Levitico 9 - Chol de Tumbalá Bible

Jini majtañʌl tac tsa' bʌ i yʌc'ʌ Aarón

¹ Che' ti' waxʌcp'ejlel q'uin, Moisés tsi' pʌyʌ tilel Aarón yic'ot i yalobilob yic'ot jini xñoxob ti Israel.

² Moisés tsi' sube Aarón: Yajcan tilel juncojt alʌ tat wacax cha'an i tojol mulil. Yom juncojt tat tiñʌme' cha'an pulbil bʌ i majtan lac Yum. Mach yomic jini am bʌ i c'amʌjel mi i lojwemal.

³ Subeñob israelob: “Pʌyʌla tilel juncojt i tat chivo cha'an i tojol la' mul. Pʌyʌla tilel ja'el juncojt tat wacax yic'ot juncojt tat tiñʌme' am bʌ jump'ejl i jabilel ti cha'cojtlel. Mach yomic jini am bʌ i lojwemal. Jiñʌch cha'an pulbil bʌ i majtan lac Yum.

⁴ Che' ja'el pʌyʌla tilel juncojt i tat wacax yic'ot tat tiñʌme' cha'an mi la' tsʌnsʌben lac Yum cha'an mi la' taj i tijicñʌyel la' pusic'al. Yom i ñujp ti ac'ol, jiñʌch majtañʌl bʌ harina xajc'ubil bʌ yic'ot olivo aceite. Come lac Yum mi caj i pʌs i bʌ ti la' tojlel wʌle”. Che' yom mi la' subeñob israelob, che'en Moisés.

⁵ Che' jini tsi' ch'ʌmʌyob majlel ti' ti' jini Tabernáculo che' bajche' Moisés tsi' subeyob. Tsa' c'otiyob ti wa'tʌl jini israelob ba'an lac Yum.

⁶ Moisés tsi' subeyob: Che' bʌ tsa'ix la' mele che' bajche' tsi' yʌlʌ lac Yum, mi' caj ti tsictiyel i ñuclel, che'en Moisés.

⁷ Moisés tsi' sube Aarón: Lʌc'tesan a bʌ ya' ti' t'ejl jini pulʌntib cha'an ma' wʌq'uen i majtan lac Yum cha'an i tojol mulil. Jiñʌch pulbil bʌ majtañʌl ja'el. Ñaxan yom ma' wʌq'uen i majtan lac Yum cha'an a mul, ti wi'il cha'an i mul pejtelel winicob, come che'ʌch tsi' yʌc'ʌ mandar lac Yum, che'en.

⁸ Jini cha'an Aarón tsi' lʌc'tesa i bʌ ya' ti pulʌntib. Tsi' tsʌnsa jini alʌ tat wacax cha'an i ñusʌntel i mul.

⁹ I yalobilob Aarón tsi' lotoyob jini ch'ich'. Aarón tsi' ts'aja i yal i c'ʌb ya' ti ch'ich' cha'an mi' bomben i xulub tac jini pulʌntib. I colobal jini ch'ich' tsi' laj beq'ue ya' ti' yebal jini pulʌntib.

¹⁰ Pejtelel i lewil tac, yic'ot i cuchi'tun yic'ot i yolmal, tsi' laj pulu ya' ti pulʌntib. Jiñʌch loq'uem tac bʌ ti majtañʌl cha'an i ñusʌntel mulil che' bajche' lac Yum tsi' sube Moisés ti mandar.

¹¹ Pero tsa' majli i pul jini i bʌc'tal yic'ot i pʌchʌlel ya' ti' junwej tejclum.

¹² Che' jini tsi' tsʌnsa jini alʌc'ʌl cha'an mi' pulben lac Yum. I yalobilob Aarón tsi' lotoyob jini ch'ich'. Aarón tsi' tsijca ya' ti pam pulʌntib.

¹³ Ti wi'il tsa' caji i ñusañob tilel i bʌc'tal jini majtañʌl, jini bic'ti tsepbil tac bʌ, yic'ot i jol. Tsi' pulu ya' ti pulʌntib.

¹⁴ Tsi' sʌc'be i soyta'. Tsi' pocbe jini i yoc tac. Tsa' caji i pule' ja'el ya' ti' pulʌntib i majtan lac Yum.

¹⁵ Ti wi'il tsa' caji i yʌc' ja'el jini majtañʌl cha'an i mul pejtelel winicob. Tsi tsʌnsa juncojt i tat chivo cha'an mi' ñusʌbentelob i mul winicob. Tsi' yʌq'ue lac Yum che' bajche' jini majtañʌl cha'an bʌ i bajñel mul.

¹⁶ Che'ʌch tsi' tsʌnsa jini alʌc'ʌl cha'an mi' pulben lac Yum che' bajche' tsi' yʌc'ʌ mandar Dios.

¹⁷ Ti wi'il tsi' ch'ʌmʌ junmujch' trigo bʌ majtañʌl. Tsi' pulu ya' ti pulʌntib yic'ot i majtan lac Yum mu' bʌ i pulbentel ti jujump'ejl sʌc'ajel.

¹⁸ Wi'ilix tsi' tsʌnsa jini tat wacax yic'ot jini tat tiñʌme' cha'an mi' tajob i tijicñʌyel i pusic'al jini winicob x'ixicob. Jini i yalobilob Aarón tsi' ch'ʌmbeyob tilel Aarón i ch'ich'el majtañʌl. Aarón tsi' tsijca jini pulʌntib.

¹⁹ Tsi' much'quibe i lewil tac jini wacax yic'ot jini tiñʌme', yic'ot i ñej, i lewil am bʌ ti' soyta', i lewil i cuchi'tun yic'ot i lewil i yolmal.

²⁰ Tsi' much'choco i lewil jini alʌc'ʌl tac. Che' jini Aarón tsa' caji i pule' ya' ti pulʌntib.

²¹ Pero i bʌc'tal i tajn yic'ot i pechquen am bʌ ti' ñoj, tsi' jʌmts'u Aarón. Jiñʌch jʌmts'ubil bʌ i majtan lac Yum, che' bajche' tsi' yʌc'ʌ mandar Moisés.

²² Che' jini Aarón tsi' letsa i c'ʌb ti' tojlel jini winicob. Tsi' yʌq'ueyob i yutslel i t'an. Ti' wi'il tsa' cha' jubi ti pulʌntib. Tsa' ujti i yʌc' jini majtañʌl tac.

²³ Moisés yic'ot Aarón tsa' ochiyob ti Tabernáculo. Che' bʌ tsa' cha' loq'uiyob tilel, tsi' yʌq'ueyob i yutslel i t'an jini winicob x'ixicob. Tsa' tsictiyi i ñuclel lac Yum ti' tojlel pejtelel winicob x'ixicob.

²⁴ Tsa' loq'ui tilel c'ajc ti' tojlel lac Yum. Tsi' laj pulu jini majtañʌl yic'ot i lewil tac am bʌ ti' pam jini pulʌntib. Che' bʌ tsi' q'ueleyob jini winicob, tsi' cha'leyob c'am bʌ t'an. Tsi' pʌcchocoyob i bʌ ti' tojlel lac Yum.