Josue 16 - Chol de Tumbalá Bible

I lum Efraín yic'ot Manasés

¹ Jiñʌch i lumob tsa' bʌ aq'uentiyob i yalp'eñelob José: Jini cayajon tsa' tejchi ya' ti Jordán ja' ya' ti Jericó. Tsa' c'axi ti wits tac ya' ti Betel.

² Che' bʌ tsa' ñumi ti Betel (Luz) tsa' c'oti ti cayajón i cha'an arquijob ya' ti Atarot.

³ Tsa' majli ti' tojel i bʌjlibal q'uin ba'an jini jafletob, c'ʌlʌl ba'an i lum Bethorón am bʌ ti entʌl, yic'ot ba'an Gezer. Tsa' c'oti ti ñajb.

⁴ Ya' tsa' aq'uentiyob i lumob Manasés yic'ot Efraín, i yalobilob José.

⁵ Jiñʌch i lumob jini efraiñob che' bajche' c'amel jini otot tac: Jini cayajon am bʌ ti' pasibal q'uin tsa' ñumi ti Atarotadar c'ʌlʌl ti Bethorón am bʌ ti chan.

⁶ Tsa' majli ti' tojel i bʌjlibal q'uin c'ʌlʌl ti Micmetat am bʌ ti norte. Xotol tsa' majli ba'an Taanatsilo. Tsa' c'axi ti Janoa.

⁷ Tsa' c'axi ti Atarot yic'ot Naarat. Tsa' ñumi ba'an Jericó. Tsa' c'oti ti Jordán ja'.

⁸ Tsa' c'axi ba'an Tapúa ti' tojel i bʌjlibal q'uin. Tsa' c'axi ba'an jini pa' i c'aba' Caná. Tsa' c'oti ti jini ñajb. Jiñʌch i lumal Efraín che' bajche' c'amel jini otot tac.

⁹ An i cha'an Efraín ja'el tejclum tac ti' tojlel lamital i p'olbal Manasés. An xchumtʌl tac cha'an junjump'ejl lum.

¹⁰ Pero ma'anic tsi' chocoyob loq'uel jini cananeojob chumulo' bʌ ti Gezer. Jini cananeojob mi' tem chumtʌlob yic'ot efraiñob c'ʌlʌl wʌle. Tsa' wersa ajniyob ti mozo ti' tojlel israelob.