Jeremias 52 - Chol de Tumbalá Bible

Sedequías

¹ Anix jump'ejl i cha'c'al i jabilel Sedequías che' bʌ tsa' caji ti yumʌntel. Junlujump'ejl jab tsi' cha'le yumʌl ti Jerusalén. I c'aba' i ña' Hamutal, jiñʌch i yixic'al jini Jeremías ch'oyol bʌ ti Libni.

² Sedequías tsi' cha'le mulil ti' tojlel lac Yum che' bajche' Joacim i tat.

³ Jini cha'an tsa' mich'a lac Yum. Tsi' choco loq'uel jini chumulo' bʌ ti Jerusalén yic'ot ti Judá cha'an ts'a' tsi' q'ueleyob. Sedequías tsi' ñusʌbe i t'an jini rey ti Babilonia.

Tsa' ochi Jerusalén ti' wenta i contrajob

⁴ Che' bolomp'ejlix jab yic'ot lujump'ejl uw i yumʌntel Sedequías tsa' tili Nabucodonosor rey bʌ ti Babilonia yic'ot pejtel i winicob cha'an mi' techob guerra ti' contra Jerusalén.

⁵ Tsi' chʌn joyoyob jini tejclum c'ʌlʌl ti junlujump'ejlix jab i yumʌntel Sedequías.

⁶ Che' ti bolomp'ejlel tsic ti' chʌmp'ejlel uw, wocol jax jini wi'ñal ti tejclum. Ma'anix waj ti jini lum.

⁷ Jini caldeojob tsa' majli i ts'ita' jamben ts'ajc ti' joytʌlel tejclum cha'an mi' yochelob. Pejtel jini soldadojob ti Jerusalén tsa' puts'iyob. Tsi' cʌyʌyob jini tejclum che' ac'ʌlelix. Tsa' ñumiyob ti mucul bij am bʌ ti' yojlil cha'p'ejl ts'ajc ya' ti' pʌc'ʌb jini rey. Ya' añob caldeojob ti' joytʌlel tejclum.

⁸ Tsi' yajñesayob jini rey Sedequías. Tsi' tajayob ti joctʌl ya' ti Jericó. I bajñel an come pam pujquemob soldadojob.

⁹ Cʌchʌl tsi' pʌyʌyob majlel ti Ribla ya' ti' lumal Hamat ba'an Nabucodonosor rey bʌ ti Babilonia. Ya' tsi' mele.

¹⁰ Jini rey bʌ ti Babilonia tsi' tsʌnsa i yalobilob Sedequías ti' tojel i wut i tat. Tsi' tsʌnsa ja'el jini yumʌlob tilemo' bʌ ti Judá.

¹¹ Ti wi'il tsi' pit loc'be jini cha'p'ejl i wut Sedequías. Jini rey ti Babilonia tsi' cʌchʌ. Tsi' pʌyʌ majlel ti Babilonia ba' tsi' yotsa ti mʌjquibʌl. Ya' tsa' jale c'ʌlʌl jinto tsa' chʌmi.

Tsa' cʌjchiyob majlel judíojob

¹² Che' ti' jo'p'ejlel tsic ti lujump'ejlel uw tsa' ochi ti Jerusalén jini capitán Nabuzaradán am bʌ i ye'tel ti' wenta Nabucodonosor rey bʌ ti Babilonia.

¹³ Tsi' pulu i yotot lac Yum yic'ot i yotot jini rey, yic'ot pejtelel otot ti Jerusalén. Tsi' laj puluyob jini colem otot wen melbil tac bʌ.

¹⁴ Jini soldadojob caldeojob tsa' bʌ i coltayob jini capitán tsi' laj jemeyob i ts'ajquil Jerusalén.

¹⁵ Jini capitán Nabuzaradán yic'ot i soldadojob tsi' pʌyʌyob majlel ti Babilonia winicob x'ixicob tsa' bʌ cʌleyob ti tejclum yic'ot i pi'ʌlob tsa' bʌ i bajñel ac'ʌyob i bʌ ti' wenta caldeojob.

¹⁶ Pero Nabuzaradán tsi' cʌyʌ jini pobrejo' bʌ mach bʌ anic i lum cha'an mi' cʌntañob ts'usubil yic'ot pʌc'ʌbʌl.

¹⁷ Tsi' bic'ti top'oyob i yoyel i yotot lac Yum, melbil bʌ ti c'ʌnc'ʌn taq'uin, yic'ot i t'uchlib tac, yic'ot jini colem tanque am bʌ ti' Templo lac Yum. Laj melbil tac ti c'ʌnc'ʌn taq'uin. Tsi' cuchuyob majlel ti Babilonia.

