Levitico 18 - Chol de Tumbalá Bible

Tic'bilob ti ñujpuñel

^1-2 Lac Yum tsi' sube Moisés: Subeñob jini israelob: La' Yumon, la' Dioson.

³ Mach yomic lajal mi la' mel che' bajche mi' melob ti Egipto ya' ba' tsa' chumleyetla ti yambʌ ora. Mach yomic mi la' tsajcʌbeñob i melbal jini año' bʌ ti Canaán ba' mi caj c pʌyetla majlel.

^4-5 Yom mi la' chʌn mel pejtelel jini c mandar. Pejtelel jini c t'an yom mi la' chʌn jac' ti pejtelel q'uin. Come joñoñʌch la' Yumon la' Dioson. Jini winic mu' bʌ i wen jac', cuxul mi' yajñel. Yumʌloñʌch.

^6-8 Jini winic mach i pʌy x'ixic che' laj bʌ i pi'ʌlob i bʌ, come la' Yumon. Mach mejlic i pʌy xch'oc bʌ i yalobil. Mach mejlic i pʌy i ña' mi i majan ña'.

⁹ Mach mejlic i pʌy i yijti'an, mi i chich mi i yijts'in, mi xch'oc bʌ i yalobil i tat i ña'. Anquese an ti yambʌ otot, mach mejlic i pʌye'.

¹⁰ Mach ma' pʌy jini xch'oc bʌ i yalobil a walobil, come a butsʌch.

¹¹ Mach ma' pʌy jini xch'oc bʌ i yalobil a majan ña' come a chichʌch.

^12-14 Mach yomic ma' pʌy a ña'jel, mi a chich mi i yijts'in a tat a ña'.

^15-16 Mach yomic ma' pʌy a wʌ'lib mi a mu'. Come la' pi'ʌl la' bʌ.

¹⁷ Mach ma' pʌy juntiquil x'ixic yic'ot xch'oc bʌ i yalobil, mi xch'oc bʌ i buts come i pi'ʌlob jach i bʌ. Jiñʌch ñuc bʌ mulil.

¹⁸ Mach yomic ma' pʌy cha'tiquil a wijñam che' i yijts'iñob jach i bʌ, come mi caj i ts'aleñob i bʌ. Cojach mi tsa' chʌmi a wijñam, che' jini mi mejlel a pʌyben i yijts'in mi i chich.

Tic'bil yambʌ i jontolil lac bʌc'tal

¹⁹ Mach a pi'len jini x'ixic che' woli to i q'uel i c'amʌjel.

²⁰ Mach ma' pi'len i yijñam a pi'ʌl come mulilʌch.

²¹ Mach ma' lon ac' a walobil cha'an i majtan dios Moloc. Mach ma' pul ti' pulʌntib. Mach ma' p'ajben i c'aba' Dios come la' Dioson, la' Yumon.

²² Jini winicob mach yomic mi' wʌlʌc pi'leñob i bʌ. Che' ja'el x'ixicob mach yomic mi' laj bʌ pi'leñob i bʌ, come ts'a' mij q'uel.

²³ Che' ja'el mach mi la' pi'len jini alʌc'ʌl. Jinic x'ixic mach mi' yʌc' i bʌ ti pi'lentel yic'ot chuqui tac an ti pañimil, come jiñʌch ñuc bʌ mulil.

²⁴ Mach yomic mi la' pʌc' la' bʌ ti jini mulil. Come che'ʌch mi' melob jini mach bʌ anic mi' cʌñob Dios. Jini cha'an mi caj c chocob loq'uel ti' lumal baqui mi caj la' wochel.

²⁵ Come tsa' wen p'ojli jontolil ti jini tejclum. Wolix cʌq'ueñob i toj i mul. Mi caj c chocob loq'uel ba' chumulob.

²⁶ Yom mi la' chʌn jac' jini c t'an yic'ot jini c mandar cha'an ma'anic mi la' mel ili mulil jatetla wʌ' bʌ chumuletla, yic'ot jini ñajt bʌ ch'oyolob mu' bʌ i cha'leñob chumtʌl la' wic'ot.

²⁷ Come jini chumulo' bʌ ya' baqui wolic pʌyetla majlel tsa'ix i meleyob pejtelel ili mulil.

²⁸ Yom tsajaletla cha'an ma'anic mi la' mel jini mulil, cha'an ma'anic mic choquetla loq'uel ti jini lum che' bajche' jini ñaxan xcolelob ya' bʌ chumulob.

^29-30 Come majqui jach mi' cha'len ili mulil tac, wersa mi caj i chojquel loq'uel ti' tojlel i pi'ʌlob. Jini cha'an yom chʌn c'ajal la' cha'an la' tic'ol, cha'an ma'anic mi la' tsajcan jini leco jax bʌ i melbalob jini ñaxan xcolelob, ame yajliquetla ti mulil. Come joñon la' Yumon la' Dioson, che'en.