Levitico 7 - Chol de Tumbalá Bible

^1-2 Jiñʌch mandar che' an majqui mi' taj i mul. Ya' ti ajñibʌl baqui mi la' tsʌnsan jini pulbil bʌ c majtan, ya' yom mi la' tsʌnsan jini majtañʌl cha'an mulil. Yom mi la' tsijcʌben i ch'ich'el ti' joytʌlel jini pulʌntib. Ch'ujulʌch ili majtañʌl.

³ Jini motomaj mi caj i yʌc' ya' ti pulʌntib pejtelel i lewil yic'ot i ñej, yic'ot i lewil tac i soyta',

⁴ yic'ot i lewil jini cha'p'ejlel i cuchi'tun, yic'ot am bʌ ya' ti' bʌc'tal i pat, yic'ot i cuchi'tun.

⁵ An ti' wenta jini motomaj cha'an mi' pulbeñon ya' ti pulʌntib cha'an i tojol la' mul.

⁶ Cojach jini motomajob yic'ot ch'iton bʌ i yalobilob mi mejlel i c'uxob. Yom mi' c'uxob ya' ti Ch'ujul bʌ Ajñibʌl, come c'ax ch'ujulʌch jini majtañʌl.

⁷ Jun lajal mi caj la' mel yic'ot jini majtañʌl cha'an bʌ i ñusʌntel mandar che' bajche' jini majtañʌl cha'an bʌ mulil. Jini motomaj mu' bʌ i yʌc' ti ñusʌntel jini mulil mi caj i ch'ʌm jini majtañʌl.

⁸ Jini motomaj mu' bʌ i pulbeñon c majtan mi caj i ch'ʌm ja'el i pʌchʌlel jini majtañʌl.

⁹ Jini motomaj am bʌ ti' wenta cha'an mi yʌq'ueñon jini uts'at tac bʌ majtañʌl melbil tac bʌ ti trigo mu' bʌ i colojbajel, mi tiq'uesʌbil ti horno, o mi ch'ilbil, mi caj i ch'ʌm. I cha'añʌch cha'an mi' c'ux.

¹⁰ Pejtelel yan tac bʌ majtañʌl xajc'ubil bʌ yic'ot aceite, o mi tiquin jach melbil, ti' pejtelel jini i cha'añobʌch i yalobilob Aarón. Junlajal yom mi' tajob.

¹¹ Jiñʌch mandar cha'an c majtan che' mi la' subeñon wocolix cʌlʌ cha'an la' coltʌntel.

¹² Che' mi cʌq'uentel c majtan che' mi la' subeñon wocolix cʌlʌ, yom jini woch'esʌbil bʌ waj mach bʌ anic i levadurajlel, xajc'ubil bʌ yic'ot aceite, yic'ot galleta tac bombil bʌ yic'ot harina xajc'ubil bʌ yic'ot olivo aceite, yic'ot waj melbil bʌ ti harina xajc'ubil bʌ yic'ot olivo aceite.

¹³ Yom mi cʌq'uentel ili majtañʌl temel yic'ot caxlan waj am bʌ i levadurajlel che' mi la' subeñon wocolix cʌlʌ.

¹⁴ Jini motomaj mi caj i yʌq'ueñon junq'uejl waj loq'uem bʌ ti' yonlel. Jini motomaj mu' bʌ i tsijcʌben i ch'ich'el alʌc'ʌl ti' tojel pulʌntib mi caj i ch'ʌm i colobal c majtan ti chajp ti chajp.

¹⁵ Jini alʌc'ʌl mu' bʌ cʌq'uentel cha'an mic subentel wocolix cʌlʌ mi caj i c'uxtʌl i bʌc'tal ti jini jach bʌ q'uin. Mach yomic mi' wis cʌytʌl i colobal cha'an yambʌ q'uin.

¹⁶ Pero mi an juntiquil mu' bʌ i yʌc' majtañʌl tilem bʌ ti' pusic'al che' bajche' tsi' ña'ta i yʌc', mach bʌ cha'anic wocolix cʌlʌ, mi tsa' to colobaji, mi mejlel i cha' c'uxtʌl che' ti yijc'ʌlal.

^17-18 Mi chʌn an to i bʌc'tal jini we'elʌl che' ti yuxp'ejlel q'uin, yomix mi' pulel ti c'ajc. Mi tsa' to chʌn c'uxle i bʌc'tal jini majtañʌl che' ti yuxp'ejlel q'uin, che' jini lolom jach tsi' yʌc'ʌ. Ma'anix mic ch'ʌm tic wenta come tsa'ix ñumi i yorajlel. Majqui jach mi' c'uxe' mi' taj i mul.