¹⁸ Tsi' cuchuyob majlel ja'el jini p'ejt tac yic'ot pala, yic'ot yʌpo' c'ajc yic'ot vasilla yic'ot cuchara tac yic'ot pejtelel latu tac melbil bʌ ti c'ʌnc'ʌn taq'uin am bʌ i c'ʌjñibal ti Templo,

¹⁹ yic'ot taza tac yic'ot i latu tac c'ajc yic'ot vasilla, yic'ot p'ejt tac, yic'ot i t'uchlib lámpara tac yic'ot cuchara tac yic'ot jini latu tac. Jini capitán tsi' laj ch'ʌmʌ majlel jini melbil tac bʌ ti oro yic'ot ti plata.

²⁰ Cha'ts'ijt i yoyel, jump'ejl colem tanque, lajchʌncojt tat wacax melbil bʌ ti bronce am bʌ ti yebal i buchlib rey yic'ot ja'el i t'uchlib tac i yotot lac Yum tsa' bʌ i yʌc'ʌ ti melol jini rey Salomón. Ma'anic i p'isol pejtel ili c'ʌnc'ʌn taq'uin.

²¹ Waxʌcp'ejl metro i chanlel junts'ijt oy. Jo'p'ejl metro i bontʌclel, tocol i mal, lujump'ejl centímetro i pimlel.

²² Ya' ti' chañelal jini oy an i jol melbil bʌ ti c'ʌnc'ʌn taq'uin. Cha'p'ejl metro i chanlel i jol. Joy ch'ʌlbil i pam yic'ot i yejtal tac granada, melbil bʌ ti c'ʌnc'ʌn taq'uin. Che'ʌch ja'el jini yambʌ oy, i pi'ʌl bʌ.

²³ An ti' joytʌlel i pam wʌclujump'ejl i jo'c'al (96) granada. An yambʌ jo'c'al ti' joytʌlel i yebal. Cha' ñumel i ch'ʌjlil ti jujunts'ijt.

²⁴ Jini capitán Nabuzaradán tsi' cʌchʌ jini ñuc bʌ motomaj Seraías yic'ot jini vice motomaj Sofonías yic'ot jini uxtiquil xcʌnta otot.

²⁵ Tsi' pʌyʌyob majlel yic'ot jini eunuco tsa' bʌ i q'uele soldadojob, yic'ot wuctiquil winicob tsa' bʌ i cʌntesayob jini rey, yic'ot jini secretario tsa' bʌ i colta jini general ti ejército, yic'ot uxc'al winicob ti Judá tsa' bʌ tajleyob ti yojlil tejclum.

²⁶ Nabuzaradán tsi' laj cʌchʌyob. Tsi' pʌyʌyob majlel ti Ribla ba'an Nabucodonosor jini rey ti Babilonia.

²⁷ Jini rey tsi' laj tsʌnsayob ya' ti Ribla ti' lumal Hamat. Che' jini tsa' pʌjyiyob majlel ti Babilonia jini ch'oyolo' bʌ ti Judá.

^28-30 Nabucodonosor tsi' pʌyʌ majlel ti' lumal 3,023 judíojob che' ti' wucp'ejlel jab, yambʌ 832 che' ti' waxʌclujump'ejlel jab, yambʌ 745 judíojob pʌybilo' bʌ majlel cha'an jini capitán Nabuzaradán che' uxp'ejl i cha'c'alix jab i yumʌntel Nabucodonosor. Añob ojlil i lajchʌmbajc' winicob (4,600) ti pejtelelob.

Joaquín tsa' loq'ui ti mʌjquibʌl

³¹ Che' wʌclujump'ejl i chac'alix (37) jab che' cʌchʌl ti ñajtʌl Joaquín rey bʌ ti Judá, che' jo'p'ejl i chac'alix tsic ti lajchʌmp'ejlel uw, tsa' ochi ti rey ti Babilonia Evil Merodac. Che' ti' tejchibal i ye'tel tsi' tijicñesʌbe i pusic'al Joaquín, rey bʌ ti Judá. Tsi' loc'sa ti mʌjquibʌl.

³² Tsi' wen pʌsʌ i bʌ ti amigo. Tsi' yʌq'ue i ye'tel ti' tojlel yaño' bʌ yumʌlob tsa' bʌ i pi'leyob ti e'tel ya' ti Babilonia.

³³ Joaquín tsi' lʌpʌ tsiji' bʌ i pislel. Tsi' pi'le ti we'el jini rey ti pejtelel i jabilel.

³⁴ Tsa' aq'uenti taq'uin yic'ot pejtel chuqui tac yom i cha'an ti' wenta jini rey ti Babilonia. Tsa' p'isbenti ti jujump'ejl q'uin c'ʌlʌl jinto tsa' chʌmi.