Jeremias 14 - Chol de Tumbalá Bible

T'an ti' caj jajmel

¹ Tsa' tili i t'an lac Yum ba'an Jeremías che' tiquin pañimil.

² Woliyob ti uq'uel jini año' bʌ ti Judá. Ma'anix mi' tilelob xchoñoñelob ti' ti' tejclum. Pʌcʌlob ti lum woliyob ti uq'uel. Ti ñajtʌl mi' yubintel.

³ Jini yumʌlob mi' chocob majlel winicob ti luch ja'. Mi' c'otelob ti' yajñib ja' pero tiquinix. Mi' tsicob i pusic'al come mi' to'ol sujtelob.

⁴ Baqui jach mi' ñumelob ti sʌclaya tiquinix pañimil, come anix ora ma'anic woli ja'al. Ma'anix i ye'tel mu' bʌ i top'ob lum. Mi' melob i pusic'al.

⁵ Jini ña' me' mi' cʌy i yal ti jamil che' ujtem i yilan pañimil, come ma'anic jam.

⁶ Jini burro mach bʌ anic i yum mi' to'ol ñumel ti xʌmbal ti jochol bʌ lum ti pam wits. Wocol mi' jap ic' cha'an tiquinix i bic'. Mi' lujb'an i sʌclan i bʌl i ñʌc', come ma'anic i buc'bal.

⁷ Isujm, cabʌl c mul lojon ti a tojlel, c Yum, pero p'untañon lojon cha'an ma' q'uejlel ti ñuc. Tsaj cʌyʌyet lojon. Tsac ñusa lojon a t'an.

⁸ Jatet i pijtayajet Israel, la caj coltayajet ti' yorajlel wocol. ¿Chucoch ma' mel a bʌ che' bajche' winic mach bʌ laj cʌñʌyic, che' bajche' winic woli bʌ ti ñajtʌ xʌmbal mu' bʌ i jijlel ti' yotot xjula'ob?

⁹ ¿Chucoch ma' tʌts' a bʌ che' bajche' winic mach bʌ yujilic coltaya, che' bajche' laj contra mach bʌ mejlic i coltañonla? Pero wʌ' añet tic tojlel lojon, c Yum. A cʌñʌyonix lojon, a winicon lojon. Mach a cʌyon lojon.

¹⁰ Lac Yum tsi' subeyon wen cabʌl jax i sajtemal i winicob. Mi' mulañob i xoy i bijlel. Ma'anic mi' tic'ob i bʌ. Jini cha'an ma'anic i ñusʌbentel i mul. I yorajlelix mi caj i tojob i mul.

¹¹ Lac Yum tsi' subeyon: Mach a tajob ti oración ili winicob x'ixicob. Mach a c'ajtibeñon cha'an mij coltañob.

¹² Che' mi' cha'leñob ch'ajb che' mi' pejcañoñob, ma'anic mi caj cubiñob. Che' mi' yʌq'ueñoñob cotol bʌ c majtan yic'ot pom, mach tijicñayonic mi caj j q'uel. Mi caj cʌc'ob ti chʌmel ti espada, yic'ot ti wi'ñal, yic'ot ti c'amʌjel, che'en.

¹³ Tsac sube: C Yum Dios, jini x'alt'añob woli' lotiñob. Woli' subeñob uts'at bajche' añob. Woli' yʌlob mach talic guerra yic'ot wi'ñal. Woli' yʌlob mux caj a ñʌch'tesʌbeñob pañimil, mux caj a coltañob, lon che'ob.

¹⁴ Lac Yum tsi' subeyon: Jini x'alt'añob woli' lon c'ʌñob j c'aba' che' mi' cha'leñob lot. Ma'anic tsac chocoyob ti subt'an. Ma'anic tsac pejcayob. Lot jach chuqui woli' q'uelob che' bajche' ti ñajal. Che' mi' subob chuqui tac tal, mach isujmic. Ch'oyol jach ti' bajñel pusic'al. Chan mi' melob i bʌ.

¹⁵ Jini cha'an lac Yum tsi' yʌlʌ: Ma'anic tsac chocoyob ti subt'an. I bajñel jach mi' yʌlob mach talic guerra, mach talic wi'ñal ti ili lum, lon che'ob. Jini cha'an jini x'alt'añob mi caj i chʌmelob ti espada yic'ot ti wi'ñal.

¹⁶ Ili winicob mu' bʌ i jac'beñob i t'an mi caj i chojquelob ti' bijlel tac Jerusalén. Mi caj i chʌmelob ti espada yic'ot ti wi'ñal. Ma'anic majch mi caj i mucob. Laj majlemobix i pi'ʌlob yic'ot i yalobilob. Mi caj cʌq'ueñob i toj i mul.

¹⁷ Mi caj a subeñob: “Mic cha'len uq'uel ti q'uiñil yic'ot ti ac'ʌlel. Mach lajmic i ya'lel c wut, come c pi'ʌlobʌch. Jec'bilob ti espada woli' chʌmelob. Pam pujquemob.

¹⁸ Che' com loq'uel majlel ti jamil, awilan ya' añob jini tsʌnsʌbilo' bʌ ti machit. Che' com ochel ti tejclum, ya' woli' chʌmelob ti wi'ñal yic'ot c'amʌjel”. Jini x'alt'añob yic'ot motomajob mi' majlelob ti jijlel baqui jach mi' mejlelob. Mach mejlic i coltañob i bʌ.

¹⁹ C Yum, ¿tsa' ba a junyajlel ts'a'le Judá? ¿Mach ba yujilic lajmel a mich'ajel? ¿Chucoch wen wocol tsa' wʌc'ʌyon lojon ti lojwel cha'an ma'anix mic lajmel lojon? Tsa cʌlʌ lojon mux i lajmel wocol, pero ma'anic. Junyajlel ch'ijiyem lojon c pusic'al.

²⁰ Mic sub lojon c mul. Isujm añʌch lojon c mul ti' tojel a wut.

²¹ Mach ma' ts'a'leñon lojon. Pʌsʌ a bʌ ti ñuc tic tojlel lojon, ame p'ajlecon lojon che' mach chʌn tsiquilix a ñuclel. Chʌn ña'tañon lojon. Mach ma' q'uextan jini xuc'ul bʌ a t'an.

²² ¿Mejl ba i chocob tilel ja'al i diosob yan tac bʌ tejclum? ¿Yilol jach ba mi' tilel ja'lel ti panchan? Jatet c Yumet, c Dioset. Mic pijtañet lojon. Jatet jach ma' mel pejtel iliyi.