Numeros 1 - Chol de Tumbalá Bible

Tsa' ujti i tsicob israelob

¹ Che' wolix i majlel i cha'p'ejlel jab i loq'uelob ya' ti Egipto jini israelob, che' ti 15 de abril, lac Yum tsi' yʌq'ue mandar Moisés. Ya'an Moisés ti Tabernáculo ti lum i c'aba' Sinaí.

^2-4 Tsi' yʌlʌ: Yom ma' tsic pejtelel winicob ti jujump'ejl otot tsa' bʌ i tajayob junc'al i jabilel yic'ot jini anix bʌ i ñumel, pejtelel muq'uix bʌ i mejlel ti loq'uel ti guerra. Yom ma' laj tsicob jatet yic'ot Aarón che' bajche' jaytiquil añob ti mojt ti mojt. Mi caj i coltañet jujuntiquil winic loq'uem bʌ ti lajchʌnmojt israelob.

^5-15 Jiñʌch i c'aba' tac jini lajchʌntiquil winicob mu' bʌ caj i coltañetob: Elisur (i yalobil Sedeur) loq'uem bʌ ti Rubén; Selumiel (i yalobil Zurisadai) loq'uem bʌ ti Simeón; Naasón (i yalobil Aminadab) loq'uem bʌ ti Judá; Natanael (i yalobil Zuar) loq'uem bʌ ti Isacar; Eliab (i yalobil Helón) loq'uem bʌ ti Zabulón; Elisama (i yalobil Amiud) loq'uem bʌ ti Efraín, i yalobil José; Gamaliel (i yalobil Pedasur) loq'uem bʌ ti Manasés, i yalobil José; Abidán (i yalobil Gedeoni) loq'uem bʌ ti Benjamín; Ahiezer (i yalobil Amisadaí) loq'uem bʌ ti Dan; Pagiel (i yalobil Ocrán) loq'uem bʌ ti Aser; Eliasaf (i yalobil Deuel) loq'uem bʌ ti Gad; Ahira (i yalobil Enán) loq'uem bʌ ti Neftalí.

¹⁶ Jiñʌch i c'aba'ob ili winicob tsa' bʌ wa'chocontiyob ti jujunmojt israelob, jini añobix bʌ i pusic'al ti' tojlel i tatob.

^17-19 Ti jini jach bʌ q'uin Moisés yic'ot Aarón yic'ot jini winicob tsa' bʌ wa'chocontiyob cha'an mi' coltañob ti' tsicol winicob tsi' pʌyʌyob tilel israelob. Jiñobʌch winicob añobix jujunc'al i jabilel yic'ot i ñumel, che' bajche' tsi' yʌq'ue mandar Moisés lac Yum. Jiñʌch i numerojlel ti jujunmojt israelob che' bajche' an i yonlel ti jujuntiquil i p'olbal:

^20-46 I p'olbalob Rubén, jini ascuñʌl bʌ i yalobil Jacob 46,500 I p'olbalob Simeón 59,300 I p'olbalob Gad 45,650 I p'olbalob Judá 74,600 I p'olbalob Isacar 54,400 I p'olbalob Zabulón 57,400 I p'olbalob Efraín, i yalobil José 40,500 I p'olbalob Manasés, i yalobil José 32,200 I p'olbalob Benjamín 35,400 I p'olbalob Dan 62,700 I p'olbalob Aser 41,500 I p'olbalob Neftalí 53,400 Ti pejtelel jiñobʌch 603,550

I ye'telob jini levíjob

^47-49 Pero jini levíjob ma'anic tsa' ch'ʌjmiyob ti tsic, come lac Yum tsi' sube Moisés: Mach ma' tsicben i p'olbal Leví. Mach ma' wotsañob ti jun yic'ot i pi'ʌlob ti Israel.

⁵⁰ Come jini levíjob tsa' aq'uentiyob i ye'tel ya' ti Tabernáculo. An ti' wenta cha'an mi' cuchob majlel jini Tabernáculo yic'ot pejtelel i bʌl. Lʌc'ʌl mi' chumtʌlob ti Tabernáculo.

⁵¹ Baqui ora mi' ch'ʌjmel majlel jini Tabernáculo, an ti' wenta jini levíjob cha'an mi' chejob. An ti' wenta ja'el cha'an mi' cha' wa'chocoñob. Mi tsi' lʌc'tesa yambʌ winic mach bʌ levíjic la' chʌmic.

⁵² Pejtelel jini israelob ti mojt ti mojt la' i wa'chocoñob jini pisil bʌ otot i cha'añob.

⁵³ Jini levíjob mi caj i melob i yotot ya' ti' pam jini Tabernáculo cha'an ma'anic mic mich'len israelob. An ti' wenta jini levíjob cha'an mi' cʌntañob Tabernáculo. Che' tsi' yʌlʌ lac Yum.

⁵⁴ Che'ʌch tsi' meleyob pejtelel israelob bajche' lac Yum tsi' sube Moisés.