic mi' c'ʌñonla ja'el? che'ob.

³ Lac Yum tsi' yubibeyob i t'an. Uts i pusic'al Moisés ñumen bajche' pejtelel winicob ti pañimil.

⁴ Ti ora jach lac Yum tsi' pʌyʌ Moisés yic'ot Aarón yic'ot Miriam. Tsi' subeyob: Cucula ti la' wuxticlel ya' ba'an Tabernáculo, che'en. Jini cha'an tsa' majliyob.

⁵ Lac Yum tsa' jubi tilel ti Tocal. Tsa' wa'le ti' ti' Tabernáculo. Tsi' pʌyʌ Aarón yic'ot Miriam. Tsi' lʌc'tesayob i bʌ ti' cha'ticlel.

⁶ Lac Yum tsi' subeyob: Ñich'tanla ili c t'an. Mi añʌch la' cha'an x'alt'an mi caj c pejcan ti ñajal. Mi caj c suben c t'an che' an ti' wʌyib.

⁷ Pero mach che'ic mic pejcan c winic Moisés. Tsa cotsʌbe ti' wenta Moisés pejtelel i pi'ʌlob, come cojach xuc'ul c pusic'al yic'ot.

⁸ Mic cha'len t'an yic'ot Moisés che' bajche' mi la' pejcan la' bʌ ti jamʌl. Mach muculic c t'an ti' tojlel. Mi cʌc' c bʌ ti cʌjñel cha'an mi' q'uel bajche' quilal. ¿Chucoch ma'anic tsa' la' cha'le bʌq'uen che' bʌ tsa' la' wulwul a'le c winic Moisés? che'en lac Yum.

⁹ Che' jini tsa' tili i mich'ajel lac Yum cha'an mi' contrajiñob. Tsa' cha' majli lac Yum.

¹⁰ Tsa' letsi majlel jini Tocal ti' tojlel Tabernáculo. Awilan anix i c'amʌjel Miriam. Sʌc petepet tsa' majli i pʌchʌlel. Tsa' caji i q'uel Aarón mach wenix i pʌchʌlel Miriam.

¹¹ Ti wocol t'an tsi' sube Moisés: A wocolic c yum, mach a wʌq'ueñon lojon c toj ili mulil, come tontojon lojon.

¹² Mach a cʌy Miriam ame lajalic mi' cʌytʌl bajche' chʌmen bʌ alʌl oc'benix bʌ i bʌc'tal mi' yilan pañimil, che'en Aarón.

¹³ Che' jini Moisés tsi' pejca lac Yum Dios ti wocol t'an: C Yum Dios, mic subeñet, a wocolic, cha' lajmesan jini c chich, che'en.

¹⁴ Lac Yum tsi' sube Moisés: Tsa'ic tujbʌbenti i wut jini x'ixic cha'an i tat, ¿mach ba muq'uic i yʌjq'uel ti quisin wucp'ejl q'uin? Jini cha'an la' chojquic loq'uel ti la' tojlel wucp'ejl q'uin. Che' mi' ts'ʌctiyel, yom mi' cha' ochel ya' ba' chumuletla, che'en lac Yum.

¹⁵ Jini cha'an wucp'ejl q'uin tsa' chojqui loq'uel Miriam ti' tojlel i pi'ʌlob. Jini winicob x'ixicob tsi' pijtayob wucp'ejl q'uin. Ma'anic tsi' poj techeyob i xʌmbal jinto che' cha' ya'ix an yic'otob.

¹⁶ Che' jini tsi' cʌyʌyob Hazerot. Tsa' c'otiyob ti colem bʌ i tiquiñal pañimil i c'aba' Parán.