Jeremias 40 - Chol de Tumbalá Bible

I colojbal judíojob yic'ot Gedalías

¹ I t'an lac Yum tsa' bʌ tili ba'an Jeremías: Jini capitán Nabuzaradán, tsi' pʌyʌ majlel Jeremías ti cadena tac yic'ot pejtel i pi'ʌlob loq'uemo' bʌ ti Jerusalén yic'ot ti Judá tsa' bʌ pʌjyiyob majlel ti Babilonia.

² Pero tsi' yʌc'ʌ ti colel Jeremías. Tsi' sube: A Yum Dios tsi' choco tilel ili wocol ti jini tejclum.

³ Ts'ʌcʌl tsi' mele che' bajche' tsi' wʌn alʌ. Ti' caj la' mul tsi' choco tilel ili wocol cha'an ma'anic tsa' la' jac'be i t'an. Jini cha'an woliyetla ti wocol.

⁴ Awilan wolix c loc'sʌbeñet jini cadena am bʌ ti a c'ʌb. Mi a wom majlel quic'ot ya' ti Babilonia, conla. Mu'to j cʌntañet. Pero mi mach a womic majlel, uts'at ma' cʌytʌl ti ili lum. Yajcan baqui a wom majlel. Yom majliquet ba' uts'at ti a wut.

⁵ Uts'at mi a wom sujtel ya' ba'an Gedalías (i yalobil Ahicam, i yalobil bʌ Safán), come wa'chocobil cha'an i rey Babilonia. Woli' mel i ye'tel gobernador ti pejtelel tejclum tac ti Judá. Cucu ti chumtʌl a wic'ot a pi'ʌlob mi a wom. Mele bajche' jach uts'at ti a wut, che'en. Che' jini, jini capitán Nabuzaradán tsi' yʌc'ʌ ti colel. Tsi' yʌq'ue i bʌl i ñʌc' yic'ot yambʌ i majtan.

⁶ Jini cha'an Jeremías tsa' sujti ti Mizpa ba'an Gedalías (i yalobil Ahicam). Tsa' chumle yic'ot Gedalías yic'ot jini winicob tsa' bʌ cʌleyob ti jini lum.

⁷ Jini soldadojob año' bʌ i ye'tel ti ili lum tsi' yubiyob wa'chocobilix Gedalías (i yalobil Ahicam) cha'an i rey Babilonia. Tsi' yubiyob laj ac'bilobix ti' wenta Gedalías yic'ot pejtel jini pobrejo' bʌ tsa' bʌ cʌleyob ti Judá.

⁸ Jini cha'an tsa' tiliyob ti Mizpa ba'an jini gobernador Gedalías. Tsa' tiliyob Ismael (i yalobil Netanías), Johanán yic'ot Jonatán (i yalobilob Corea), Seraías (i yalobil Zanhumet), yic'ot i yalobilob Efai ch'oyolo' bʌ ti Netafat, yic'ot Jezarías i yalobil winic chumul bʌ ti Maacat yic'ot i winicob.

⁹ Gedalías (i yalobil Ahicam) tsi' wa'choco i t'an ti' tojlelob. Tsi' yʌlʌ: Mach la' bʌc'ñan jini caldeojob. Q'ueleyob ti la' yum. Chumlenla wʌ' ti la' lumal. Jac'benla i t'an jini rey am bʌ ti Babilonia. Che' jini tijicña mi caj la' wajñel.

¹⁰ Joñon an que'tel wʌ' ti Mizpa cha'an mic pejcan jini caldeojob che' mi' tilelob i q'uel bajche' añetla wʌ' ti la' lumal. Jatetla an la' we'tel ti la' lum cha'an mi la' tuc' ts'usub yic'ot yambʌ i wut te' yic'ot aceite. Yom mi la' chumtʌl ti la' tejclum baqui jach la' wom. Che' tsi' subeyob jini gobernador Gedalías.

¹¹ Jini caldeojob pam pujquemo' bʌ ti Moab yic'ot ti Amón yic'ot ti Edom yic'ot ti yan tac bʌ tejclum tsi' yubiyob wa'chocobilix Gedalías (i yalobil Ahicam i yalobil bʌ Safán). Aq'uebilix i ye'tel ti' tojlel jini rey ti Babilonia.

¹² Jini cha'an tsa' cha' tiliyob ti Judá pejtel judíojob loq'uemo' bʌ ti jujump'ejl lum ba' tsa' puts'iyob majlel. Tsi' yumayob Gedalías chumul bʌ ti Mizpa. Tsi' tempayob i ya'lel ts'usub yic'ot i wut te'. Wen on tsi' tuc'uyob.

Ismael tsi' contraji Gedalías

¹³ Johanán (i yalobil Carea) yic'ot pejtel jini soldadojob año' bʌ i ye'tel ti Judá tsa' tem majliyob ti Mizpa ba'an Gedalías.

¹⁴ Tsi' subeyob: ¿Mach ba a wujilic talix Ismael (i yalobil Netanías) cha'an mi' tsʌnsañet? Chocbil tilel i cha'an Baalis i rey amoñob, che'ob. Pero Gedalías ma'anic tsi' ñopbeyob i t'an.

¹⁵ Johanán (i yalobil Carea) tsi' sube Gedalías ti mucul jach: La'ix majlicon cha'an mic tsʌnsan Ismael (i yalobil Netanías). Ma'anic majqui mi caj i ña'tan. ¿Chucoch ma' lon ac' a bʌ ti tsʌnsʌntel? Che' jini mi caj i pam pujquelob jini judíojob tsa' bʌ i cha' tempayob i bʌ cha'an mi' yumañet. Che' jini mi caj i laj jilelob c pi'ʌlob ti Judá, che'en.

¹⁶ Pero Gedalías (i yalobil Ahicam) tsi' sube: Mach che'ic yom ma' mel Johanán, come mach talic Ismael i tsʌnsañon. Mach isujmic bajche' wola' wʌl, che'en.