¹⁹ Mach mejlic mi' c'uxtʌl jini we'elʌl mu' bʌ i pʌjq'uel cha'an cha'an tsi' tʌlʌ chuqui tac jach bibi' tic wut. Wersa yom mi' pulel ti c'ajc. Majqui jach sʌc tic wut mi mejlel i c'ux jini we'elʌl mi ma'anic tsa' pʌjq'ui.

²⁰ Pero jini motomaj mu' bʌ i c'ux c majtan che' mic subentel wocolix cʌlʌ, mi max to sʌq'uesʌbilic jini motomaj tic wut, wersa yom mi' chojquel loq'uel ti' tojlel i pi'ʌlob.

²¹ Majqui jach mi' tʌl chuqui bibi' tic wut mi i bibi'lel winic, mi i bibi'lel alʌc'ʌl tac, mi' taj i bibi'lel ja'el. Mi tsi' c'uxu jini majtañʌl tac aq'uebilon bʌ cha'an mic subentel wocolix cʌlʌ, wersa yom mi' chojquel loq'uel ya' ti' tojlel i pi'ʌlob, come tsi' bib'esa jini ch'ujul bʌ, che'en lac Yum.

^22-23 Lac Yum tsi' cha' sube Moisés: Subeñob jini israelob: Mach mejlic la' c'ux i lewil wacax, mi i lewil tiñʌme' mi i lewil chivo.

²⁴ Che' an i lewil jini chʌmen bʌ alʌc'ʌl, mi i lewil yambʌ bʌte'el mu' bʌ i tsʌnsan bajlum ya' ti te'el, mi mejlel la' c'ʌn, pero mach yomic mi la' c'ux.

²⁵ Come majqui jach mi' c'uxben i lewil alʌc'ʌl mu' bʌ cʌq'uentel cha'an c majtan, wersa mi caj i chojquel loq'uel ti' tojlel i pi'ʌlob.

^26-27 Mach mejlic la' c'ux mi ts'ita'ic i ch'ich'el alʌc'ʌl mi te'lemut. Che' an juntiquil winic mu' bʌ i c'uxben i ch'ich'el alʌc'ʌl mi te'lemut, wersa mi caj i chojquel loq'uel ti' tojlel i pi'ʌlob, che'en lac Yum.

^28-29 Lac Yum tsi' cha' sube Moisés: Subeñob israelob: Jini yom bʌ i yʌq'ueñon c majtan cha'an mi' subeñon wocolix cʌlʌ, la' i ch'ʌmbeñon tilel c majtan.

³⁰ Ti' c'ʌb la' i chuc tilel jini majtañʌl mu' bʌ caj i pulbeñon. Yom mi' ch'ʌmbeñon tilel i lewil am bʌ ti' tajn cha'an mi' jʌmts'untel tic tojlel ba'an jini pulʌntib.

³¹ Jini motomaj mi caj i pulbeñon i lewil ya' ti pulʌntib, pero jini i tajn i cha'añʌch Aarón yic'ot i yalobilob.

^32-33 Yom mi la' wʌq'uen jini motomaj i bʌc'tal i pat am bʌ ti' tojel i ñoj cha'an mi' c'ux. I cha'añʌch jini motomaj mu' bʌ i yʌq'ueñon majtañʌl cha'an wocolix cʌlʌ.

³⁴ Come joñon woli cʌq'ueñob motomajob i tajn c majtan mu' bʌ i jʌmts'untel yic'ot i bʌc'tal i pat mu' bʌ i yʌq'ueñoñob jini israelob. Tsa cʌq'ueyob ti' wenta jini motomaj Aarón yic'ot i yalobilob. Che'ʌch yom ti pejtelel ora.

³⁵ Ti pejtelel majtañʌl mu' bʌ c pulbentel jiñʌch mu' bʌ caj i yʌq'uentel Aarón yic'ot i yalobilob come tsac wa'chocoyob ti' ye'tel motomaj tic tojlel.

³⁶ Jiñʌch c mandar c'ʌlʌl che' bʌ tsac wa'chocoyob ti' ye'tel ti' tojlel Israel. Yom chʌn c'ajalob i cha'an israelob yic'ot i yalobilob ti pejtelel ora, che'en lac Yum.

³⁷ Jiñʌch mandar cha'an majtañʌl tac ti chajp ti chajp: jini pulbil bʌ majtañʌl, jini majtañʌl bʌ harina, jini majtañʌl cha'an i tojol mulil yic'ot majtañʌl che' mi' ñusʌntel mandar, yic'ot che' an majqui mi' sʌq'uesan i bʌ, yic'ot cha'an i tijicñʌyelelob i pusic'al.

³⁸ Jiñʌch tsa' bʌ i yʌlʌ lac Yum ti' tojlel Moisés ya' ti wits i c'aba' Sinaí, am bʌ ti colem bʌ i tiquiñal pañimil. Tsi' subeyob israelob cha'an mi' yʌq'ueñob i majtan lac Yum.