Jonas 1 - Chol de Tumbalá Bible

Jonás tsi' puts'ta lac Yum

¹ Tsa' tili i t'an lac Yum ba'an Jonás i yalobil Amitai:

² Ch'ojyen, cucu ti Nínive, jini colem tejclum. Subeñob i mul, come q'uelelix c cha'an cabʌlob i jontolil, che'en lac Yum.

³ Jonás tsi' chajpa i bʌ cha'an mi' puts'el loq'uel ti' tojlel lac Yum cha'an mach yomic majlel ti Nínive. Tsa' jubi majlel ti Jope ba' tsi' taja colem barco woli bʌ i majlel ti Tarsis. Tsi' tojo i yochib. Tsa' ochi cha'an mi' majlel ti Tarsis yic'ot jini año' bʌ ti barco cha'an mi' loq'uel ti' tojlel lac Yum.

⁴ Lac Yum tsi' choco tilel p'ʌtʌl bʌ ic' ti colem ñajb. Tsa' wen tejchi jini p'ʌtʌl bʌ ic' ti ñajb jinto yomix jejmel jini barco.

⁵ Tsa' cajiyob ti bʌq'uen x'e'telob ti barco. Ti jujuntiquil tsi' yotayob i dioste'. Tsi' t'ox loc'sʌbeyob i cuch barco cha'an mi' sejb'an. Ñololix Jonás ya' ba' tsa' jubi ti cojix bʌ i yebal barco. Woli ti wʌyel.

⁶ I yum barco tsa' tili ba'an Jonás. Tsi' sube: ¿Chucoch woliyet ti wʌyel? Ch'ojyen. Pejcan a Dios. Tic'ʌl mux i p'untañonla Dios ame jiliconla, che'en.

⁷ Tsi' pejcayob i bʌ jini año' bʌ ti barco: La' lac cha'len yajcaya ti alas cha'an mi lac ña'tan chucoch tsa' tili jini wocol ti lac tojlel. ¿Majqui an i mul? che'ob. Tsi' cha'leyob yajcaya ti alas. Tsa' c'oti ti' tojlel Jonás.

⁸ Jini cha'an jini x'e'telob tsi' subeyob: Subeñon lojon, ¿chucoch tsa' tili i tajonla ili wocol? ¿Chuqui tsa' cha'le? ¿Baqui ch'oyolet? ¿Chuqui i c'aba' a lumal? ¿Majqui a pi'ʌlob? che'ob.

⁹ Jonás tsi' subeyob: Hebreojon. Mic bʌc'ñan lac Yum, jini Dios am bʌ ti panchan tsa' bʌ i mele colem ñajb yic'ot lum. Tsi' subeyon majlel ti Nínive pero mach comic majlel, che'en.

¹⁰ Jini winicob tsa' wen cajiyob ti bʌq'uen che' ña'tibilix i cha'añob woli' puts'el loq'uel Jonás ti' tojlel lac Yum. Tsi' subeyob: ¿Chucoch tsa' lon mele bajche' jini? che'ob.

¹¹ Tsi' subeyob ja'el: ¿Chuqui yom mic tumbeñet lojon cha'an mi' ñʌjch'el jini ñajb ame jilicon lojon? che'ob. Come jini ñajb woli yutsi wec'ulan i bʌ.

¹² Jonás tsi' sube x'e'telob ti barco: Chucuyon. Chocoyon ochel ti ñajb. Che' jini mi caj i ñʌjch'el jini ñajb cha'an cha' tijicñayetla, come cujil an c mul. Jini cha'an tsa' tili p'ʌtʌl bʌ ic' i tic'lañetla, che'en.

¹³ Jini x'e'telob ti barco tsi' wersa ñijcayob barco cha'an mi' c'ʌlʌl c'otel ya' ti' ti' ja'. Ma'anic tsa' mejliyob come jini ñajb woli yutsi wec'ulan i bʌ cha'an mi' jisañob.

¹⁴ Jini cha'an c'am tsi' pejcayob lac Yum: A wocolic mic subeñet lojon, c Yum lojon, mach a wʌc'on lojon ti jilel cha'an ili winic. Mach a q'uelon lojon ti stsʌnsa mi tsac choco lojon ochel jini winic ti ñajb cha'an mi' ñʌjch'el ja', come a wentajʌch, c Yum lojon, cha'an tsa' choco tilel jini ic', che'ob.

¹⁵ Jini cha'an tsi' chucuyob Jonás. Tsi' chocoyob ochel ti colem jini ñajb. Tsa' ñʌjch'i ñajb.

¹⁶ Jini cha'an jini winicob tsa' caji i wen bʌc'ñañob lac Yum. Tsi' pulbeyob i majtan lac Yum. Tsi' yʌc'ʌyob i t'an cha'an mux caj i chʌn ch'ujutesañob Dios mi tsi' coltayob cha'an mi' c'otelob ti lum.

¹⁷ Lac Yum tsi' chajpa colem chʌy cha'an mi' mʌsan Jonás. Ya' tsa' cʌle Jonás ti' ñʌc' jini chʌy uxp'ejl q'uin yic'ot uxp'ejl ac'ʌlel.