Levitico 2 - Chol de Tumbalá Bible

Jini majtañʌl melbil tac bʌ ti trigo

¹ Che' an juntiquil yom bʌ i yʌq'ueñon trigo tic majtan, la' i ch'ʌm tilel wen juch'bil bʌ trigo yic'ot olivo aceite yic'ot i pomil.

² La' i yʌq'ueñob i yalobilob Aarón. Juntiquil motomaj mi caj i ch'ʌm junmujch' majtañʌl loq'uem bʌ ya' ba' chajpʌbil cha'an mi' pule' yic'ot pom. Mic mulan ili majtañʌl.

³ Jini i colobal jini juch'bil bʌ trigo i cha'anix Aarón yic'ot i yalobilob cha'an i bʌlob i ñʌc'. Pero mic ch'ʌm ti wenta pejtelel jini majtañʌl che' bajche' ch'ujul bʌ c majtan.

⁴ Ba' ora ma' wʌc' waj ti horno cha'an mi' tic'an c majtan, wen juch'bil yom. Yom xajc'ubil yic'ot olivo aceite, pero mach yomic yic'ot levadura. Mi mejlel a wʌq'ueñon galleta ja'el, pero mach yomic yic'ot levadura. Yom ma' bon yic'ot olivo aceite.

⁵ Che' ja'el mi tsa' wʌc'ʌ jini majtañʌl tac ch'ilbil bʌ ti sartén, yom wen juch'bil bʌ harina. Mach yomic che' an levadura. Yom xajc'ubil yic'ot aceite.

⁶ Che' jini yom ma' bic'ti xut'. Aq'uen aceite, come majtañʌlʌch.

⁷ Mi tsa' wʌc'ʌ jini majtañʌl ch'ʌxbil bʌ ti p'ejt, yom wen juch'bil bʌ harina yic'ot olivo aceite.

⁸ Che' jini yom ma' ch'ʌmbeñon tilel pejtelel majtañʌl tac, mi tiq'uesʌbil, mi ch'ilbil. Yom ma' wʌq'uen jini motomaj cha'an mi' yʌq'ueñon ya' ti pulʌntib.

⁹ Jini motomaj mi caj i pul lamital jini majtañʌl cha'an c ña'tʌntel. Mi caj c ch'ʌm ti wenta ti' pejtelel.

¹⁰ Jini i colobal majtañʌl mu' bʌ i cʌytʌl i cha'anix Aarón yic'ot i yalobilob cha'an mi' c'uxob. Pero ch'ujulʌch c majtan ti pejtelel.

¹¹ Mach yomic xʌbʌl yic'ot levadura* mi junchajpic jini majtañʌl mu' bʌ a wʌq'ueñon. Mach yomic che' xʌbʌl ti chab mic pulbentel c majtan.

¹² Mi mejlel la' wʌq'ueñon yic'ot ñaxan bʌ i wut pʌc'ʌbʌl, pero mach yomic mi la' wʌc' ti' pulʌntib yic'ot xojocña bʌ c majtan.

¹³ Yom ma' wotsʌben i yʌts'mil pejtelel majtañʌl mu' bʌ a wʌq'ueñon, come jini ats'am mi' yʌc' ti' ña'tʌntel jini xuc'ul* bʌ t'an tsa' bʌ cʌq'ueyetla.

¹⁴ Mi tsa' wʌq'ueyon jini ñaxan bʌ i wut a pʌc'ʌb, yom ma' ch'il ti c'ajc jini yax to bʌ i wut jini trigo. Cujbil yom ja'el. Yom ma' wʌq'ueñon jini juch'bilix bʌ i wut trigo.

¹⁵ Yom ma' xajc'un ti olivo aceite. Yom ma' wotsʌben jini pom, come majtañʌlʌch.

¹⁶ Che' jini, jini motomaj mi caj i pul lamital jini juch'bil bʌ trigo. Yom xajc'ubil yic'ot aceite yic'ot jini pom che' ma' wʌq'ueñon.